Aron Masangyawan Sila, Pangitaa Una Sila
1. Sa mga dapit nga daghag pinulongan, nganong ang mga teritoryo sa kongregasyon giasayn sumala sa pinulongan?
1 Sa Pentekostes 33 K.P., pagkadawat sa mga tinun-an ni Jesus sa balaang espiritu, sila “misugod sa pagsulti sa lainlaing mga pinulongan” ngadto sa mga dumuluong nga gikan sa lagyong bahin sa yuta. (Buh. 2:4) Ingong resulta, mga 3,000 ang nabawtismohan. Makapaikag, ang kadaghanang dumuluong daw nagsulti usab ug usa ka pinulongan nga nasabtan sa tanan, lagmit Hebreohanon o Grego. Apan ang kabubut-on ni Jehova mao nga imantala kanila ang mensahe sa Gingharian diha sa ilang lumad nga pinulongan. Tino nga usa ka rason niana mao nga ang mga tawo sagad mas mosanong sa maayong balita kon kini madungog sa lumad nilang pinulongan. Busa sa mga dapit nga daghag pinulongan, ang mga teritoryo sa kongregasyon karon giasayn sumala sa pinulongan. (Organisado, p. 107, par. 1-2) Ang mga grupo nga langyawg pinulongan wala pay kaugalingong teritoryo, apan sila magsangyaw niadtong nagsulti sa ilang pinulongan diha sa teritoryo sa nag-esponsor nga kongregasyon ug ubang kongregasyon sa duol.
2. (a) Unsa ang buluhatong pagpangita, ug diin kini angayng himoon? (b) Sa unsang paagi ang mga kongregasyon magtinabangay sa pagkobreg teritoryo nga daghag pinulongan? (c) Unsay angay natong buhaton kon makakaplag tag interesado nga langyawg pinulongan?
2 Kon nagpuyo ka sa dapit nga ang tanan usa rag pinulongan, makasangyaw ka ra sa balay ug balay. Apan, lahi ang kahimtang kon nagpuyo ka sa siyudad nga daghag pinulongan. Basig ang mga kongregasyon nga langyawg pinulongan nagsangyaw usab sa samang dapit. Bisan pag ang mga kongregasyon magpahibalo kaninyo nga may nakaplagan silang pareho ninyog pinulongan, ang inyong kongregasyon o grupo ang pangunang may responsabilidad nga mangitag mga tawong masangyawan. (Tan-awa ang kahong “Magtinabangay sa Usag Usa.”) Busa, angay ninyong himoon ang buluhatong pagpangita aron makaplagan ang mga tawong nagsultig usa ka langyawng pinulongan. Unsaon kini paghimo?
3. Unsay angayng tagdon sa kongregasyon o grupo sa pagdesidir kon asa mangita ug unsa ka daghang panahon ang igahin alang niana?
3 Pag-organisar sa Buluhatong Pagpangita: Ang panahong igahin sa buluhatong pagpangita diha sa dapit nga daghag pinulongan nagdepende sa lokal nga mga kahimtang. Pananglitan, pila ka tawo sa komunidad ang nagsulti sa pinulongan? Pila ang mga magmamantala? Pila na ka adres ang nahuptan sa kongregasyon o grupo? Ang kongregasyon dili kinahanglang mogugol ug parehong gidaghanon sa panahon sa matag teritoryo apan mahimong magpokus sa mga lugar nga daghag molupyo sulod sa ilang teritoryo ug sa mga lugar nga dili kaayo layo. Hinuon, hinungdanon nga maorganisar pag-ayo ang buluhatong pagpangita aron labing daghan ang mahatagag kahigayonan sa pagtawag sa ngalan ni Jehova.—Roma 10:13, 14.
4. (a) Unsaon pag-organisar ang buluhatong pagpangita? (b) Unsay pipila ka paagi sa pagpangita niadtong nagsulti sa pinulongan sa imong kongregasyon o grupo?
4 Aron dili madoble ang pagkobre sa mga teritoryo, ang buluhatong pagpangita angayng organisahon ug dumalahon sa lawas sa mga ansiyano, ilabina sa magtatan-aw sa pag-alagad. (1 Cor. 9:26) Ang lawas sa mga ansiyano sa nag-esponsor nga kongregasyon magpilig usa ka kuwalipikadong brader, ansiyano o ministeryal nga alagad, aron manguna sa grupo nga langyawg pinulongan. Daghang kongregasyon ug grupo dunay sistematikong kahikayan alang sa pasiunang pagsusi, tingali ginamit ang directory o Internet sa pagpangitag apelyido nga komon sa usa ka pinulongan. Unya himoon ang buluhatong pagpangita pinaagig telepono o pagduaw aron matino kon unsang mga adres ang angayng ilakip sa teritoryo. Kon praktikal, mahimong hikayon sa lawas sa mga ansiyano sa kongregasyong nag-esponsor sa grupo nga ang tibuok kongregasyon makig-ambit usahay sa buluhatong pagpangita.—Tan-awa ang kahong “Kon Unsaon Pagpangita Niadtong Nagsulti sa Pinulongan sa Imong Kongregasyon o Grupo.”
5. (a) Unsay pipila ka sugyot alang sa mga magmamantala nga nakig-ambit sa buluhatong pagpangita? (b) Unsay isulti nato sa mga tawo dihang nakig-ambit sa buluhatong pagpangita?
5 Kinahanglang tin-aw ang atong katuyoan kon nganong nakig-ambit ta sa buluhatong pagpangita. Sanglit bahin kini sa ministeryo, ang atong besti kinahanglang sama nianang nagsangyaw ta. Ang pagbansay sa mga presentasyon ug paggamit sa pinulongan samtang mangita nakatabang sa daghan nga mahuptan ang ilang kadasig ug mas mahanas sa pinulongan. Ang oras nga gigamit sa pagpangita atong ikataho apan dili ang oras nga gigamit sa paggamag mga mapa sa teritoryo ug listahan. Kon may makaplagan tang nagsulti sa langyawng pinulongan, maningkamot tang ipaambit ang maayong balita ug ipahibalo dayon sa magtatan-aw sa pag-alagad o sa usa nga iyang giasayn aron idugang sa rekord sa teritoryo, interesado man ang maong tawo o dili. Bisag hinungdanon ang buluhatong pagpangita, angayng balanse ta ug makig-ambit sa tanang bahin sa ministeryo.—Tan-awa ang kahong “Kon Unsay Isulti Diha sa Buluhatong Pagpangita.”
6. Unsay linaing mga hagit sa pagpangitag mga amang?
6 Pagpangitag mga Amang: Ang pagpangitag mga amang dunay linaing mga hagit ug nagkinahanglag paningkamot ug lahutay. Ang amang dili mailhan base sa iyang ngalan, dagway, o besti. Gawas pa, ang mga membro sa pamilya ug higala basin mapanalipdanon ug manuko sa paghatag ug impormasyon ngadto sa mga magmamantala. Ang mosunod nga mga sugyot sa pagpangitag mga amang basin makatabang usab niadtong nangitag langyaw ug pinulongan.
7. (a) Unsaon nimo pagpangitag mga amang diha sa residensiyal nga mga dapit? (b) Unsay atong mahimo aron mawala ang pagduda sa tagbalay?
7 Ang mga kongregasyon ug grupo sa senyas nga pinulongan nagmalamposon sa pagpangitag mga amang diha sa residensiyal nga mga dapit. Mahimo nimong pangutan-on ang tagbalay kon duna siyay silingan, katrabaho, o eskolmet nga amang. O kaha nakakita siyag karatula sa kalye nga nagpasidaan nga may mga batang amang sa maong dapit. Tingali siya may paryenteng amang. Hinumdomi nga basin dudahan ang imong tuyo sa pagduaw. Apan, mahimong mawala ang pagduda sa tagbalay kon ikaw mahigalaon ug magpatin-aw sa imong tuyo sa mubo, matinud-anon, ug ligdong nga paagi. Nakabatog maayong resulta ang pipila sa dihang ilang gipakita ang Bibliya ug ubang DVD diha sa senyas nga pinulongan, ug giingnan ang tagbalay nga buot nilang ipaambit sa mga amang ang paglaom nga anaa sa Bibliya. Kon ang tagbalay magpanuko sa paghatag ug impormasyon, mahimong ibilin nimo ang imong adres o imbitasyon sa tigom sa kongregasyon aron ihatag sa iyang paryente o higala nga amang.
8. Sa unsang paagi ang usa ka silingang kongregasyon makatabang sa kongregasyon sa senyas nga pinulongan?
8 Usa o duha ka adlaw sa usa ka tuig, ang kongregasyon sa senyas nga pinulongan makaimbitar sa usa ka silingang kongregasyon nga nagsultig laing pinulongan sa pagtabang kanila sa pagpangitag mga amang diha sa usa ka bahin sa ilang dakong teritoryo. Sa tigom sa dayon nang pagsangyaw nga dumalahon sa kongregasyon sa senyas nga pinulongan, mahimong ilakip ang instruksiyon bahin sa kalihokan ug ang usa ka pasundayag. Ang matag grupo sa magmamantala asaynag labing menos usa nga gikan sa kongregasyon sa senyas nga pinulongan ug hatagag mapa sa teritoryo nga kobrehan.
9. Unsaon paghimo ang buluhatong pagpangita diha sa dapit diin ang mga amang magtapoktapok ug maglulinghayaw o makabatog mga serbisyo?
9 Mahimo usab nga mangitag mga amang diha sa mga dapit diin sila magtapoktapok ug maglulinghayaw o makabatog mga serbisyo nga gitanyag sa komunidad. Ang mga magmamantala angayng magbesti nga haom sa kalihokan. Magmaalamon ug makig-estorya lang sa usa o duha ka amang inay sa tibuok grupo. Kon maayog resulta ang pagpakig-estorya, mahimo mong maghatagayg adres o numero sa cellphone.
10. Unsaon nato pagpangitag mga amang diha sa mga dapit sa negosyo?
10 Ang laing paagi mao ang paggamag mapa sa mga dapit sa negosyo ug unya pagduaw kanila sa nahiangayng panahon. Ang usa ka mapa mahimong dunay ubay-ubayng gasolinahan. Tingali ang lain may mga dry cleaner, laundry shop, restawran, hotel, o laing matang sa negosyo. Kon ang matag mapa dunay samang matang sa negosyo, ang mga magmamantala makagamit ug usa ra ka presentasyon mao nga sila mas mahanas. Pananglitan, sanglit ang mga hotel sagad may kustomer nga mga amang, ikasaysay nato sa mubo ang atong buluhaton ngadto sa desk clerk ug ibilin ang DVD ug imbitasyon sa tigom sa kongregasyon sulod sa enbelop aron ihatag sa mga kustomer nga amang. Sa pipila ka negosyo mahimo rang mangutana ta kon may mga trabahante o kustomer ba silang amang. Kon dunay eskuylahan sa amang diha sa teritoryo, makahatag tag pipila sa atong mga publikasyon nga anaa sa DVD para sa ilang librarya.
11. Nganong ang buluhatong pagpangita hinungdanong bahin sa ministeryo?
11 Hinungdanong Buluhaton: Dakong trabaho ang pagpangitag mga tawo nga nagsultig langyawng pinulongan. Dugang pa, kay ang mga tawo sigeg balhin, lisod ang paghupot ug eksaktong rekord. Bisan pa niana, ang buluhatong pagpangita hinungdanong bahin sa ministeryo diha sa nagkadaghang dapit. Si Jehova, kinsa nagsugo kanato sa pagsangyaw, dili mapihigon. (Buh. 10:34) Ang iyang “kabubut-on mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:3, 4) Busa, hinaot mokooperar kita kang Jehova ug sa usag usa sa pagpangitag mga tawo sa tanang pinulongan nga may “maputli ug maayong kasingkasing.”—Luc. 8:15.
[Kahon sa panid 5]
Magtinabangay sa Usag Usa
Kon ang kongregasyon o grupo nagkinahanglag tabang sa ilang buluhatong pagpangita, kontakon sa magtatan-aw sa pag-alagad ang mga ansiyano sa silingang mga kongregasyon. Labing maayo nga ang kontakon lamang mao ang mga kongregasyon nga dili kaayo layo o may daghang molupyo nga nagsulti sa maong pinulongan. Ang nakontak nga mga kongregasyon magpahibalo sa ilang mga magmamantala nga kon may makaplagan silang nagsulti sa maong pinulongan, isulat nila ang adres ug ihatag kana sa magtatan-aw sa pag-alagad nga magpasa niana ngadto sa kongregasyon o grupo nga nangayog tabang. Ang magtatan-aw sa pag-alagad sa mga kongregasyong nalangkit makahimog praktikal nga kahikayan sa pagkobre sa teritoryo nga daghag pinulongan ug sa pagtultol sa mga interesado ngadto sa nahiangayng kongregasyon o grupo.
Kon ang mga magmamantala may makaplagang langyawg pinulongan nga interesado gayod (o amang), ilang pil-apan dayon ang porma nga Please Follow Up (S-43) ug ihatag sa sekretaryo sa kongregasyon. Pinaagi niini ang tawo matabangan dayon sa espirituwal.—Tan-awa ang km 5/11 p. 3.
[Kahon sa panid 6]
Kon Unsaon Pagpangita Niadtong Nagsulti sa Pinulongan sa Imong Kongregasyon o Grupo
• Mangutana sa uban—mga estudyante sa Bibliya, membro sa pamilya, katrabaho, ug uban pa.
• Gamita ang telephone directory sa pagpangitag apelyido nga komon sa usa ka pinulongan. Ang reverse directory nga naghan-ay sa mga apelyido sumala sa adres tingali mabatonan pinaagi sa Internet o sa kompaniya sa telepono.
• Magmaalamon sa dihang mangutana sa mga dapit nga nagtanyag ug mga serbisyo sa publiko, sama sa mga librarya, opisina sa gobyerno, ug kolehiyo.
• Pangitag mga anunsiyo diha sa lokal nga mantalaan bahin sa publikong mga kalihokan nga gihikay sa mga langyaw.
• Adtoa ang mga tindahan ug dapit sa negosyo nga may mga serbisyo alang sa mga langyaw.
• Kon may permiso, magbutag lamesa sa literatura diha sa dapit sa negosyo, student center sa unibersidad, o sa terminal diin mag-adtoan ang mga langyaw.
• Kon itugot sa balaod sa inyong nasod, palit ug commercial directory o computer program nga mangitag publikong mga site sa Internet.
[Kahon sa panid 7]
Kon Unsay Isulti Diha sa Buluhatong Pagpangita
Ang pagsulti dayon sa imong tuyo sa mahigalaon ug sinserong paagi makapawala sa pagduda. Sagad makatabang nga magpakita unag literatura diha sa langyawng pinulongan.
Human motimbaya, ikaw makaingon: “Nangita mig mga tawo nga nagsultig ․․․․․ aron ipaambit ang paglaom sa Bibliya kanila. May kaila ka bang puwede namong ikaestorya?”
Kon mangitag amang, ikaw makaingon: “Hello. Duna koy ipakita nimo. [Gamita ang portable video player ug i-play ang usa ka teksto gikan sa New World Translation—On DVD.] Usa kini ka bahin sa Bibliya diha sa American Sign Language. Gawas pa sa Bibliya, may ubay-ubay ming libreng video nga makatabang sa mga amang sa pagkat-on sa Bibliya. May kaila ka bang amang o bungol nga naggamit ug senyas nga pinulongan?” Kon ang tagbalay walay mahinumdoman, maayong maghisgot kag pipila ka dapit diin siya nakakita tingalig amang, sama sa trabahoan, eskuylahan, o silinganan.