Gamitag Maayo ang Imong Panahon Diha sa Ministeryo
Sa 2014 nga tuig sa pag-alagad, ang mga Saksi ni Jehova nakagugol ug 1,945,487,604 ka oras sa ministeryo—dakong pamatuod nga kita determinado nga padayong magmakugihon sa pag-alagad kang Jehova! (Sal. 110:3; 1 Cor. 15:58) Sanglit ang “panahong nabilin mubo na,” mahimo kaha natong mapahimuslan ug maayo ang atong panahon sa ministeryo aron mas daghan pang tawo ang atong maestorya?—1 Cor. 7:29.
Kinahanglan ang pagpasibo aron magamit natog maayo ang atong panahon sa ministeryo. Pananglitan, kon pirme na lang kang mogugol ug usa ka oras o kapin pa sa pagsangyaw pero wala kay maestorya, puwede kaha kang magpasibo? Lainlain ang kahimtang sa matag lugar. Pero ang mosunod nga mga sugyot makatabang nimo nga magamit ug maayo ang imong panahon aron dili ka morag ‘nagsuntok sa hangin.’—1 Cor. 9:26.
Pagpamalaybalay: Sukad pa sa una, naandan na sa mga igsoon nga mamalaybalay sa buntag ayha pa magbalikduaw o mag-Bible study. Pero daghan ang nagtrabaho sa buntag, busa mas maayo tingaling mamalaybalay sa hapon o sa gabii, dihang ang mga tawo naa na sa balay ug wala na kaayoy gihunahuna. Sa buntag, basig mas maayo kon magsangyaw sa negosyohanan o sa mga dapit diin daghag tawo.
Publikong Pagsangyaw: Ang mga lamesa ug cart angayng iplastar sa lugar nga sakop sa teritoryo sa kongregasyon diin daghag tawo nga moagi. (Tan-awa ang Hulyo 2013 nga Atong Ministeryo sa Gingharian, p. 5.) Kon paglabay sa panahon dili na kaayo daghan ang moagi sa lokasyon nga gibutangan sa cart o lamesa, ang Service Committee sa kongregasyon tingali modesisyon nga ibalhin kini sa laing lugar diin daghag tawo nga moagi.
Pagbalikduaw ug Pag-Bible Study: Maeskedyul ba nimo ang imong mga balikduaw ug Bible study sa oras nga dili kaayo mabungahon ang pagsangyaw? Pananglitan, kon mabungahon ang pagsangyaw sa Sabado sa buntag, basig puwede nimong ieskedyul ang imong Bible study sa hapon o gabii. Kon magbalikduaw, basig mas maayo nga dili daghan ang mag-uban sa usa ka balikduaw aron mas daghan ang maadtoan.
Tinuod, makaoras ta dihang makigbahin ta sa ministeryo, pero mas malipayon ta kon daghan tag maestorya. Kon nakita nimo nga dili epektibo ang usa ka paagi sa pagministeryo sa usa ka partikular nga oras, sulayi ang laing paagi sa pagministeryo. Pag-ampo kang Jehova, ang “Agalon sa pagpangani,” alang sa giya aron magamit nimog maayo ang imong panahon diha sa ministeryo!—Mat. 9:38.