Atong Pukanon ang Lig-ong Pagkatarok nga mga Butang
1 Sulod sa daghang siglo, gibutaan ni Satanas ang mga hunahuna sa daghang tawo pinaagi sa bakak nga mga pagtulon-an ug panglimbong. Gipakaylap niya ang mga doktrina sama sa Trinidad, dili-mamatay nga kalag, ug impiyerno. Iyang gipasiugda ang pagduhaduha bahin sa paglungtad sa Maglalalang ug sa pagkatinuod sa Bibliya. Ang rasismo ug nasyonalismo maoy laing mga babag nga nagpugong sa mga tawo sa pagdawat sa kamatuoran. (2 Cor. 4:4) Sa unsang paagi atong mapukan ang maong lig-ong pagkatarok nga mga tinuohan?—2 Cor. 10:4, 5.
2 Nalangkit ang mga Pagbati: Ang dugay nang gihuptang relihiyosong mga tinuohan kasagarang naglangkit sa kinailadmang mga pagbati sa usa ka tawo. Gihuptan na sa uban ang sayop nga mga pagtulon-an sukad pa pagkabata. Aron matabangan sila, kinahanglang mosulti kita kanila sa paagi nga nagpakitag pagtahod sa ilang punto debista.—1 Ped. 3:15.
3 Atong ikapakita ang pagtahod sa maong mga indibiduwal pinaagi sa pagtugot kanila sa pagpatin-aw kon unsay ilang gituohan ug kon ngano. (San. 1:19) Tingali nagtuo sila nga dili mamatay ang kalag tungod kay namatyan silag minahal sa kinabuhi ug naghandom nga makita sila pag-usab. O nagsaulog tingali silag mga pangilin tungod kay gusto nilang pahimuslan ang mga kahigayonan nga makauban ang ilang pamilya. Ang pagpamati kanila motabang kanato sa pagsabot sa ilang mga pagbati ug pagsanong sa epektibong paagi.—Prov. 16:23.
4 Sundoga si Jesus: Si Jesus naghatag ug maayong panig-ingnan kanato sa dihang iyang gitubag ang usa ka lalaki nga batid sa Balaod. Si Jesus wala mohatag ug direktang mga tubag, nga lagmit gisalikway sa maong lalaki tungod kay nakagamot na sa iyang kasingkasing ang maong mga pagtuo. Hinunoa, gipunting ni Jesus ang Kasulatan, giawhag siya sa pagpahayag sa iyang opinyon, ug gitabangan siya sa pagpangatarongan pinaagig usa ka ilustrasyon.—Luc. 10:25-37.
5 Ang Pulong sa Diyos makatabang sa mga tawo sa pagsalikway sa bakak nga relihiyosong mga pagtulon-an. (Heb. 4:12) Kon mapailobon natong isaysay kanila ang kamatuoran, ato silang matabangan sa pagsalikway sa kabakakan ug pagdawat sa kamatuoran nga makahatag kanilag kagawasan.—Juan 8:32.