Kinsa ang Takos sa Pagsangyaw?
1 Bahin sa ministeryo, mibati ka ba sukad nga sama kang Moises? Siya miingon: “Pasayloa ako, Jehova, apan dili ako batid manulti, dili bisan kagahapon ni sa wala pa niana ni bisan sukad nga ikaw misulti sa imong ulipon.” (Ex. 4:10) Kon gibati mo ang samang paagi, mahimong magduhaduha ka. Apan, si Jesus “nagsugo kanato nga magwali ngadto sa katawhan ug maghatag ug bug-os nga pagsaksi.” (Buh. 10:42) Busa sa unsang paagi kita mahimong takos nga mga magwawali?
2 Dili ang atong sekular nga edukasyon ang magpahimong takos nato alang sa ministeryo. Si Pablo miingon nga “dili daghan nga maalamon sa paaging unodnon ang gitawag.” (1 Cor. 1:26) Gipili ni Jesus ang iyang mga apostol taliwala sa matang sa mga mamumuo—upat maoy mga mangingisda. Ang mapahitas-ong relihiyosong mga lider nag-isip kanila ingong “mga tawong dili-edukado ug ordinaryo.” Hinukman sa kalibotanong mga sukdanan, ang mga apostol maoy dili takos sa pagsangyaw. Apan, ang batid nga pakigpulong ni Pedro nga gipahayag sa adlaw sa Pentekostes mipalihok sa 3,000 aron mabawtismohan!—Buh. 2:14, 37-41; 4:13.
3 Si Jehova Magpahimong Takos Nato sa Pagsangyaw: Si Pablo mipadayag: “Ang among pagkaigong kuwalipikado nagagikan sa Diyos.” (2 Cor. 3:5) Si Jehova nakatudlo sa minilyon aron sa pagsangyaw sa kamatuoran sa Gingharian ngadto sa uban. (Isa. 54:13) Ang pagkaepektibo niining buluhatona madayag diha sa 338,491 kinsa nabawtismohan sa miaging tuig ingong buhing “mga sulat sa rekomendasyon.”—2 Cor. 3:1-3.
4 Ang organisasyon sa Diyos nakatukod ug usa ka tibuok-kalibotang programa sa pagbansay alang sa mga ministro. Pinaagi sa Kasulatan ug daghang tabang sa pagtuon sa Bibliya, kita ginabansay aron mahimong “bug-os makasarang, kompleto nga masinangkapan” sa pagsangyaw. (2 Tim. 3:16, 17) Daghan ang nadani sa kinaadmang makaplagan diha sa mga publikasyon sa Sosyedad. Pananglitan, usa ka mantalaan sa Sweden misaysay: “Luyo sa pagtuo nga ginasangyaw sa mga Saksi ni Jehova adunay usa ka kahibulongang taas-matang ug tibuok-kalibotang pagkasentro sa Bibliyang siyensiyang [kinaadman].”
5 Pinaagig pagtultol nga ginatagana sa atong lima ka senemanang tigom, ang atong programa sa pagbasa ug pagtuon sa Bibliya, pagtambag diha sa Teokratikanhong Tunghaan sa Ministeryo, personal nga tabang sa uban kinsa batid nga mga ministro, ug labaw sa tanan, ang pagpaluyo sa balaang espiritu ni Jehova, kita masaligon nga isipon kita ni Jehova ingong bug-os nga takos sa pagsangyaw.—2 Cor. 2:17.
6 Kon pahimuslan ta sa bug-os ang pagbansay nga gitagana pinaagi sa organisasyon sa Diyos, wala kitay katarongang magduhaduha. Mahimong mangayaon kitang mosangyaw sa uban, masaligon nga si Jehova magapanalangin sa atong mga panikaysikay.—1 Cor. 3:6.