Pagbuntog sa Hagit sa Pagsangyaw Ngadto sa mga Lalaki
1. Unsa ang dinaliang panginahanglan karon maylabot sa pag-atiman sa intereses sa Gingharian?
1 Samtang nagpadayon sa pag-uswag ang buluhaton sa Gingharian niining kataposang mga adlaw, adunay dinaliang panginahanglan alang sa kuwalipikado sa espirituwal nga mga lalaki nga manguna sa buluhaton. (Mar. 4:30-32; Buh. 20:28; 1 Tim. 3:1-13) Apan, sa pipila ka dapit mas gamay ra ang mga lalaki kay sa mga babaye nga midawat sa mensahe sa Gingharian. Sa pipila ka kultura, ang mga lalaki mibati nga ang ilang asawa mao ang responsable sa pagtudlo sa ilang mga anak sa espirituwal nga mga butang. Unsaon nato pagdasig ang mas daghang lalaki nga magmahunahunaon sa ilang espirituwal nga mga panginahanglan ug moduyog kanato diha sa matuod nga pagsimba?
2. Unsa ang maayong resulta sa pagsangyaw ni Pablo ug Pedro sa mga lalaki?
2 Pagsangyaw Ngadto sa mga Lalaki: Sa dihang dawaton sa usa ka ulo sa pamilya ang kamatuoran, kasagaran maimpluwensiyahan niya ang ubang membro sa iyang pamilya sa pagduyog kaniya sa putli nga pagsimba. Pananglitan, sa dihang napriso tungod sa ilang pagsangyaw, gisangyawan ni Pablo ug Silas ang usa ka guwardiya. Ang maong lalaki ug ang iyang tibuok pamilya nabawtismohan. (Buh. 16:25-34) Ingong resulta sa pagsangyaw ni Pablo sa Corinto, “si Crispo nga nagadumalang opisyal sa sinagoga nahimong magtutuo sa Ginoo, ug ingon man usab ang iyang tibuok panimalay.” (Buh. 18:8) Si Pedro gigamit ni Jehova sa pagsangyaw kang Cornelio, usa ka opisyal sa kasundalohan nga gihubit ingong “usa ka debotadong tawo ug usa nga mahadlokon sa Diyos.” Si Cornelio, uban sa iyang mga paryente ug suod nga mga higala, nabawtismohan.—Buh. 10:1-48.
3. Agig pagsundog kang Felipe, kinsa “nga anaa sa hataas nga katungdanan” ang mahimo nimong sangyawan?
3 Ang pagsangyaw ngadto sa mga lalaki “nga anaa sa hataas nga katungdanan” lagmit adunay dakong epekto. (1 Tim. 2:1, 2) Pananglitan, ang manulonda ni Jehova nagsugo kang Felipe sa pagpakigsulti sa “usa ka tawong anaa sa gahom” kinsa gitugyanan sa tanang bahandi sa rayna sa Etiopia. Nadunggan ni Felipe ang maong lalaki nga “nagbasa sa makusog sa basahon sa manalagnang si Isaias” ug iyang gisaysay kaniya ang maayong balita bahin kang Jesus. Kining maong Etiopianhon nahimong tinun-an ug lagmit nagpakaylap sa maayong balita samtang nagpaingon sa iyang yutang natawhan. Lagmit nga iyang gisangyawan usab ang rayna ug ang uban pa diha sa palasyo, mga tawo nga wala kaayoy kahigayonan nga makadungog sa maayong balita.—Buh. 8:26-39.
4. Sa unsang paagi kita makahatag ug dugang kahigayonan sa mga lalaki nga makadungog sa maayong balita?
4 Pagsangyaw sa Mas Daghang Lalaki: Sanglit ang mga lalaki kasagaran nagtrabaho sa maadlaw, mahimo ba nimong ipasibo ang imong eskedyul aron makagahin ug mas daghang panahon sa pagsangyaw sa magabii, sa mga hinapos sa semana, o sa mga pista opisyal? Ang regular nga pagkobre sa mga dapit negosyohanan maghatag kanimo ug dugang kahigayonan nga makasangyaw sa mga lalaki nga kanunayng wala sa balay. Ang mga brader makahimo usab ug linaing paningkamot sa pagsangyaw sa ilang kaubanan sa trabaho nga mga lalaki sa di-pormal nga paagi. Diha sa balay ug balay nga pagsangyaw, ilabina sa teritoryo nga kanunayng makobrehan, ang mga brader mahimong mohangyo usahay sa pagpakig-estorya sa lalaki nga anaa sa balay.
5. Unsay angayng buhaton sa usa ka sister kon siya makasangyaw ug usa ka lalaki nga interesado sa mensahe sa Gingharian?
5 Dili angayng mag-inusara ang usa ka sister sa dihang mobalikduaw ngadto usa ka interesadong lalaki. Mahimo niyang iuban ang iyang bana o kaha laing magmamantala. Kon makita ang pag-uswag sa maong lalaki, labing maayo nga ipasa kini ngadto sa usa ka kuwalipikadong brader.
6. Sa unsang paagi atong masundog si apostol Pablo aron ‘makabig ang labing daghang tawo’?
6 Pagpilig mga Topiko nga Makapainteres sa mga Lalaki: Gitagad ni apostol Pablo ang kahimtang sa iyang mamiminaw ug gipahiuyon niana ang iyang mga paagi sa pagsangyaw aron ‘makabig ang labing daghang tawo.’ (1 Cor. 9:19-23) Angay usab natong hunahunaon daan ug pangandaman ang mga topiko nga lagmit makapainteres sa mga lalaki nga mahimo natong mahibalag. Pananglitan, ang mga lalaki kasagaran gustong makighisgot bahin sa problema sa ekonomiya, maayong panggobyerno, ug maylabot sa kaluwasan ug seguridad sa ilang pamilya. Tingali interesado usab sila bahin sa katuyoan sa kinabuhi, sa kaugmaon sa yuta, ug kon nganong gitugotan sa Diyos ang pag-antos. Ang mga tawo mas mosanong sa atong presentasyon sa mensahe sa Gingharian kon kini atong ipahiuyon sa ilang kahimtang.—Prov. 16:23.
7. Sa unsang paagi ang tanan diha sa kongregasyon makatabang sa dili-magtutuong mga bana nga motambong sa tigom?
7 Pagtabang sa Dili-Magtutuo nga mga Bana: Dako gayod ug impluwensiya ang maayong panggawi sa Kristohanong mga babaye ngadto sa ilang dili-magtutuong mga bana, apan aduna usay ikatabang ang mga membro sa kongregasyon. (1 Ped. 3:1-4) Sa dihang ang dili-magtutuong bana motambong sa tigom uban sa iyang asawa, ang mahigalaong pag-abiabi kaniya sa kongregasyon makahatag ug maayong pamatuod. Ang iyang pagtambong lagmit nagpakita nga siya adunay gamayng interes sa kamatuoran, ug basin andam siyang modawat ug pagtuon sa Bibliya.
8. Sa unsang paagi ang mga brader makatabang sa dili-magtutuong mga bana nga nagpakitag gamayng interes sa kamatuoran?
8 Sa laing bahin, dunay pipila ka bana nga sa sinugdan dili kaayo interesado sa Bibliya, apan sa ngadtongadto andam nang makighisgot niini uban sa brader nga nasuod kanila. Ang mga brader sa usa ka kongregasyon mihimog linaing paningkamot sa matag higayon nga sila moduaw sa usa ka pamilya nga nabahin sa relihiyon. Sila naningkamot sa pagpakighisgot sa dili-magtutuong bana bahin sa mga butang nga gikainteresan niini. Kini sa ngadtongadto mitultol sa panaghisgot sa espirituwal nga mga butang, ug karon siya bawtismado na. Sa laing kahimtang, gitabangan sa usa ka brader ang usa ka mahigalaon, dili-magtutuong bana sa pagkoral sa ilang balay. Tungod sa gipakitang personal nga interes, nasugdan ang usa ka pagtuon sa Bibliya. (Gal. 6:10; Filip. 2:4) Kon ikaw usa ka Kristohanong lalaki, nganong dili maningkamot sa pagtabang sa usa o kapin pang dili-magtutuong bana?
9. Unsay mahimong resulta sa pagbansay ug Kristohanong mga lalaki?
9 Pagbansay Kanila Alang sa Umaabot: Ang mga lalaki nga mosanong sa mensahe sa Gingharian ug mangab-ot ug mga pribilehiyo diha sa pag-alagad kang Jehova basin sa umaabot mahimong usa sa “mga gasa nga mga lalaki,” Kristohanong mga ansiyano kinsa naggamit sa ilang mga katakos ug kusog alang sa mga kongregasyon sa mga alagad ni Jehova. (Efe. 4:8; Sal. 68:18) Kini nga mga lalaki kinabubut-on ug madasigong nag-atiman sa kongregasyon. (1 Ped. 5:2, 3) Pagkadakong panalangin sila alang sa tibuok kapunongan sa mga igsoon!
10. Sa unsang paagi ang paningkamot ni Ananias sa pagtabang kang Pablo nakahatag ug kaayohan sa daghan?
10 Pananglitan, si Saulo nahimong “usa ka apostol alang sa kanasoran,” bisan pag usa siya ka maglulutos kanhi sa mga Kristohanon. (Roma 11:13) Kana ang hinungdan kon nganong ang tinun-an nga si Ananias sa sinugdan nagpanuko sa pagsangyaw kang Saulo. Bisan pa niana, gisunod ni Ananias ang sugo sa Ginoo ug nakigsulti sa maong lalaki nga sa ulahi nahimong si apostol Pablo. Sulod sa daghang katuigan, ang ministeryo ni Pablo nakahatag ug kaayohan sa linibo ka tawo nga nakadungog sa iyang pagsangyaw maingon man sa minilyon karon nga padayong nakabenepisyo gikan sa iyang mga sulat nga narekord sa Pulong sa Diyos.—Buh. 9:3-19; 2 Tim. 3:16, 17.
11. Nganong angay kitang mohimo sa gikinahanglang mga kausaban aron makasangyaw sa mga lalaki?
11 Busa hinaot nga kita mohimo sa gikinahanglang mga kausaban aron makasangyaw ngadto sa mga lalaki. Sa pagbuhat niana, kita makasalig nga panalanginan ni Jehova ang atong makugihong mga paningkamot sa pagbuhat sa iyang kabubut-on ug sa pag-atiman sa intereses sa Gingharian.