Hupaya ang mga Gun-ob ug Kasingkasing
1 Sa tibuok kasaysayan sa tawo, wala pa gayoy sama niini ka dakong panginahanglan alang sa paghupay. Ingong pagsunod sa atong Hari, si Jesu-Kristo, kita usab maningkamot sa “pagbugkos sa mga may gun-ob nga kasingkasing.”—Isa. 61:1.
2 Pamaagi: Aron mahupay ang katawhan, kinahanglang timbang ug makapadasig ang atong presentasyon diha sa ministeryo. Kon dili kita magsigeg hisgot ug daotang panghitabo sa kalibotan ug bakak nga mga pagtulon-an, mahatagan natog dugang panahon ang paghisgot ug Kasulatanhong mga kamatuoran bahin sa masanagong paglaom sa makapahupayng mga saad sa Diyos. Apan wala kini magpasabot nga dili na kita mohisgot bahin sa Armagedon. Ang atong buluhaton mao ang pagmantala “sa tuig sa maayong kabubut-on sa bahin ni Jehova ug sa adlaw sa panimalos sa bahin sa atong Diyos,” ug maingon man usab sa “pagpasidaan sa daotan gikan sa iyang daotang dalan.” Apan, ang pasidaan bahin sa Armagedon ug ang paghubit sa kagun-oban niini dili angayng magpahanap sa tema sa maayong balita sa gingharian sa Diyos.—Isa. 61:2; Ezeq. 3:18; Mat. 24:14.
3 Sa Pagpamalaybalay: Sagad makahibalag kitag mga tawong masulub-on tungod sa sakit, kamatayon sa usa ka minahal, mga inhustisya, o mga suliran sa panginabuhi. Ingong pagsundog kang Kristo, kita ‘mobatig kaluoy’ ug mosimpatiya sa mga tawo nga atong mahibalag diha sa ministeryo. (Luc. 7:13; Roma 12:15) Bisan pag mopaambit kitag usa o duha ka teksto nga may kalambigitan sa problema, angay kitang “magmaabtik sa pagpaminaw,” sa ingon niini ikapahayag sa tagbalay ang iyang gibati. (Sant. 1:19) Mas andam kitang mohatag ug paghupay human nato siya paminawi.
4 Sa nahiangayng panahon diha sa panaghisgot, mahimong moingon kita, “Buot nakong ipaambit kanimo kining makapadasig nga mga pulong gikan sa Bibliya.” Kinahanglang magbaton kitag maayong panghukom nga dili kita makiglalis kon ang tagbalay mosulti sa iyang sayop nga mga panlantaw. Hinuon, ang atong tumong mao ang paghupay ug pagdasig ginamit ang Kasulatan aron sa paglig-on sa kasingkasing. Makatabang niini ang librong Nangatarongan Pinasukad sa Kasulatan sa mga panid 313-317 ubos sa ulohang “Pagpalig-on.” Mahimo usab natong hatagag tract nga Kahupayan Alang sa Naluya ug hisgoti ang makapadasig nga punto niana.
5 Pangitag mga Kahigayonan sa Paghupay sa Uban: Duna ka bay nahibaloan nga silingan, kauban sa trabaho, eskolmet o membro sa pamilya nga nanginahanglag paghupay? Nganong dili man nimo paningkamotan nga maduaw sila uban ang tumong sa pagpaambit sa kahupayan gikan sa Kasulatan? Ang pagkasayod sa hinungdan sa ilang kagul-anan, makatabang kanimo kon ikaw na ang moatubang sa maong kahimtang. Ang pipila mipadala ug mga sulat o kaha mitawag sa telepono. Ang tinuod nga gugma sa isigkatawo magpalihok kanato sa pagpakitag inigsoong pagbati ug sa pagtaganag kahupayan gikan sa Kasulatan.—Luc. 10:25-37.
6 Oo, kita gisugo sa paghupay niadtong mga nagbangotan, sa paglipay sa mga magul-anog kasingkasing, ug sa pagsilsil sa masanagong paglaom sa umaabot. Mao kini ang paghupay nga gikinahanglan sa katawhan sa tibuok kalibotan. Ang malipayong pagpakig-ambit sa mga butang nga gisaad sa Diyos makahatag ug kahupayan ug paglaom sa mga matinud-anog kasingkasing. Hinaot dili nato kalimtan ang kahinungdanon sa pagbugkos sa mga may gun-ob nga kasingkasing.