Bag-ong Pamaagi sa Publikong Pagsangyaw
1. Unsang panig-ingnan ang gihatag sa unang-siglong mga Kristohanon?
1 Ang unang-siglong mga Kristohanon dili lang kay mosangyaw sa balay ug balay. Mosangyaw usab sila sa publiko. (Buh. 20:20) Pananglitan, sila mosulod sa templo diin ilang makaplagan ang daghang tawo. (Buh. 5:42) Sa dihang didto sa Atenas, si Pablo mosangyaw kada adlaw sa mga tawong mangadto sa tiyanggihan. (Buh. 17:17) Karon, ang atong pangunang paagi sa pagpakaylap sa maayong balita mao gihapon ang pagpamalaybalay. Apan, mosangyaw sab ta sa mga parkinganan, negosyohanan, parke, puliking mga dalan, ug uban pang mga dapit diin makaplagan ang mga tawo. Bisan tuod ang matag magmamantala gidasig nga mosangyaw sa publiko kon posible, daghan ang may kahigayonan nga makaambit sa duha ka bag-ong pamaagi sa publikong pagsangyaw.
2. Unsang bag-ong pamaagi sa pagsangyaw ang gisugdan niadtong Nobyembre 2011?
2 Espesyal nga Kahikayan sa Publikong Pagsangyaw sa Dagkong Siyudad: Sumala sa gihisgotan sa 2013 Tinuig nga Basahon, panid 16 ug 17, gisulayan ang usa ka bag-ong pamaagi sa publikong pagsangyaw didto sa New York City niadtong Nobyembre 2011. Giplastar ang mga lamesa ug cart nga gibutangag nindot nga mga displey ug literatura sa lainlaing pinulongan diha sa mga dapit sa siyudad nga daghang tawo ang moagi. Kada adlaw linibo ka tawo ang moagi, lakip niadtong mga nagpuyo sa dagkong apartment nga estrikto sa seguridad ug mga tawo nga kanunayng wala sa balay. Nindot kaayo ang resulta. Sa usa lang ka bulan di pa dugay, 3,797 ka magasin ug 7,986 ka libro ang napahimutang. Daghang lumalabay ang mihangyog Bible study. Sanglit gipasiugda ang pagsugod ug Bible study, ang tanang adres nga gibilin sa mga interesado gipadala dayon ngadto sa mga kongregasyon aron mahaling ang ilang interes.
3. Sa unsang paagi gipakaylap kining bag-ong pamaagi sa pagsangyaw?
3 Tungod kay nagmalamposon kining bag-ong pamaagi, gipakaylap kini karon sa tibuok kalibotan diha sa dagkong mga siyudad nga dakog populasyon. Tinoon sa lokal nga sangang buhatan kon unsang siyudara ang makabenepisyo niini. Sagad kining mga siyudara daghag tawo tungod sa dagkong terminal sa mga sakyanan o sa daghang opisina o apartment. Human niana, ang sangang buhatan magpadalag sulat ngadto sa mga kongregasyon nga makigbahin niini ug maghatag ug dugang mga instruksiyon. Kasagaran gamiton ang mga regular ug espesyal payunir, bisan tuod nga sa ubang mga lugar makapakigbahin usab niini ang mga oksilyare payunir.
4. Sa unsang paagi himoon ang espesyal nga kahikayan sa publikong pagsangyaw sa dagkong siyudad?
4 Kon Unsaon Kini Paghimo: Kadtong makigbahin sa espesyal nga kahikayan sa publikong pagsangyaw sa dagkong siyudad sagad maghulat kon dunay moduol sa lamesa o sa cart nga displeyhanan. Kon dunay moduol, dasigon siya sa pagkuhag literatura nga makapainteres niya. Ang mga payunir maningkamot nga matubag gikan sa Kasulatan ang mga pangutanang isukna. Kon siya mokuhag literatura, dili hisgotan sa mga payunir ang bahin sa donasyon. Apan kon siya mangutana sa unsang paagi gisuportahan ang atong buluhaton sa pinansiyal nga paagi, ilang ipatin-aw nga makaplagan ang dugang impormasyon diha sa atong opisyal nga Web site ug mahimo nilang hisgotan ang mga artikulo sa jw.org kon unsaon paghatag ug mga donasyon. Kon posible, sila moingon: “Gusto ba nimong dunay moduaw nimo sa balay?” o “Abi nimo, gawas niana nga publikasyon, nagtanyag pod baya mig libreng pagtuon sa Bibliya.”
5. Sa unsang paagi ang pagpakigbahin niining bag-ong pamaagi sa pagsangyaw nakahatag ug kalipay sa usa ka magtiayon?
5 Kining bag-ong pamaagi sa pagsangyaw nakahatag gayod ug kalipay. Ang usa ka magtiayon misulat: “Samtang magtindog mi duol sa lamesa ug makita ang linibo ka tawo nga moagi kada adlaw, makaingon gyod ming dako kaayo ang gihimong paningkamot nga masangyawan ang tanang tawo sa tibuok kalibotan. Sa magsud-ong mi sa daghang tawo ug maghunahunang si Jehova nahingawa gayod sa tanan, mas determinado ming unahon sa among kinabuhi ang buluhatong pagsangyaw. Mahanduraw namo nga si Jehova nagasusi sa kasingkasing sa tanang tawo nga moagi, ug iyang gipangita kon kinsa ang takos. Gibati gyod namong ang mga manulonda nag-uban namo.”
6. (a) Unsay lain pang bag-ong pamaagi sa publikong pagsangyaw nga giorganisar sa daghang kongregasyon, ug nganong lahi kini sa espesyal nga kahikayan sa publikong pagsangyaw sa dagkong siyudad? (b) Sa unsang paagi ang mga kongregasyon makigkooperar sa publikong pagsangyaw?
6 Publikong Pagsangyaw nga Giorganisar sa Lokal nga Kongregasyon: Gawas pa sa espesyal nga kahikayan sa publikong pagsangyaw sa dagkong siyudad, may lain pang bag-ong pamaagi nga giorganisar sa mga lawas sa mga ansiyano sa ilang teritoryo. Niini, ang mga magmamantala maggamit ug lamesa o cart nga displeyhanag literatura sa dapit nga daghang tawo ang moagi ug sakop sa teritoryo sa kongregasyon. Lahi kini sa espesyal nga kahikayan sa publikong pagsangyaw sa dagkong siyudad, diin daghang kongregasyon ang mosangyaw sa samang dapit nga daghag tawo diha sa mga siyudad nga gipili sa sangang buhatan.—Tan-awa ang kahong “Gikinahanglan ang Kooperasyon.”
7. Kon praktikal, sa unsang paagi organisahon sa mga ansiyano ang publikong pagsangyaw diha sa ilang teritoryo?
7 Tan-awon sa mga ansiyano kon duna bay dapit nga sakop sa teritoryo sa kongregasyon nga daghang tawo ang moagi ug ilang tinoon kon praktikal ba nga mag-organisar ug publikong pagsangyaw. Lakip sa posibleng mga dapit nga kabutangan ug lamesa o cart nga displeyhanag literatura mao ang dagkong terminal sa mga sakyanan, plasa, parke, puliking kadalanan, shopping mall, kampus sa kolehiyo, erport, ug mga dapit nga ipahigayon ang tinuig nga mga kalihokan. Mas maayong may lamesa nga iplastar sa mao ra nga lokasyon ug sa samang adlaw ug oras. Namatikdan nga mas epektibo ang pagbutang ug mga lamesa diha sa mga shopping mall kay sa gawas sa usa ra ka dakong tindahan diin ang mga kustomer naghunahuna kon unsa ray ilang paliton sa tindahan. Tingali mas maayong butangan ug gagmayg cart nga displeyhanag literatura ang ubang lokasyon, sama sa daplin sa dalan nga puliki kaayo. Ma-download sa mga ansiyano gikan sa atong Web site ang mga electronic file nga gamiton aron maimprenta ang poster sa idispley nga Bantayanang Torre ug Pagmata! ug librong Gitudlo sa Bibliya. Kini nga mga file gidisenyo alang sa publikong pagsangyaw. Kadtong makigbahin niini nga buluhaton maghimo niini nga sama sa himoon niadtong makigbahin sa espesyal nga kahikayan sa publikong pagsangyaw sa dagkong siyudad ug kini kinahanglang ubos sa pagdumala sa magtatan-aw sa pag-alagad. Kon dunay ilang makuhang adres sa interesado nga wala magpuyo sa ilang teritoryo, pil-apan dayon nila ang usa ka Please Follow Up (S-43) form ug ihatag kini ngadto sa sekretaryo.
8. Kon ang kongregasyon wala mag-organisar ug publikong pagsangyaw, unsang mga kahigayonan nga makapakigbahin ka gihapon sa publikong pagsangyaw?
8 Publikong Pagsangyaw sa Imong Personal nga Ministeryo: Ang ubang mga kongregasyon tingali walay dapit sa ilang teritoryo diin daghang tawo ang moagi, maong dili praktikal nga magbutang ug lamesa o cart nga displeyhanag literatura. Bisan pa niana, gidasig gihapon ang mga magmamantala niini nga mga kongregasyon sa paglakip sa publikong pagsangyaw diha sa ilang personal nga ministeryo. May mall ba, shopping center, o dagkong tindahan sa inyong teritoryo? May parke ba o dapit nga daghag tawo? May publiko bang mga kalihokan nga sa popanahon ipahigayon sa inyong teritoryo? Kon mao, makapakigbahin ka gihapon sa publikong pagsangyaw.
9. Nganong angay tang magmatinguhaon sa pagsangyaw sa mga tawo bisag asa sila makaplagan?
9 Kabubut-on ni Jehova nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Busa, kutob sa mahimo, maningkamot tang masangyawan ang daghang tawo sa mensahe sa Gingharian sa dili pa moabot ang kataposan. (Mat. 24:14) Sa daghang dapit, lisod makaplagan ang mga tawo sa ilang balay. Apan, maestorya nato sila kon sila anaa sa publikong dapit. Tingali ang publikong pagsangyaw mao ang bugtong paagi nga makadungog ang ubang mga tawo sa maayong balita. Busa, hinaot nga matuman nato sa bug-os ang atong ministeryo pinaagi sa pagsangyaw sa mga tawo bisag asa sila makaplagan.—2 Tim. 4:5.
[Kahon sa panid 5]
Gikinahanglan ang Kooperasyon
Gitaho nga ang mga magmamantala gikan sa silingang mga kongregasyon usahay makigbahin sa publikong pagsangyaw diha sa samang dalan, parkinganan, ug sa atubangan sa samang negosyohanan o dagkong terminal sa mga sakyanan. Ang mga magmamantala gikan sa lainlaing kongregasyon magbilin ug mga magasin sa samang lobby o hulatanan, ug mosangyaw sa samang negosyohanan. Tungod niini ang mga negosyante ug ang nagpuyo sa maong komunidad maglagot na kanato, bisan tuod ang mga magmamantala dili dungang mosangyaw sa maong dapit. Busa, labing maayo kon ang kongregasyon mosangyaw sa kaugalingon nilang teritoryo sa dihang makigbahin sa publikong pagsangyaw.
Kon ang mga magmamantala gustong makigbahin sa publikong pagsangyaw sa silingang kongregasyon, sila kinahanglang makigsulti sa ilang magtatan-aw sa pag-alagad. Dayon kontakon niini ang magtatan-aw sa pag-alagad sa laing kongregasyon aron mananghid sa dili pa nila kobrehan ang teritoryo sa silingang kongregasyon. Kon ang ubang mga kongregasyon nga lahig pinulongan giasayn sa pagsangyaw sa samang dapit, ang mga magtatan-aw sa pag-alagad niini nga mga kongregasyon magsabot aron dili samokan ang mga tawo sa komunidad. Kon may kooperasyon, madumala ang tanang butang nga “may kahapsay ug pinaagig kahikayan.”—1 Cor. 14:40.
[Hulagway sa panid 6]
[Hulagway sa panid 6]