Pagpakigkooperar sa Pagsangyaw sa Teritoryo nga Lainlaig Pinulongan

Ang mga tawo sagad mas andam maminaw sa mensahe sa Gingharian kon madunggan nila kini sa ilang pinulongan. Kini tingali ang rason nga sa Pentekostes 33 C.E. gihikay ni Jehova nga ang ‘masimbahong mga Hudiyo gikan sa matag nasod nga ilalom sa langit’ makadungog sa maayong balita sa ilang “kaugalingong pinulongan,” bisan pag makasulti silag Hebreohanon o Grego. (Buh 2:5, 8) Karon, sa mga lugar nga lainlaig pinulongan, ang mga kongregasyon nga nagtigom diha sa lainlaing pinulongan basig parehas rag teritoryo nga sangyawan. Sa unsang paagi ang mga magmamantala sa maong mga kongregasyon magtinabangay nga masangyawan ang tanan ug malikayan ang subsob o dungan nga pagkobre sa teritoryo nga lagmit makapasuko sa mga tagbalay?

• 

  Pangonsulta (Pr 15:22): Ang mga tigdumala sa pag-alagad angayng magkonsultahay ug magsabot nga mohimog maayong sistema sa pagsangyaw sa maayong balita. Kon gamay ra ang teritoryo sa mga kongregasyon nga nagsangyaw sa laing pinulongan, lagmit gusto nila nga sayloan ninyo ang mga balay niadtong nagsulti sa maong pinulongan. Apan kon dili nila regular nga makobrehan ang tanan nilang teritoryo kay kini nagkatag diha sa dakong teritoryo, mas gusto tingali nila nga wala moy laktawan nga balay ug pahibaloon sila kon dunay interesado sa ilang teritoryo. (od 93 ¶37) O hangyoon tingali nila ang inyong kongregasyon nga motabang sa pagpangitag mga tawo nga nagsulti sa pinulongan sa ilang kongregasyon, ug ihatag kanila ang adres sa maong mga tawo. (km 7/12 5, kahon) Hinumdomi nga usahay, ang mga nagpuyo sa usa ka balay lainlaig pinulongan. Ang mga kahikayan sa pagkobre sa teritoryo angayng subay sa mga balaod nga naghatag ug restriksiyon bahin sa paggamit sa impormasyon sa mga residente.

• 

  Pakigkooperar (Efe 4:16): Sunda pag-ayo ang bisan unsang instruksiyon sa inyong tigdumala sa pag-alagad. Naa ba kay Bible study nga mas gustong magtuon gamit ang pinulongan nga lahi sa pinulongan sa imong kongregasyon? Mas paspas tingali ang pag-uswag sa estudyante kon ibalhin ang pagtuon ngadto sa duol nga kongregasyon o grupo nga nagsulti sa iyang pinulongan.

• 

  Pangandam (Pr 15:28; 16:1): Kon ang tagbalay sa inyong teritoryo lahig pinulongan, paningkamoti nga masangyawan siya sa maayong balita. Aron makapangandam ka, sayra kon unsang mga pinulongan ang gigamit sa inyong teritoryo ug pag-download ug Bibliya ug mga video sa lainlaing pinulongan. Puwede sab nimong gamiton ang JW Language app aron makakat-on ka kon unsaon pagtimbaya sa pipila ka pinulongan.