Bag-o ug Makalingaw nga Pamaagi sa Publikong Pagsangyaw
1.Unsay gidasig nga buhaton sa mga kongregasyon nga may mga lugar nga daghag tawo?
1 Ang mga kongregasyon nga may mga lugar nga daghag tawo gidasig nga mag-organisar ug publikong pagsangyaw, gamit ang lamesa o kart nga displeyhanan. Kon naggamit silag kart, puwedeng usa ra ka magmamantala ang magtindog o maglingkod tapad sa displey. Pero kon lamesa ang gamiton, kinahanglang duha ka magmamantala ang magbantay. Sila angayng mahigalaon, mapahiyomon, ug maabiabihon. Kon may moduol ug motan-aw sa displey, mahimong sugdan sa usa ka magmamantala ang panaghisgot, tingali sa pag-ingon, “Unsa kahay gisulti sa Bibliya ana nga topiko?” Usa o duha ka magmamantala makahimog di-pormal nga pagsangyaw duol sa displeyhanan.
2.Iasoy ang usa ka eksperyensiya nga nagpakita sa kaimportante sa publikong pagsangyaw gamit ang displeyhanag literatura.
2 Kini nga pamaagi miresultag daghang bag-ong Bible study. Usa ka kolehiyala ang naghimog research paper bahin sa mga Saksi ni Jehova, pero wala siyay nakitang Kingdom Hall. Pagkasunod semana, iyang nakita ang lamesa nga displeyhanan diha sa ilang eskuylahan. Nasugdan ang Bible study, ug siya karon bawtismado nang magmamantala ug nakigbahin niini nga pamaagi sa pagsangyaw.
3.Unsay gibati sa uban bahin niini nga pamaagi sa publikong pagsangyaw?
3 Usa ka sister nga miangay niini nga pamaagi sa publikong pagsangyaw miingon: “Ang uban mihapit sa displey aron mokuhag bag-ong mga magasin. Ang uban wala gyod sukad makadungog bahin sa mga Saksi ni Jehova. Akong nakita nga pinaagi niini, daghan ang masangyawan.” Usa pa ka sister miingon, “Kini maoy bag-o ug makalingaw nga pamaagi sa pagsangyaw kay ang natingala nga mga tawo moduol nimo bisag dili kaayo sila interesado.”
4.Nganong mas maayo nga idispley ang mga literatura sa mao rang lugar, adlaw, ug oras kada semana?
4 Mas maayo nga ibutang ang displey sa mao rang lugar, adlaw, ug oras kada semana. Ingong resulta, ang mga tawo maanad niini ug dili na magduhaduhang moduol aron mangutana o magkuhag literatura. Nag-organisar na ba ang inyong kongregasyon ug publikong pagsangyaw? Kon oo, makaambit ka niining makalingaw ug epektibong paagi sa ‘pagmantala sa gingharian sa Diyos.’—Luc. 9:60.