Duha ka Sensilyo nga Kubos Kaayog Bili

Ang usa ka hinungdanong paagi sa pagsuportar sa intereses sa Gingharian mao ang pag-amot sa tibuok-kalibotan nga buluhatong pagsangyaw. Komosta man kon diyutay ra tag kuwarta?

Sa usa ka higayon, nakita ni Jesus nga ang usa ka kabos nga babayeng balo mihulog ug duha ka sensilyo nga kubos kaayog bili diha sa panudlanag bahandi sa templo. Ang gugma kang Jehova maoy nagtukmod kaniya sa paghatag “gikan sa iyang kawalad-on, . . . sa tanan niyang nabatonan, ang iyang tibuok nga panginabuhian.” (Mar. 12:​41-44) Ang paghisgot niana ni Jesus nagpakita nga ang amot sa babayeng balo dakog bili sa panan-aw sa Diyos. Sa susama, wala isipa sa unang-siglong mga Kristohanon nga ang pagsuportar sa ministeryo sa pinansiyal nga paagi maoy pribilehiyo lamang sa datong mga Kristohanon. Gihisgotan ni apostol Pablo ang panig-ingnan sa mga taga-Macedonia, nga bisan sa ilang “hilabihang kakabos . . . nagpadayon sa paghangyo . . . uban ang tumang pagpangaliyupo alang sa pribilehiyo sa malulotong pagpanghatag.”​—2 Cor. 8:​1-4.

Busa, bisan kon kita makaamot lamag ‘duha ka sensilyo nga kubos kaayog bili,’ angay natong hinumdoman nga ang daghang ginagmayng amot mopatunghag dakong kantidad. Ang atong kinasingkasing nga paghatag makapahimuot sa atong mahinatagon nga langitnong Amahan, kay “gihigugma sa Diyos ang malipayong maghahatag.”​—2 Cor. 9:7.