Gamitang Mapuslanon ang Imong Panahon

¹ Ang matag usa adunay samang gidaghanon sa panahon nga iyang magamit sa matag semana. Ang bahin nga atong gugolon sa pagpakaylap sa maayong balita maoy ilabinang hinungdanon tungod kay kini panahon nga gigugol diha sa nagaluwas-kinabuhing buluhaton. (Roma 1:​16) Atong ipakita ang atong pagpabili alang niini pinaagig pagpangandam pag-ayo sa giplanong pag-alagad, nga untop nga moabot diha sa mga tigom sa dayon na nga pagsangyaw, ug mogikan gilayon ngadto sa teritoryo. Kita mas mopalabi sa pagsangyaw kay sa paghulathulat diha sa tigom sa dayon na nga pagsangyaw. Sanglit si Jehova nagtudlo kanato nga “sa tanang butang adunay tinudlong panahon,” kinahanglan natong gamiton ang panahon nga atong gigahin alang sa ministeryo nga mapuslanon gayod.​—Eccl. 3:1.

² Dumalaha ang Imong Panahon nga Maalamon: Daghang panalangin ang moabot kanato kon kita lig-ong mosunod sa eskedyul nga magtugot sa regular nga pagpakig-ambit diha sa ministeryo sa kanataran. Natural, ang maayong mga resulta nga atong makab-ot diha sa ministeryo angayng magkatakdo sa gidaghanon sa panahong gugolon sa pag-alagad. Pinaagig pipila ka diyutayng mga kausaban sa atong rutina, makagugol ba kita ug dugang panahon sa pag-alagad sa kanataran? Pananglitan, human sa kalihokang pagmagasin sa Sabado, makagahin ba kitag dugang panahon sa paghimog pipila ka balikduaw? Kon kita taudtaod nang anaa sa ministeryo sa kanataran sa Dominggo, makagugol ba kitag pipila ka panahon usab sa paghimog mga balikduaw o pagdumalag pagtuon sa Bibliya? Posible ba nga dugangan ang atong pamalaybalay nga kalihokan uban sa pipila ka pagsangyaw sa kadalanan? Niini o ubang mga paagi, kita hayan mouswag sa atong pag-alagad.

³ Sa dihang kita mogawas sa pagministeryo, mahimong atong mausik ang hinungdanong panahon kon kita dili mag-amping. Siyempre, sa dihang ang mga kahimtang sa panahon dili maayo, ang mubong pahulay magpalagsik kanato ug moabag kanato sa pagpadayon. Apan, magmatimbang sanglit ang maong mga pahulay hayan dili kanunayng kinahanglanon.

⁴ Sa di pa dugayng katuigan nagakalisod na ang pagkaplag sa mga tawo diha sa balay. Sa pagsagubang niining kahimtanga, daghang magmamantala naghimo sa ilang pagsangyaw sa balaybalay sa lainlaing panahon sa adlaw. Nganong dili sulayan ang pagsangyaw sa haponhapon na o sayong kagabhion?

⁵ Mas maayo kon kita dili mag-estoryahanay sa usag usa samtang nagpakig-ambit sa pagsangyaw sa kadalanan. Hinunoa, magbulag nga nagbarog ug duolon ang mga tawo aron makasugod ug mga panaghisgot kanila. Busa ang panahon madumala nga mas mapuslanon ug mas dakong kangaya ang maangkon gikan sa buluhaton.

⁶ Pahimusli ang mga Kahigayonan sa Pagsangyaw: Sa dihang ang usa ka tagbalay miingon nga siya dili interesado, usa ka Saksi nangutana kon aduna bay laing tawo diha sa balay nga tingali iyang maestorya. Kini mitultol sa usa ka panaghisgot sa lalaki sa balay, kinsa nasakit sa daghang katuigan ug anaa na lamang sa higdaanan. Ang paglaom nga gipadayag sa Pulong sa Diyos nagpasig-uli sa iyang interes sa kinabuhi. Sa wala magdugay siya nakabangon na sa higdaanan, nagtambong sa mga tigom sa Kingdom Hall, ug mipaambit sa iyang bag-ong-kaplag nga paglaom sa uban!

⁷ Gipadapat sa tin-edyer nga sister ang sugyot nga moambit sa pag-alagad sa kanataran sulod sa panahon sa dili pa ang Pagtuon sa Libro sa Kongregasyon. Sa una niyang pultahan, iyang nahibalag ang usa ka 13-anyos-edad nga dalagita nga naminaw pag-ayo ug mikuhag literatura. Sa pagkasunod adlaw didto sa eskuylahan, nakita sa batan-ong sister kining samang dalagita. Wala madugay human niana, gitanyagan niya nga magtuon sa Bibliya uban niya, ug ang dalagita midawat.

⁸ Himoa Kana nga De-Kalidad nga Panahon: Ang regular nga pagpakig-ambit sa pag-alagad sa kanataran motabang kanato nga maugmad ang atong mga katakos sa pagtanyag sa maayong balita. Mapauswag ba nimo ang imong katakos sa pagsugod sa panaghisgot diha sa pultahan pinaagig paggamit sa mas epektibong introduksiyon? Makahimo ka ba nga mas hanas nga magtutudlo sa dihang magdumalag pagtuon sa Bibliya sa balay? Pinaagi sa pagbuhat sa ingon, ikaw makagamit gayod sa imong panahon sa pag-alagad nga mapuslanon ug maghimo sa imong ministeryo nga mas mabungahon.​—1 Tim. 4:​16.

⁹ Sanglit ang “panahong nahibilin mubo na,” ang atong mga kinabuhi angayng mapuno sa Kristohanong buluhaton. (1 Cor. 7:​29) Ang paggahin ug panahon sa pagsangyaw nga kalihokan angayng mahimong panguna sa atong listahan sa mga unahonon. Magbaton kita ug himsog, masibotong pakig-ambit diha sa ministeryo. Ang panahon maoy usa ka talagsaong butang nga gihatag ni Jehova kanato. Kanunayng gamita kana nga maalamon ug himoang mapuslanon.

[Kahon ed pahina 4]

Tagda Kining mga Sugyota:

◼ Untop nga moabot sa mga tigom sa dayon na nga pagsangyaw.

◼ Kon makataronganon, hupting gagmay ang mga grupo sa pagsangyaw.

◼ Likayi ang paglanganlangan sa pag-adto sa teritoryo.

◼ Kobrehe ang teritoryo sa dihang ang kadaghanang tawo anaa sa balay.

◼ Pagsangyaw nga mag-inusara usahay kon hilwas ang pagbuhat sa ingon.

◼ Paghimog mga balikduaw nga labing duol sa balay-ug-balay nga teritoryo.

◼ Magmapuliki sa pag-alagad sa dihang ang uban sa grupo malangan sa usa ka pultahan.

◼ Kon posible, depende sa mga kahimtang, mosangyaw nga labaw kay sa usa ka oras.