Simbaha si Jehova Ingong Pamilya
1 Sa panahon sa Bibliya, ang mga membro sa pamilya magtinabangay sa pagbuhat sa daghang butang. Ilang himoon ang adlaw-adlaw nga mga buluhaton ug ilabina ang pagsimba kang Jehova ingong pamilya. (Lev. 10:12-14; Deut. 31:12) Karon, diha sa daghang dapit, pipila na lang ka butang ang buhaton sa mga membro sa pamilya nga magkauban. Apan nahibalo ang mga Kristohanon sa kahinungdanon sa pagpakigbahin sa mga kalihokan ingong pamilya, ilabina may kalabotan sa pagsimba. Malipay gayod ang Tagmugna sa pamilya nga makakita sa mga pamilya nga nagkahiusa sa pagsimba kaniya!
2 Pagsangyaw Ingong Pamilya: Ang pagsangyaw sa maayong balita makapalig-on sa bugkos sa pamilya. Busa, gawas pa sa pagkuyog sa uban diha sa kongregasyon, ang ansiyano kinahanglang regular usab nga makig-uban sa iyang asawa ug mga anak sa pagsangyaw. (1 Tim. 3:4, 5) Bisan pag daghan kaayog eskedyul, ang nagapanawng mga magtatan-aw makauban gihapon sa ilang mga asawa diha sa ministeryo.
3 Kon iuban sa mga ginikanan ang ilang mga anak sa pagsangyaw, ilang matabangan sila nga mouswag ingong mga magmamantala. Mamatikdan sa mga anak dili lang ang kalipay ug katagbawan sa ilang mga ginikanan diha sa ministeryo kondili ilang makita usab ang ilang mga ginikanan nga magpahayag sa ilang gugma kang Jehova ug sa mga isigkatawo. (Deut. 6:5-7) Ang kahinungdanon niini dili makunhoran samtang modagko ang mga bata. Usa ka magtiayon nga may tulo ka anak lalaki nga nag-edad ug 15 hangtod sa 21 anyos nagpadayon sa pag-uban kanila nga regular diha sa ministeryo. Miingon ang amahan: “Amo silang tudloan kanunay ug usa ka butang. Ug paneguroon namo nga ang pagsangyaw makapahimuot ug makapadasig.”
4 Pagpangandam Ingong Pamilya: Napamatud-an sa mga pamilya nga mapuslanon ang dungang pagpangandam alang sa ministeryo. Kasagarang malingaw nga magpraktis ang mga membro sa pamilya nga magpulihanay sa paghatag ug presentasyon, ang usa magmamantala ug ang lain tagbalay. Ang pipila ka pamilya naggahin ug pipila ka minutos human sa ilang pagtuon aron himoon kini.
5 Ang atong kalipay madugangan kon kita makigbahin sa mahinungdanon ug makapatagbaw nga mga kalihokan uban sa atong mga minahal. Makapahimuot gayod alang sa mga membro sa pamilya ang pagsangyaw nga magkauban sa pagpamalaybalay ug sa paghimog mga balikduaw ug pagdumalag mga pagtuon sa Bibliya! Busa, samtang inyong simbahon si Jehova ingong pamilya, kamo malipayong makaingon: “Kon bahin kanako ug sa akong panimalay, kami mag-alagad kang Jehova.”—Jos. 24:15.