Epektibong Pagsangyaw sa Kadalanan
1. Unsa ang usa ka paagi nga atong masundog si Jesus?
1 Sa iyang ministeryo, si Jesus wala magpanuko sa pagpakigsulti sa mga tawo diha sa kadalanan ug sa ubang publikong dapit. (Luc. 9:57-61; Juan 4:7) Gusto niyang daghan ang makadungog sa iyang hinungdanong mensahe. Karon, ang pagsangyaw sa kadalanan maoy ekselenteng paagi sa pagtabang sa mga tawo nga makabatog diyosnong kaalam. (Prov. 1:20) Mas magmalamposon kita kon duna kitay inisyatibo ug katakos sa pag-ila.
2. Sa unsang paagi ikapakita ang inisyatibo sa dihang magsangyaw sa kadalanan?
2 Ipakita ang Inisyatibo: Mas maayo nga kita ang moduol sa mga tawo inay nga magtindog o maglingkod lang sa usa ka dapit ug maghulat sa mga tawo nga moduol kanato. Pahiyom ug mahigalaong timbayaha sila. Kon duna kay kauban, labing maayo nga tagsatagsa mong moduol sa mga tawo. Gikinahanglan usab ang inisyatibo sa pagpaloap sa interesado. Kon haom, sa dili pa taposon ang panag-estorya, pangutan-a siya kon unsaon siya sa pagkontak pag-usab. Ang ubang magmamantala regular nga mosangyaw sa samang lokasyon, sa ingon ilang maestorya pag-usab ang samang mga tawo ug mahaling pa ang ilang interes.
3. Sa unsang paagi ikapakita ang katakos sa pag-ila sa dihang magsangyaw sa kadalanan?
3 Ipakita ang Katakos sa Pag-ila: Gamita ang maayong panghukom kon asa motindog ug kinsay duolon. Dili kinahanglang sangyawan ang tanang lumalabay. Mag-obserbar. Pananglitan, kon ang tawo nagdali, labing maayo nga dili na lang siya duolon. Kon magsangyaw atubangan sa mga establisimento sa negosyo, likaying dili maalarma o masuko ang manedyer. Mas maayong mosangyaw sa mga tawo sa dihang sila mobiya inay sa dihang mosulod sa maong mga establisimento. Duola ang mga tawo sa paaging dili sila mahadlok o makuratan. Dugang pa, gamita ang katakos sa pag-ila sa pagtanyag ug literatura. Kon dili kaayo interesado, mahimong motanyag ug tract inay magasin.
4. Nganong ang pagsangyaw sa kadalanan makapalipay ug epektibong paagi sa pagsangyaw?
4 Pinaagi sa pagsangyaw sa kadalanan, atong ikasabod ang daghang binhi sa kamatuoran sa mubo lang nga panahon. (Eccl. 11:6) Lagmit ang atong mga nakaestorya mao kadtong wala sa balay sa dihang nagsangyaw kita. Busa makigbahin kita niining makapalipay ug epektibong paagi sa pagsangyaw—ang pagsangyaw sa kadalanan.