Kuwalipikado ba Akong Mosangyaw?
1. Nganong dili kita angayng mobati nga dili kuwalipikadong mosangyaw?
1 Kon nakapangutana ka niini, ayawg kabalaka! Dili ang sekular nga edukasyon nga atong nakab-ot o ang atong talagsaong kinaiyanhong katakos ang maghimo kanatong kuwalipikado ingong mga ministro. Ang uban sa mga tinun-an sa unang siglo gihubit ingong “dili-edukado ug ordinaryo.” Apan sila maoy epektibong mga magwawali sa maayong balita tungod kay ilang gisunod pag-ayo ang panig-ingnan ni Jesus.—Buh. 4:13; 1 Ped. 2:21.
2. Sa unsang paagi nanudlo si Jesus?
2 Kon sa Unsang Paagi Nanudlo si Jesus: Ang iyang pagpanudlo maoy simple, praktikal, ug daling masabtan. Ang iyang mga pangutana, ilustrasyon, ug yanong mga introduksiyon nakapainteres sa iyang mga mamiminaw. (Mat. 6:26) Siya interesado gayod sa mga tawo. (Mat. 14:14) Dugang pa, si Jesus misulti nga may pagsalig ug awtoridad kay nahibalo siya nga si Jehova maoy nagsugo ug naghatag kaniyag katakos sa pagtuman sa iyang buluhaton.—Luc. 4:18.
3. Sa unsang paagi si Jehova nagtabang kanato sa pagpalampos sa atong ministeryo?
3 Si Jehova Nagtabang Kanato: Kita gibansay sa atong Dakong Instruktor pinaagi sa iyang Pulong ug organisasyon aron molampos kita sa pagwali sa maayong balita. (Isa. 54:13) Kay gitipigan man ni Jehova ang rekord sa pagpanudlo ni Jesus, kita makahimo sa pagtuon ug pagsundog sa iyang mga paagi. Si Jehova nagtabang kanato pinaagi sa iyang balaang espiritu ug nagbansay kanato pinaagi sa mga tigom sa kongregasyon. (Juan 14:26) Dugang pa, siya naghatag ug hanas nga mga magmamantala nga makatabang kanato nga mahimong mas epektibo.
4. Nganong angay kitang mobati nga kuwalipikadong mosangyaw sa maayong balita ngadto sa uban?
4 Angay kitang mobati nga kuwalipikadong mosangyaw kay ang Diyos maoy naghimo kanatong kuwalipikado. (2 Cor. 3:5) Samtang mosalig kita kang Jehova ug pahimuslan pag-ayo ang iyang mga tagana, kita “mahimong takos gayod, bug-os nga masinangkapan alang sa tanang maayong buhat.”—2 Tim. 3:17.