Sundoga ang Ilang Pagtuo
1. Unsay atong gamiton sa Pagtuon sa Kongregasyon sa Bibliya sugod sa semana sa Oktubre 19?
1 Sugod sa semana sa Oktubre 19, 2015, ang librong Sundoga ang Ilang Pagtuo maoy gamiton para sa Pagtuon sa Kongregasyon sa Bibliya. Kini nga libro nag-asoy bahin sa kinabuhi sa 14 ka karakter sa Bibliya nga sulondan sa pagtuo. Gisulat kini sa paagi nga mahimo silang buhi sa atong hunahuna, nga makatabang nato sa paghanduraw sa ilang pagsagubang sa mga kalisdanan samtang nag-alagad kang Jehova. Ang mga asoy nagtudlo sab ug mga leksiyon nga mapadapat nato sa atong kinabuhi.—Heb. 6:12.
2. Ipatin-aw ang pipila ka bahin sa librong Sundoga ang Ilang Pagtuo.
2 Pipila ka Bahin sa Libro: Ang libro dunay mga mapa ug tsart sa hinungdanong mga tuig aron atong mahibaloan kon kanus-a ug asa nagkinabuhi ang matag karakter. Dugang pa, ang matag kapitulo dunay bahin nga nag-ulohang “Hunahunaa . . . ,” nga makatabang nato sa pagpamalandong sa mga asoy ug sa pagpadapat sa praktikal nga mga leksiyon nga atong nakat-onan. Kini nga libro duna poy nindot, detalyado, ug maayong pagka-research nga mga hulagway aron ato gyong mahanduraw ang mga asoy.
3. Unsay atong himoon aron makabenepisyo sa pagtuon niini nga libro?
3 Kon sa Unsang Paagi Ka Makabenepisyo: Ang sulat gikan sa Nagamandong Lawas nagdasig nato niining mga pulonga: “Gamita ang inyong imahinasyon; handurawa nga tua mo didto. Ibutang ang inyong kaugalingon sa ilang kahimtang. Itandi ang ilang reaksiyon sa usa ka situwasyon sa inyong posibleng reaksiyon niana.” Siyempre, ang paggamit sa imahinasyon wala magpasabot nga magpataka tag panaghap, kondili atong handurawon ang giingon sa asoy ug bation ang gibati sa mga karakter. Nagkinahanglan kinig panahon ug pagpamalandong. (Neh. 8:8) Kon ang pagtuon magsugod sa tunga nga bahin sa kapitulo, repasohon una sa konduktor ang mga nahisgotan sa miaging panagtuon sulod sa 30 ngadto sa 60 segundos. Inigkahuman sa panagtuon, mahimong magpatunghag usa o duha ka repasong pangutana ang konduktor kon dili apil sa hisgotan ang bahin nga “Hunahunaa . . .”
4. Nganong kinahanglan natong tun-an ang librong Sundoga ang Ilang Pagtuo?
4 Kita nagkinabuhi niining kalibotan nga naningkamot sa pagdaot o pagpahuyang sa atong pagtuo matag adlaw. Kini nga libro—apil na ang gibasehan niini nga mga serye sa Ang Bantayanang Torre—maoy gasa gikan kang Jehova aron malig-on ang atong pagtuo. (Sant. 1:17) Pahimuslan nato ni pag-ayo pinaagi sa regular nga pagtambong sa Pagtuon sa Kongregasyon sa Bibliya ug sa pagkomento panahon sa panagtuon!