Kon ang Tagbalay Lahig Pinulongan
1. Nganong adunay dakong panginahanglan sa kooperasyon sa dihang magsangyaw sa usa ka teritoryo?
1 Nagkadaghan ug nagkasubsob ang mga higayon nga ang mga magmamantala makakaplag ug interesadong mga tawo diha sa ilang teritoryo nga lahig pinulongan. Aron matabangan silang mouswag sa espirituwal, daghang sanga nagtukod ug mga grupo ug mga kongregasyon nga langyaw ug pinulongan. Sanglit ubay-ubay tingaling pinulongan ang gisulti diha sa usa ka lugar, mahimong ubay-ubayng kongregasyon usab nga lainlaig pinulongan ang magsangyaw nianang teritoryoha. Unsang kooperasyon ang angayng himoon sa mga kongregasyon aron maayong pagkadumala ang pagsangyaw nianang dapita?—1 Cor. 14:33.
2. Sa dihang mamalaybalay, sa unsang paagi makigkooperar kita sa mga grupo o kongregasyon nga langyaw ug pinulongan nga nagsangyaw usab diha sa atong teritoryo?
2 Maayong Kooperasyon: Sa dihang magsangyaw diha sa kadalanan o sa di-pormal nga paagi, ang usa ka magmamantala dili angayng magpanuko sa pagduol kang bisan kinsa, lakip niadtong nagsultig laing pinulongan, ug magtanyag ug basahon diha sa pinulongan nga gustong basahon nianang tawhana. Apan sa dihang mamalaybalay sa teritoryo nga gisangyawan usab sa laing grupo o kongregasyon, ang magmamantala kinahanglang magduaw lamang sa mga tawo nga nagsulti sa pinulongan sa kongregasyon nga iyang gipasakopan. Kon lainlaing kongregasyon ang nagsangyaw sa samang teritoryo, hinungdanon gayod ang paghupot ug maayong rekord. Kinahanglang mag-estorya pag-ayo ang mga magtatan-aw sa pag-alagad ug mohimog mga kahikayan nga mapuslanon sa tanan. (Prov. 11:14) Apan kon ang usa ka magmamantala dunay masangyawan nga lahig pinulongan ug walay duol nga mga kongregasyon nianang pinulongana, kinahanglang maningkamot siya sa pagpamatuod kaniya ug pag-atiman sa iyang interes.
3. Unsay angay natong himoon kon dunay mga magmamantala sa laing grupo o kongregasyon nga nagsangyaw sa teritoryo nga atong gikobrehan sa samang adlaw?
3 Samang Buluhaton: Unsay angayng himoon kon ang mga magmamantala sa lainlaing kongregasyon dungang magsangyaw sa usa ka teritoryo sa samang adlaw? Siyempre, ang Kristohanong gugma maoy angayng mopatigbabaw sa bisan unsang pinulongan, ug ang tanan angayng magmahunahunaon sa mga panginahanglan sa mga tawo diha sa teritoryo. (Juan 13:34, 35) Busa, ang mga nagapanguna angayng magmakataronganon ug magpasundayag ug gugma sa pagdesisyon kon kinsang grupoha ang mobiya ug mosangyaw sa laing teritoryo.—Sant. 3:17, 18.
4. Unsang tagna ang nagakatuman karon?
4 Ang Bibliya nagtagna nga ang mga tawo nga lainlaig pinulongan makadungog sa maayong balita. (Pin. 14:6, 7) Pinaagig maayong kooperasyon, mas daghang bag-ong mga tawo ang masangyawan, lakip na ang mga nagsultig laing pinulongan, ug malikayan nga masangyawan pag-usab ang mao ra gihapong balay nga nasangyawan na sa laing kongregasyon.—Efe. 4:16.