“Bug-os nga Pagpamatuod” sa Gingharian sa Diyos
1. Unsay tun-an sa Pagtuon sa Kongregasyon sa Bibliya sugod sa semana sa Marso 14?
1 Sa semana sa Marso 14, 2011, ang mga kongregasyon nga Cebuano, Hiligaynon, Iloko, ug Tagalog magtuon sa librong “Bug-os nga Pagpamatuod” sa Gingharian sa Diyos sa Pagtuon sa Kongregasyon sa Bibliya. (Matikdi: ang Bicol, Pangasinan, ug Waray-Waray magtuon sa librong Pakigsuod Kang Jehova segun sa gipahibalo sa Nobyembre nga Atong Ministeryo sa Gingharian.) Kini nga libro nagkobre sa basahon sa Mga Buhat sa paagi nga ang magbabasa maikag sa kulbahinam nga mga asoy niini. Inay bersikulo por bersikulo nga paghisgot, ang librong Pagpamatuod nagtudlog mga leksiyon gikan sa asoy sa Mga Buhat ug nagtabang kanato sa pagpadapat niana.—Roma 15:4.
2. Isaysay ang pipila ka bahin sa librong Pagpamatuod.
2 Mga Bahin sa Libro: Ang introduksiyon sa panid 2 maoy makapadasig nga sulat sa Nagamandong Lawas nga naghisgot sa ilang tinguha nga kita makapahimulos niini nga libro. Sugod sa kapitulo 2, makita ang pangunang ideya sa matag kapitulo ug ang mga teksto diha sa Mga Buhat nga pagahisgotan. Daghan sa mga kapitulo dunay mga kahon nga naghatag ug impormasyon bahin sa mga tawo, dapit, ug panghitabo. Adunay espasyo sa kilid nga kasulatag nota. Ang tibuok libro adunay detalyado kaayong mga hulagway sa esena sa Bibliya nga motabang kanato sa paghanduraw sa hinungdanong mga panghitabo, ug sa kataposang panid adunay indise sa mga hulagway nga naghatag ug impormasyon sa matag hulagway. Ang sulod nga bahin sa atubang ug likod nga hapin adunay mapa aron atong masundan ang panaw sa mga isigkamagsisimba sa unang siglo sa dihang sila nagwali sa maayong balita “hangtod sa kinalay-ang dapit sa yuta.”—Buh. 1:8.
3. Unsang hinungdanong mga pangutana ang pagatubagon sa pagtuon sa basahon sa Mga Buhat?
3 Tubag sa Hinungdanong mga Pangutana: Ang pagtuon sa basahon sa Mga Buhat motabang kanato nga tin-awng masabtan ang mga tubag sa hinungdanong mga pangutana bahin sa Kristohanong ministeryo. Pananglitan, unsang buluhaton ug mensahe ang nagpaila sa matuod nga mga sumusunod ni Jesu-Kristo? Kinsay nagdumala sa tibuok-kalibotang pagsangyaw, ug sa unsang paagi? Ang paglutos ug pagsupak naghatag ug unsang kahigayonan sa mga ministro? Unsay papel sa balaang espiritu sa atong ministeryo?
4. Sa unsang paagi kita bug-os makabenepisyo sa pagtuon niini nga libro?
4 Aron bug-os makabenepisyo, tun-i kini nga abante ug pangandam aron makakomento. Tambongi ang matag pagtuon ug palandonga kon sa unsang paagi mapadapat sa ministeryo ang imong nakat-onan. Hinaot nga ang atong pagtuon niining makapadasig nga libro magtukmod kanato nga bug-os magpamatuod sa Gingharian sa Diyos!—Buh. 28:23.