Makatabang Ka bag Dili Magtutuong Kapikas?
1. Nganong interesado usab ang kongregasyon sa pagtabang sa dili magtutuong mga kapikas nga makadangat sa kamatuoran?
1 May mga magmamantala ba sa inyong kongregasyon nga dunay dili magtutuong kapikas? Kon mao, buot gayod nilang mahiusa kanila ang ilang mga kapikas sa matuod nga pagsimba. Apan dili kay sila ra ang buot niini. Sama sa Diyos, buot sa tibuok kongregasyon nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Sa unsang paagi atong matabangan ang dili magtutuong mga kapikas sa atong mga igsoon?
2. Unsay angay natong konsiderahon aron atong matabangan ang dili magtutuong kapikas?
2 Una, paningkamotan natong masabtan ang panglantaw sa dili magtutuong kapikas. Daghan kanila ang nagmahal gayod sa ilang pamilya ug naningkamot nga mahimong maayong kapikas ug ginikanan. Tingali lahi lang silag relihiyosong panglantaw. Basin ang ilang nahibaloan bahin sa mga Saksi ni Jehova mao lang kanang gisulti sa ilang mapihigong mga kaila nga sagad dili tukma. Ang uban masuko kay ang panahon nga gigugol kaniadto sa ilang kapikas uban sa pamilya, gigugol na sa pagsimba. Ang pagkonsiderar sa mga kahimtang nga susama niini makatabang kanato sa pagtratar sa dili magtutuong kapikas sa maluloton ug matinahorong paagi ug malikayan natong sobra ra ka nerbiyoso dihang makig-estorya kaniya.—Prov. 16:20-23.
3. Unsa tingali ang labing epektibong paagi sa pagdani sa dili magtutuong kapikas?
3 Personal nga Interes: Tingali ang unang labing epektibong paagi sa pagdani sa dili magtutuong kapikas ngadto sa kamatuoran mao ang pagpakitag maayong panggawi, dili ang paghisgot sa Bibliya. (1 Ped. 3:1, 2) Bahin niini, hinungdanon ang pagpakitag personal nga interes. Ang mga sister sa kongregasyon makapakitag personal nga interes ngadto sa dili magtutuong asawa, samtang ang mga brader ngadto sa dili magtutuong bana. Sa unsang paagi?
4. Sa unsang paagi atong ikapakita ang personal nga interes?
4 Kon wala pa nimo mahimamat ang dili magtutuong kapikas, mahimong konsultahon una nimo ang Kristohanong kapikas. Ayawg kaguol kon dili siya maayog tinagdan sa sinugdan. Ang atong pagkamahigalaon ug pagpakitag personal nga interes basin makapausab sa iyang tinamdan sa mga Saksi. (Roma 12:20) Ang ubang hamtong nga mga igsoon nagdapit sa usa ka dili magtutuong kapikas uban sa iyang pamilya sa pagpangaon aron mas mailhan pa siya ug mawala ang iyang dili maayong impresyon sa mga Saksi. Ilang giestoryahan ang iyang mga hilig imbes ang Bibliya. Sa ulahi, kon mas komportable na siya, mahimong nang hisgotan ang Bibliya. Basin motambong siya kon atong dapiton sa tigom aron iyang makita ang ginatun-an sa iyang kapikas, ilabina kay duna na siyay kaila sa kongregasyon. Bisag dili pa siya andam mosusi sa kamatuoran, angay siyang dayegon tungod sa iyang pagpaluyo sa iyang magtutuong kapikas.
5. Sa unsang paagi matabangan sa mga ansiyano ang dili magtutuong kapikas?
5 Ang mga ansiyano angayng magmaalisto sa pagpangitag paagi nga masangyawan ug matabangan ang dili magtutuong kapikas. Kon ang dili magtutuo wala mosanong sa panaghisgot sa Bibliya kaniadto, basin maminaw na siya sa Kasulatanhong pagdasig kon siya naospital o nakaagom ug grabeng suliran sa panglawas. Kon mamatyag membro sa pamilya, mahimong dapiton sa mga ansiyano ang dili magtutuong kapikas sa dihang sila mohatag ug paghupay.
6. Nganong maningkamot kitang makatabang sa dili magtutuong mga kapikas?
6 Pagkamalipayon gayod sa atong igsoon kon ang iyang dili magtutuong kapikas makadangat sa kamatuoran! Dayag nga malipay usab si Jehova, ang mga manulonda, ug ang tibuok kongregasyon. (Luc. 15:7, 10) Apan kon ang dili magtutuong kapikas dili mosanong sa sinugdan, malipay gihapon kita kay ang atong paningkamot nakapahimuot kang Jehova, kinsa “wala magtinguha nga adunay malaglag apan nagtinguha nga ang tanan makakab-ot sa paghinulsol.”—2 Ped. 3:9.
[Blurb sa panid 6]
Tingali ang unang labing epektibong paagi sa pagdani sa dili magtutuong kapikas ngadto sa kamatuoran mao ang pagpakitag maayong panggawi, dili ang paghisgot sa Bibliya