Dose ka Rason Kon Nganong Mosangyaw

Nganong atong isangyaw ug itudlo ang maayong balita? Ang pangunang hinungdan ba mao ang pagtabang sa matinud-anog kasingkasing nga mga tawo nga makadangat sa dalan sa kinabuhi? (Mat. 7:14) Mao kana ang unang gilista sa ubos, apan dili kana ang pangunang rason. Sa imong hunahuna, hain sa mosunod nga 12 ka rason sa pagpakigbahin sa ministeryo ang labing importante?

1. Kini makaluwas ug kinabuhi.—Juan 17:3.

2. Kini magsilbing pasidaan sa mga daotan.—Ezeq. 3:18, 19.

3. Kini maoy bahin sa katumanan sa tagna sa Bibliya.—Mat. 24:14.

4. Kini maoy kapahayagan sa pagkamatarong sa Diyos. Si Jehova dili kapasanginlan nga wala niya hatagig kahigayonan ang mga daotan nga maghinulsol una sila laglaga.—Buh. 17:30, 31; 1 Tim. 2:3, 4.

5. Kini maoy pagtuman sa atong obligasyon nga tabangan sa espirituwal ang mga tawo nga gitubos sa dugo ni Jesus.—Roma 1:14, 15.

6. Kini magpahigawas kanato sa pagkahimong sad-an sa dugo.—Buh. 20:26, 27.

7. Kini gikinahanglan aron maluwas ta.—Ezeq. 3:19; Roma 10:9, 10.

8. Kini maoy pagpakitag gugma sa atong isigkatawo.—Mat. 22:39.

9. Kini maoy pagpakita nga kita masinugtanon kang Jehova ug sa iyang Anak.—Mat. 28:19, 20.

10. Kini maoy bahin sa atong pagsimba.—Heb. 13:15.

11. Kini maoy kapahayagan sa atong gugma sa Diyos.—1 Juan 5:3.

12. Kini makatabang sa pagbalaan sa ngalan ni Jehova.—Isa. 43:10-12; Mat. 6:9.

Siyempre, dili lang kini ang mga rason kon nganong nakigbahin ta sa ministeryo. Pananglitan, ang pagsangyaw makapalig-on sa atong pagtuo ug maghatag kanatog pribilehiyo nga mahimong isigkamagbubuhat sa Diyos. (1 Cor. 3:9) Apan, ang labing importanteng rason kon nganong nakigbahin ta sa ministeryo mao ang numero 12. Bisan unsa pay sanong sa mga tawo, ang ministeryo makatabang sa pagbalaan sa ngalan sa Diyos, ug nga pinaagi niana matubag ni Jehova ang usa nga nagatamay kaniya. (Prov. 27:11) Sa pagkatinuod, duna kitay maayong mga rason nga ‘dili mohunong sa pagpanudlo ug sa pagpahayag sa maayong balita.’—Buh. 5:42.