Magmaepektibo sa Imong Ministeryo

¹ Ang langit mingiob, ug ang makahahadlok nga tingog nagkakusog ngadto sa makapabungol nga kagahob. Ang samag-asong panganod mipaubos. Unsa kana? Usa ka panon sa milyonmilyong dulon ang nagsingabot aron sa pagdalag kompletong kalaglagan ibabaw sa yuta! Kining esena nga gihubit ni propetang Joel adunay katumanan karon diha sa pagsangyaw nga buluhaton sa dinihogang mga alagad sa Diyos ug sa ilang mga kaubanan, ang dakong panon.

² Ang Bantayanang Torre sa Mayo 1, 1998, panid 11, parapo 19, mimatikod: “Ang modernong-adlawng panon sa dulon sa Diyos naghatag ug bug-os nga pamatuod diha sa ‘siyudad’ sa Kakristiyanohan. (Joel 2:9) . . . Nanagpangatkat gihapon sila sa tanang kababagan, nanagpanulod sa minilyong kabalayan, nanuol sa mga tawo diha sa dalan, nakigsulti kanila pinaagi sa telepono, ug nagkontak kanila sa bisan unsang paagi nga posible samtang ilang giwali ang mensahe ni Jehova.” Dili ba dakong pribilehiyo ang pagpakig-ambit niining gimbut-an-sa-Diyos nga buluhaton?

³ Dili sama sa literal nga mga dulon, kansang tumong mao lamang ang pagpakaon sa ilang kaugalingon, kita ingong mga alagad ni Jehova adunay dakong kabalaka sa mga kinabuhi niadtong atong ginasangyawan. Gusto natong tabangan ang uban nga makakat-on sa mahimayaong mga kamatuoran nga anaa sa Pulong sa Diyos ug mapalihok sa paghimog mga tikang nga motultol sa ilang walay kataposang kaluwasan. (Juan 17:​3; 1 Tim. 4:16) Busa, kita buot nga magmaepektibo sa paagi nga atong tumanon ang atong ministeryo. Bisag unsang metodoha sa pagsangyaw ang gamiton, angay natong tagdon kon ato bang ginatuman kana diha sa paagi ug sa panahon nga magpatunghag labing maayong mga resulta. Sanglit “ang talan-awon niining kalibotana nagakausab,” maayong susihon nato ang atong mga metodo ug ang atong paagi sa pagtino nga atong makab-ot ang hagit sa pagkamabungahon kutob sa maarangan.​—1 Cor. 7:31.

⁴ Samtang kita maningkamot sa pagkontak sa mga tawo sa daghang paagi, ang pamalaybalay nga buluhaton mao gihapon ang pangunang paagi sa atong ministeryo. Nakaplagan mo ba nga ang mga tawo kasagarang wala sa balay o nangatulog sa imong pagduaw? Pagkamakapaluya, sanglit dili ka makapaambit sa mensahe sa maayong balita ngadto kanila! Unsaon nimo pag-atubang kini nga hagit?

⁵ Magmapaayon-ayonon ug Magmakataronganon: Sa unang-siglong Israel, ang mga mananagat mangisda sa kagabhion. Nganong sa gabii? Bisag dili kini ang labing kombenyenteng panahon para nila, kadto maoy labing maayong panahon sa pagkakuhag daghan kaayong isda. Kadto mao ang labing mabungahong panahon. Sa pagkomento niining paagiha, Ang Bantayanang Torre sa Hunyo 15, 1992, nag-ingon: “Kinahanglang tun-an usab nato ang atong teritoryo aron kita managat, pagaingnon pa, sa dihang ang kinabag-ang tawo naa sa balay ug madinawaton.” Ang maampingong pagsusi sa sosyal nga mga kinaiya sa pipila ka nasod nagpakita nga sa daghang residensiyal nga mga dapit, bisan tuod ang mga tawo anaa sa balay sa dihang moduaw kita nga sayo sa mga buntag sa Sabado ug Dominggo, sila sa kinatibuk-an dili madinawaton sa atong mga duaw sa maong panahon. Kon mao kini ang kahimtang sa inyong dapit, ikapasibo ba ninyo ang oras sa inyong mga duaw sa pagkaudto-udto na o bisan sa kahaponon? Usa kini ka maayong paagi sa pagpauswag sa kaepektibo sa atong ministeryo maingon man sa pagpakitag konsiderasyon sa atong mga silingan, nga maoy pamatuod sa atong tinuod nga Kristohanong gugma.​—Mat. 7:12.

⁶ Sa Filipos 4:​5, si apostol Pablo nagpahinumdom kanato nga kinahanglang atong ‘ipaila ang atong pagkamakataronganon ngadto sa tanang tawo.’ Uyon niining dinasig nga pagtultol, buot kitang magmatimbang ug magmakataronganon sa atong mga metodo samtang atong tumanon ang atong asaynment sa pagsangyaw uban ang kasibot ug kainit. Dili kita buot nga ‘magpugong sa pagtudlo sa publiko ug sa balay ug balay,’ apan buot natong tinoon nga atong tumanon ang atong pamalaybalay nga ministeryo sa mga panahon nga rasonable ug mabungahon. (Buh. 20:20) Sama niadtong mga mananagat sa unang-siglong Israel, kita mabalak-on sa ‘pagpangisda’ sa mga panahon nga kita labing mabungahon, dili sa mga panahon nga atong makaplagang labing kombenyente kanato.

⁷ Unsang mga pagpasibo ang mahimo sa mga dapit diin ang mga tawo dili buot nga duawon nga sayo sa buntag? Ang ubang mga lawas sa mga ansiyano naghikay alang sa grupo sa pag-ambit diha sa ubang mga porma sa ministeryo, sama sa pagsangyaw sa kadalanan, teritoryo sa negosyo, o mga pagbalikduaw, una pa moadto sa pagpamalaybalay sa residensiyal nga mga dapit. Ang ubang mga kongregasyon nagtakda nga ang mga oras sa tigom sa dayon na nga pagsangyaw maudto-udto na, o bisan sa alas 12:​00 sa udto. Human niana, ang grupo moderetso pag-adto sa buluhatong pamalaybalay ug padayon sa pag-alagad hangtod sa sayong kahaponon. Sa ubang mga teritoryo, ang sayong kahaponon, inay ang buntag, mahimong mao ang labing maayong panahon sa pagtigom alang sa pag-alagad sa kanataran. Ang maong mga pagpasibo hayan makaamot pag-ayo sa napauswag nga pagkamabungahon diha sa buluhatong pamalaybalay.

⁸ Magmasinaboton ug Magmataktikanhon: Samtang atong kontakon ang mga tawo diha sa pultahan sa pamalaybalay, makasugat kitag nagkadaiyang mga reaksiyon sa atong mensahe. Ang pipila ka tagbalay madinawaton, ang uban walay pagtagad, ug ang pipila hayan maergohon o mabatokon. Kon bahin niining ulahi, sa panid 7 sa Nangatarongan Pinasukad sa Kasulatan, kita gipahinumdoman nga wala kita mangita nga “‘makadaog sa mga lantugi’ uban sa mga tawo nga walay pagtahod sa kamatuoran.” Kon masukihon ang tagbalay, labing maayo nga kita mobiya. Dili gayod nato sumpakion ang mga tawo pinaagi sa pagpugos nila nga makigsulti kanato o modawat sa atong panglantaw. Dili nato ipugos ang atong mensahe sa mga tawo. Dili kana makataronganon ug magpahinabog mga suliran alang sa ubang mga Saksi ug sa buluhaton sa katibuk-an.

⁹ Una pa mosugod sa pagkobre sa usa ka teritoryo, maalamong susihon ang kard sa teritoryo alang sa mga nota sa mga adres diin ang mga namuyo nag-ingon kanato nga dili paduaw. Kon dunay ingon niana nga mga adres, ang matag magmamantala nga mokobre sa maong kalye angayng sultihan kon hain ang dili duawon. Kinahanglang walay usang maghukom niana sa iyang kaugalingon sa pagduaw niining mga balaya nga walay pagtultol sa magtatan-aw sa pag-alagad sa pagbuhat sa ingon.​—Tan-awa ang Hunyo 1994 nga Atong Ministeryo sa Gingharian, “Pangutana.”

¹⁰ Mapauswag nato ang atong pagkaepektibo pinaagi sa pagkamailahon samtang magahimo sa pamalaybalay. Magmapaniiron samtang ikaw moduol sa usa ka balay. Sirado ba ang tanang kortina? Wala bay nagtikawtikaw? Kini hayan magpakita nga ang mga tagbalay nangatulog. Lagmit, makahimo ta ug mas mabungahong panaghisgot uban sa tagbalay kon mobalik ta sa ulahi. Tingali labing maayong labyan una kining balaya sa kasamtangan, nga isulat ang numero sa balay. Imong masusi pag-usab ang maong balay sa dili pa mobiya sa teritoryo o isulat nga mobalik pag-usab sa ulahing takna.

¹¹ Mahimong motungha gihapon ang mga kahimtang nga dili nato tuyoong mapukaw ang usang natulog o sa laing paagi madisturbo siya. Siya tingali makitang maglagot o masuko pa ngani. Unsaon gayod nato sa pagsanong? Ang Proverbio 17:​27 nagtambag: “Ang tawong masinaboton mabugnawon ug espiritu.” Samtang dili kita mangayog pasaylo tungod sa atong ministeryo, kita gayod makapahayag nga kita nasubo pag-ayo nga miduaw kita sa dili kombenyenteng oras. Kita makasukna sa matinahurong paagi kon sa laing panahon mas kombenyente ba ug motanyag nga mobalik. Ang sinserong pahayag sa personal nga kabalaka diha sa malumong tingog kasagarang magpahupay sa maong tawo. (Prov. 15:1) Kon ang tagbalay mopahibalo nato nga siya regular nga nagtrabahog panggabii, ang nota mahimong ilakip diha sa kard sa teritoryo aron ang umaabot nga mga duaw mahimo sa hustong panahon.

¹² Ang pagkamasinaboton tukma usab samtang kita manlimbasog sa bug-os nga pagkobre sa atong teritoryo. Sanglit daghang tawo wala sa balay sa atong unang pagduaw, angay kitang maghimog dugang mga paningkamot sa pagkontak kanila aron ipaambit ang mensahe sa kaluwasan ngadto kanila. (Roma 10:13) Ang mga taho nagpakita nga usahay ang mga magmamantala moduaw sa samang balay sa ubay-ubayng higayon sa usa ka adlaw sa paninguhang mahibalag ang mga tawo sa balay. Namatikdan kini sa mga silingan. Ang di-maayong impresyon hayan mahimo nga ang mga Saksi ni Jehova ‘kanunayng moduaw’ sa ilang kalye. Unsaon paglikay niini?

¹³ Gamita ang pagkamasinaboton. Sa dihang moduaw pag-usab sa wala sa balay, may mga timailhan ba nga may tawo na karon sa balay? Kon ang mga sulat o mga abiso manglugwa sa buson o makita ubos sa pultahan, lagmit nga ang tawo wala pa gihapon sa balay ug ang dugang pagduaw diha sa pultahan dili mabungahon niining higayona. Kon ang tawo dili makontak human sa pipila ka pagsulay nga gihimo sa nagkalainlaing oras sa adlaw, sama sa gabii, tingali posibleng kontakon ang tagbalay pinaagig telepono. Kon dili, ang usa ka tract o handbill sa maalamong paagi ikabilin man diha sa pultahan, ilabina kon ang teritoryo sa rasonableng paagi nakobrehan kanunay. Gipanghinaot nga makontak ang tawo sa sunod panahon nga kobrehan ang teritoryo.

¹⁴ Ato gayong likayan ang dugayng mga panaghisgot diha sa pultahan kon ang tagbalay maulanan. Kon dapiton sa pagsulod, pagbantay nga dili mahugawan ang salog. Gamitang maayong panghukom sa dihang hasion sa nagpaghot nga iro. Sa dihang magkobre sa mga apartment, sultig hinay ug likayi ang pagsaba nga makadisturbo sa mga namuyo ug magbutyag sa imong pagkaanaa.

¹⁵ Magmahapsay ug Magmaligdong: Pinaagig maayong organisasyon atong malikayan ang pagpormag dako, dayag kaayong mga grupo nga magtapok diha sa teritoryo. Ang ubang mga tagbalay mobating gihulga sa dihang moabot ang ubay-ubayng mga sakyanan sa atubangan sa ilang balay uban ang dakong grupo sa mga magmamantala. Dili nato gusto nga mohatag ug impresyon nga kita “nanulong” sa residensiyal nga mga dapit. Ang mga kahikayan sa pagkobre sa teritoryo labing maayong himoon didto sa tigom sa dayon na nga pagsangyaw. Ang gagmayng mga grupo sa mga magmamantala, sama sa pamilya, dili kaayo makapahadlok sa mga tagbalay ug mas sayon nga organisahon samtang kobrehan ang teritoryo.

¹⁶ Ang pagkahapsay nagkinahanglan nga ang mga ginikanan maampingong magsuperbisar sa panggawi sa ilang mga anak samtang magkobre sa teritoryo. Kinahanglang maayog pamatasan ang mga bata sa dihang mokuyog sa mga hingkod ngadto sa pultahan. Ang mga batan-on kinahanglang dili tugotan nga magdula o libreng maglaaglaag, nga makabutad sa di-angayng pagtagad sa mga molupyo o mga lumalabay.

¹⁷ Kinahanglanon usab ang pagkatimbang, maylabot sa mga pagmeryenda. Ang Atong Ministeryo sa Gingharian, Hunyo 1995, panid 3, nag-ingon: “Sa dihang kita atua sa pag-alagad sa kanataran, mawad-an kitag bililhong panahon diha sa mga pagmeryenda. O tingali kon ang mga kahimtang sa klima dili gayod maayo, ang usa ka pahulay makarepresko kanato ug makatabang nato sa pagpadayon. Daghan, hinunoa, ang nagapalabing magpadayon nga magmapuliki sa pagsangyaw sa katawhan ug nagalikay sa pagpakig-uban sa mga igsoon sa pagmeryenda sa panahon nga gigahin alang sa ministeryo.” Bisag ang paghunong alang sa mga pagmeryenda maoy personal nga desisyon, namatikdan nga usahay, ang dagkong mga grupo sa mga igsoong lalaki ug babaye magtagbo sa usa ka coffee shop o sa restawran. Gawas pa sa panahong magasto aron masilbihan, ang presensiya sa panon sa katawhan makapahadlok sa ubang mga suki. Usahay, ang mga kasinatian sa pagsangyaw sa buntag kusog nga gihisgotan, ug kini makatibhang sa dignidad sa atong ministeryo ug makadaot sa kaepektibo niini. Pinaagig pagkamasinaboton, ang mga magmamantala makalikay nga maghuot diha sa establisimento ug magkuhag di-mapuslanong panahon gikan sa ministeryo.

¹⁸ Daghan ang nakasinatig maayong mga resulta pinaagig pagduol sa mga tawo bisan diin nga sila makaplagan​—sa kadalanan, sa mga paradahan, sa mga parke, ug sa ubang publikong mga dapit. Dinhi, usab, buot kitang makahatag ug maayong pamatuod, dili lamang pinaagi sa atong mga pulong kondili usab pinaagig atong pagkamakataronganon. Ang mga magmamantala sa matag kongregasyon kinahanglan gayong motahod sa mga utlanan sa ilang teritoryo aron dili sila makasamok sa mga tigbaktas diha sa komersiyal nga mga dapit ug mga parke o mga empleyado sa mga negosyo, sama sa mga gasolinahan, nga bukas sa 24 oras. Aron sa pagseguro nga atong matuman ang atong ministeryo diha sa mahapsay, maligdong nga paagi, kobrehan lamang nato ang atong kaugalingong natudlong teritoryo gawas lamang kon ang pipila ka espesipikong mga kahikayan ang gihimo pinaagi sa Komite sa Pag-alagad sa Kongregasyon sa laing kongregasyon, aron sa pagtagana kanila ug pipila ka tabang.​—Itandi ang 2 Corinto 10:​13-15.

¹⁹ Ang ubang kongregasyon nga may daghang dapit diin ang publikong pagsangyaw posible nag-organisar niining mga dapita ngadto sa mga teritoryo. Dayon ang kard sa teritoryo giisyu ngadto sa indibiduwal o grupo. Nagapasayon kinig mas epektibong pagkobre ug nagabantay batok sa daghan kaayong magmamantala nga mosangyaw sa samang dapit sa samang oras, uyon sa prinsipyo sa 1 Corinto 14:​40: “Ipahinabo ang tanang butang nga may kahapsay ug pinaagig kahikayan.”

²⁰ Ang atong personal nga panagway kinahanglan nga kanunayng maligdong ug mahawason sa mga ministro nga nagadala sa ngalan ni Jehova. Tinuod usab sa kahimanan nga atong gamiton. Ang gubaon nga mga bag sa libro ug daghag pinil-an o hugawng mga Bibliya makatibhang sa mensahe sa Gingharian. Gikaingon nga ang panapot ug pamostura “maoy daling paagi sa komunikasyon nga nagahatag sa mga tawo sa palibot ug impormasyon bahin sa kon kinsa ug kon unsa ka ug kon hain ka mohaom diha sa kahikayan sa mga butang.” Busa, ang atong panagway dili gayod angayng nagkato ni nagkagidlay, dili mapasundayagon ni maluho, apan kanunayng “takos sa maayong balita.”​—Filip. 1:27; itandi ang 1 Timoteo 2:​9, 10.

²¹ Sa 1 Corinto 9:​26, si apostol Pablo nag-ingon: “Ang paagi nga ako nagadagan dili kay walay-katinoan; ang paagi nga ako nagapatunong sa akong mga suntok dili ingon nga nagapanuntok sa hangin.” Sa pagsundog kang Pablo, kita determinado sa pagbaton ug epektibo, mabungahong ministeryo. Samtang kita adunay masibotong pakig-ambit sa pagsangyawng buluhaton ingong bahin sa “panon sa dulon” ni Jehova karong adlawa, hinaot nga atong gamiton ang Kristohanong pagkamakataronganon ug pagkamasinaboton sa pagdala sa mensahe sa kaluwasan ngadto sa tanan diha sa atong teritoryo.