Ang Mensahe sa Diyos Kanato Pinaagi ni Jeremias
1. Unsa nga libro ang giluwatan sa 2010 nga distritong kombensiyon, ug unsay katuyoan niini?
1 Nalipay kaayo ta sa dihang giluwatan kini nga libro niadtong 2010 “Pabiling Suod Kang Jehova!” nga Distritong Kombensiyon! Gipasiugda niini nga libro ang mga leksiyon nga anaa sa mga basahon sa Jeremias ug Lamentaciones alang sa atong adlaw-adlawng pagkinabuhi. (Rom. 15:4) Gidisenyo kini alang sa Pagtuon sa Kongregasyon sa Bibliya, ug kini tun-an sugod sa semana sa Nobyembre 5, 2012.
2. Nganong mapuslanon ang pagtuon sa mga basahon sa Jeremias ug Lamentaciones?
2 Mapuslanon Karon: Si Jeremias, ang magsusulat niining inspiradong basahon sa Bibliya, nanagna sa dihang gubot ang kahimtang sa nasod sa Juda. Sa sinugdan, siya mibating dili kuwalipikado sa iyang asaynment. (Jer. 1:6) Siya usab gilutos sa iyang mga higala ug tingali sa iyang mga paryenteng naggikan sa Anatot nga iyang yutang natawhan. (Jer. 11:21, 22) Busa may panahong siya nagmagul-anon. (Jer. 20:14) Samtang atong gituman ang buluhaton sa “paghimog mga tinun-an sa katawhan sa tanang kanasoran,” sagad kita makaatubang ug mga hagit sama sa nasinatian ni Jeremias. (Mat. 28:19) Ang pagtuon sa iyang mga sinulat makatabang nato nga magmasaligon ug magmasiboton sa pagtuman sa atong ministeryo.
3. Unsaon nato paggamit ang pipila ka bahin niini nga libro?
3 Mga Bahin: Ang mga tekstong giitaliko kinahanglang basahon panahon sa pagtuon. Sa kataposan sa matag eskedyul sa pagtuon may usa o duha ka makahuloganong pangutana nga bagag mga letra nga nagpasiugda sa pangunang mga punto sa tun-anan. Kinahanglang isukna kini agig repaso. Ang libro daghag nindot nga mga hulagway nga mahimong komentohan sa mamiminaw.
4. Sa unsang paagi kita bug-os makabenepisyo sa pagtuon sa librong Jeremias?
4 Aron bug-os makabenepisyo, pagtuon nga abante. Pangitag mga puntong mapadapat sa imong kinabuhi ug ministeryo. Paningkamoting makakomento ka. Sa tabang ni Jehova, malipayong natuman ni Jeremias ang iyang asaynment. (Jer. 15:16) Hinaot ang atong pagtuon niining bag-ong libro makatabang nato sa pagtuman usab sa atong ministeryo.