Kon Unsaon nga Magbuliganay ang mga Membro sa Banay Alang sa Bug-os nga Pakig-ambit—Diha sa Ministeryo
1 Unsa pa ang mas makapadasig kay sa makita ang mga bana ug mga asawa, mga ginikanan ug mga anak nga duyog nga nagabuhat diha sa Kristohanong ministeryo, nga publikong nagadayeg sa ngalan ni Jehova? (Sal. 148:12, 13) Ang tanang banay kinahanglang magbaton ug usa ka maayong rutina sa regular nga pagpakig-ambit sa pag-alagad sa kanataran. Ang imo bang banay adunay gitakdang adlaw matag semana nga gugolon sa ministeryo? Kon mao, nan ang matag usa nahibalo sa tukma kon unsay planohon ug makahimog bug-os nga pagpakig-ambit.—Prov. 21:5a.
2 Sa dili pa ang adlaw sa pag-alagad sa banay, nganong dili himoon kini nga usa ka hiniusang proyekto ang pag-andam sa mga presentasyon nga gamiton sa imong banay? Ang mga sesyon sa pag-ensayo mahimong mapuslanon kaayo, ug kini makapalambog tinuod nga espiritu sa pagbuliganay sa banay. Pagkamagantihon kini sa dihang ang ministeryo sa kanataran maoy kalihokan nga iya sa banay ug ang tanang membro nangandam pag-ayo!
3 Usa ka nagapanawng magtatan-aw mikuyog sa tibuok pamilya diha sa magasing kalihokan. Samtang siya namalaybalay duyog sa usa sa mga anak nga babaye, siya nangutana: “Hangtod kanus-a nga ikaw mokuyog kanako?” Dayon siya miingon nga siya mokuyog sa iyang amahan pagkatapos. Dayag kadto nga siya ug ang iyang amahan nalingaw gayod sa ilang pag-alagad nga duyog. Pagkamaayong espiritu sa banay!
4 Ang pipila ka banay tingali makahimo sa pag-oksilyare payunir nga dungan sa usa ka bulan sulod sa tuig. O hayan posible nga labing menos ang usa ka membro sa banay padayong mag-alagad ingong oksilyare payunir o bisan gani sa pagpalista ingong regular payunir. Pinaagi sa maayong organisasyon ug pagbuliganay, hayan ang tanang membro sa panimalay makahimo sa pagpauswag sa ilang personal nga pagpakig-ambit diha sa pag-alagad pinaagig pagpaluyo sa usa nga nagapayunir. Ang banay tinong mapanalanginan pinaagi niining napauswag nga kalihokan ug pinaagi sa maayong mga kasinatian nga napahimuslan diha sa ministeryo.—Mal. 3:10.
5 Ang pagbaton ug bug-os nga pagpakig-ambit diha sa buluhatong pag-ebanghelyo motabang sa mga pamilya nga magpabiling suod, masiboton, mabungahon, ug malipayon sa pag-alagad kang Jehova!—Itandi ang Filipos 2:1, 2.