Ayaw Pagpanuko!
1. Sa unsang paagi wala nato “ihikaw ang maayo”?
1 Pinaagi sa atong makugihong pagsangyaw sa maayong balita sa Gingharian sa Diyos, wala nato “ihikaw ang maayo” sa mga tawo sa atong teritoryo. (Prov. 3:27) Ang kinamaayohang mensahe nga atong ikapaambit sa mga tawo mao kanang bahin sa mas maayong panahon sa umaabot ubos sa pagmando sa Diyos. Tingali masiboton ka sa pagpaambit sa paglaom sa Gingharian pinaagi sa di-pormal nga pagsangyaw o pagtanyag ug mga literatura, apan nganong dili nimo himoong tumong nga makadumalag usa ka pagtuon sa Bibliya, kon wala ka pay gitun-an?
2. Unsay lagmit makababag kanato sa pagdumalag pagtuon sa Bibliya?
2 Usahay, ang usa sa kinadak-ang babag sa pagdumalag pagtuon sa Bibliya mao ang atong tinamdan bahin niana. Ang uban nagpanuko sa pagdumalag pagtuon sa Bibliya tungod sa kakulag pagsalig sa kaugalingon o tungod sa ilang puliki nga kinabuhi. Ang mosunod nga mga sugyot basin makatabang kanimo aron dili ka magpanuko sa pagdumalag pagtuon sa Bibliya.—Mat. 28:19; Buh. 20:20.
3. Nganong kuwalipikado kitang manudlo sa Bibliya?
3 Kakulang ug Pagsalig: Tingali dili taas ang imong sekular nga edukasyon o tungod sa ubang hinungdan, kulang kag pagsalig sa imong katakos sa pagdumalag pagtuon sa Bibliya. Ang malamposong Kristohanong mga ministro sa unang siglo maoy mga tawong “dili edukado ug ordinaryo.” Unsay nakatabang kanila sa pagtudlo sa kamatuoran ngadto sa uban? “Sila nag-ubanan kang Jesus.” (Buh. 4:13) Sila nakakat-on gikan sa Dakong Magtutudlo, si Jesus, kansang mga pagtulon-an ug mga pamaagi gitipigan diha sa Kasulatan alang kanato. Bisan pag limitado lamang ang imong sekular nga edukasyon, padayong nabatonan nimo ang kinalabwang matang sa edukasyon, ang espirituwal nga edukasyon.—Isa. 50:4; 2 Cor. 3:5.
4. Unsay atong makat-onan gikan sa panig-ingnan ni Amos?
4 Si Jehova naggamit usahay ug mga manalagna sa pagbadlong sa nakasala nga mga magmamando o sa uban pang may tag-as nga katungdanan. Ang pipila, sama kang Amos, adunay ubos nga kagikan. Si Amos miangkon: “Ako dili usa ka manalagna, ni ako anak sa usa ka manalagna; apan ako usa ka tig-alima sa mga hayop ug tigtudyok sa mga igos sa kahoyng sikomoro.” (Amos 7:14) Bisan pa niana, si Amos wala magpanuko sa pagpahayag sa mensahe ni Jehova sa paghukom batok sa nagasimbag-baka nga saserdote nga si Amazias. (Amos 7:16, 17) Dili gayod nato kalimtan nga kita nagabuhat sa buluhaton sa Diyos ug nga siya magsangkap kanato aron mahimong kuwalipikado sa buluhaton nga iyang gihatag kanato.—2 Tim. 3:17.
5. Nganong angay kitang maningkamot nga makasugod ug usa ka pagtuon sa Bibliya bisan pag puliki ang atong kinabuhi?
5 Puliki nga kinabuhi: Bisan pag puliki ang imong kinabuhi, lagmit naggahin ka gayod ug panahon aron regular nga makasangyaw. Ang pagdumalag pagtuon sa Bibliya maoy usa sa labing makalilipay nga bahin sa ministeryo. Usa ka talagsaong kahigayonan ang pagkakita nga ang Pulong ni Jehova nakahatag ug kaayohan sa kinabuhi sa usa ka tawo. (Heb. 4:12) Malipay si Jehova kon mohimo kitag mga sakripisyo aron tabangan ang usa nga “makadangat sa tukmang kahibalo sa kamatuoran.” (1 Tim. 2:4) Malipay usab ang mga manulonda dihang maghinulsol ang usa gikan sa kanhi niyang mga buhat ug mouswag sa espirituwal.—Luc. 15:10.
6. Unsang talagsaong pribilehiyo ang atong nabatonan diha sa pagtuman sa kabubut-on sa Diyos?
6 “Kabubut-on [sa Diyos] nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Pagkatalagsaon sa atong pribilehiyo nga mobuhat uyon sa kabubut-on sa Diyos, nga dili gayod magpanuko sa pagdumalag mga pagtuon sa Bibliya!