Walay Hunong ang Atong Pagkamagwawali
1. Nganong nahibalo kita nga walay hunong ang pagkamagwawali sa unang siglong mga Kristohanon?
1 Ang masibotong mga magwawali sa unang siglo nagsangyaw sa maayong balita nga ‘walay hunong’ bisan diin nga may mga tawo. (Buh. 5:42) Busa dili nato mahanduraw nga dihang mamalaybalay, sayloan lang nila ang mga tawo sa dalan ug dili sangyawan. O kaha palabyon nila ang kahigayonan sa pagsangyaw nga di-pormal dihang moadto sa tiyanggihan human ug sangyaw sa kanataran. Sama kang Jesus, walay hunong ang ilang pagkamagwawali.—Mar. 6:31-34.
2. Unsay nalangkit sa pagkinabuhi sumala sa atong ngalan?
2 Kanunayng Andam: Ang atong ngalan, mga Saksi ni Jehova, wala lang maghubit kon unsay atong ginahimo; kini naghubit kon kinsa kita. (Isa. 43:10-12) Busa kanunay kitang andam sa pagdepensa sa atong paglaom bisan pa sa panahong wala kita magsangyaw sa balay ug balay. (1 Ped. 3:15) Nangandam ka ba alang sa mga kahigayonan sa pagsangyaw nga di-pormal ug namalandong kon unsay isulti? Kanunay ka bang nagdalag literatura aron ihatag niadtong magpakitag interes? (Prov. 21:5) Ikaw ba nagsangyaw lang sa balay ug balay, o sa ubang dapit usab kon itugot sa kahimtang?
3. Nganong haom nga tawgong pagsangyaw sa “publiko” ang pagsangyaw sa dalan ug sa mga parkinganan, negosyohanan, parke, ug uban pa?
3 Pagsangyaw sa “Publiko”: Unsay haom nga termino alang sa pagsangyaw sa dalan ug sa mga parkinganan, negosyohanan, parke, ug uban pa? Si Pablo miingon nga siya nagwali sa “publiko” ug sa balay ug balay. (Buh. 20:20) Busa ang pagsangyaw sa “publiko” haom nga termino alang niining matanga sa pagsangyaw. Tinuod, ang balay ug balay nga ministeryo mao gihapon ang atong panguna ug labing epektibong paagi aron ikapaambit sa mga tawo ang mensahe sa Gingharian. Apan ang unang siglong magwawali nagpokus sa mga tawo, dili sa mga balay. Gipahimuslan nila ang tanang kahigayonan sa pagsulti bahin sa kamatuoran—sa publiko, sa di-pormal nga paagi, ug sa balay ug balay. Sama sa mga Kristohanon sa unang siglo, kita dunay daghang kahigayonan sa pagsangyaw sa dalan ug sa mga parkinganan, negosyohanan, parke, ug uban pa. Hinaot mabatonan nato ang samang kaisipan aron bug-os matuman ang atong ministeryo.—2 Tim. 4:5.