Pangandam sa Memoryal Uban ang Malipayong Kasingkasing
1. Unsang linaing kahigayonan ang atong mahimo panahon sa Memoryal?
1 Ang Memoryal sa Martes, Marso 26, maoy maayo kaayong kahigayonan nga kita magmaya sa gitagana sa Diyos aron kita maluwas. (Isa. 61:10) Bisag wala pa ang maong okasyon, makapangandam tag maayo kon kita magmalipayon. Sa unsang paagi?
2. Nganong mangandam ta sa pagsaulog sa Memoryal?
2 Pagpangandam sa Pagsaulog: Ang Panihapon sa Ginoo maoy solemne ug simple nga pagsaulog. Apan, kinahanglan gihapon ning planohon daan aron walay malimtang hinungdanong butang. (Prov. 21:5) Kinahanglang pilion ang oras ug dapit. Paneguroang husto ang mga emblema. Ang tigomanan angayng hinloan ug andamon. Kinahanglang mangandam pag-ayo ang mamumulong, ug ang mga atendant ug tigsilbi organisahon pag-ayo. Lagmit nahimo na ang kadaghanan niini. Tungod kay gipabilhan nato ang halad lukat, mangandam ta pag-ayo niining sagradong okasyon.—1 Ped. 1:8, 9.
3. Unsaon nato pag-andam ang atong kasingkasing alang sa Panihapon sa Ginoo?
3 Pag-andam sa Kasingkasing: Hinungdanon usab nga andamon ang atong kasingkasing aron masabtan ang tinuod nga diwa sa Memoryal. (Esd. 7:10) Busa, gahinan natog panahon ang gieskedyul nga pagbasa sa Bibliya alang sa Memoryal ug dayon palandongon ang kataposang mga adlaw sa kinabuhi ni Jesus sa yuta. Ang pagpamalandong sa pagsakripisyo ni Jesus motukmod kanato sa pagsundog kaniya.—Gal. 2:20.
4. Unsang kaayohan sa halad lukat ang makahatag kanimog tumang kalipay?
4 Ang kamatayon ni Jesus magbindikar sa pagkasoberano ni Jehova ug magpahigawas kanato sa sala ug kamatayon. (1 Juan 2:2) Pinaagi niini, mabatonan nato ang pakigdait sa Diyos ug kinabuhing walay kataposan. (Col. 1:21, 22) Kini motabang usab nato nga magmadeterminado sa pagkinabuhi sumala sa atong pagpahinungod kang Jehova ug magpabiling lig-on ingong mga tinun-an ni Kristo. (Mat. 16:24) Samtang mangandam ug motambong sa umaabot nga Memoryal, hinaot nga ikaw mas magmalipayon!