Magmabinantayon Samtang Nagsangyaw
1. Nganong kinahanglang magmabinantayon samtang nagsangyaw?
1 “Ingon nga mga karnero taliwala sa mga lobo,” ang mga alagad sa Diyos nagsangyaw “taliwala sa baliko ug hiwi nga kaliwatan.” (Mat. 10:16; Filip. 2:15) Komon ang mga taho bahin sa sibil nga kasamok, mga manggugubot, ug pagpangidnap, nga nagpamatuod nga ang mga tawo misamot “pagkadaotan.” (2 Tim. 3:13, Maayong Balita Biblia) Unsang mga prinsipyo sa Bibliya ang makatabang nato aron ‘kita magmabinantayon’ samtang nagsangyaw?—Mat. 10:16.
2. Unsang mga kahimtang nga angay nang mobiya sa teritoryo ug mosangyaw sa laing lugar?
2 Magmaalamon: Gipakita sa Proverbio 22:3 nga maalamong mangandam sa umaabot nga katalagman. Magmabinantayon! Ayawg dahoma nga kanunayng luwas ang usa ka lugar. Basin makakita kag mga polis o mga tawong magpundok diha sa dalan. Usahay ang buotang tagbalay mopasidaan kanimo. Inayng mag-ukit-ukit, maalamong mobiya dayon ug magpadayog sangyaw sa laing lugar.—Prov. 17:14; Juan 8:59; 1 Tes. 4:11.
3. Sa unsang paagi mapadapat sa atong ministeryo ang Ecclesiastes 4:9?
3 Ayaw Pag-inusara: “Ang duha mas maayo kay sa usa,” nag-ingon ang Ecclesiastes 4:9. Kon naanad kang mag-inusarang mosangyaw, praktikal pa ba gihapon kini karon? Tingali praktikal kini sa pipila ka lugar. Apan sa ubang lugar, dili maayong ang usa ka sister o usa ka batan-on mamalaybalay nga mag-inusara, ilabina kon ngitngit na. Napamatud-an sa mga kasinatian nga mas maayo kon duna tay mabinantayong kauban. (Eccl. 4:10, 12) Magmabinantayon kanunay sa imong mga kauban sa grupo. Pahibal-a ang uban kon ikaw mobiya na sa teritoryo.
4. Unsay atong mahimo aron mapanalipdan ang tanan sa kongregasyon?
4 Ang mga ansiyano, ingong ‘nagabantay sa atong mga kalag,’ maoy maghatag ug praktikal nga giya sumala sa lokal nga mga kahimtang. (Heb. 13:17) Panalanginan gayod ta ni Jehova kon kita magmakasaranganon ug bug-os mokooperar kanila. (Miq. 6:8; 1 Cor. 10:12) Hinaot nga ang tanang alagad sa Diyos epektibong makapamatuod diha sa atong teritoryo, apan kanunayng magmabinantayon.