Nganong Kita Mosangyaw?
1. Sa unsang paagi ang atong gugma nalangkit sa atong ministeryo?
1 Ang pagsangyaw sa maayong balita sa Gingharian sa Diyos mao ang labing hinungdanong buluhaton karon. Sa pagkatinuod, pinaagi niini nga buluhaton atong gisunod ang duha sa kinadak-ang sugo, nga mao, ang paghigugma kang Jehova ug sa atong isigkatawo. (Mar. 12:29-31) Ang gugma maoy makapalihok nato nga magmasiboton ingong mga ministro.—1 Juan 5:3.
2. Sa unsang paagi ang atong pagsangyaw nagpakitag gugma kang Jehova?
2 Gugma Kang Jehova: Kay gihigugma nato ang atong kinasuorang Higala, si Jehova, kita mosangyaw sa pagdepensa kaniya. Mga 6,000 na ka tuig nga gipasipad-an ni Satanas ang iyang ngalan. (2 Cor. 4:3, 4) Busa ang mga tawo nagtuo nga ang Diyos nagpaantos sa mga makasasala diha sa impiyernong kalayo, nga siya misteryosong Trinidad, ug nga siya walay kahingawa sa tawo. Daghan gani ang nag-ingong siya wala maglungtad. Gusto gayod nato nga ang mga tawo mahibalo sa kamatuoran bahin sa atong langitnong Amahan! Ang atong pagkamakugihon ingong iyang mga saksi maghatag ug dakong kalipay sa Diyos ug magpanghimakak kang Satanas.—Prov. 27:11; Heb. 13:15, 16.
3. Sa unsang paagi ang atong ministeryo nagpakitag gugma sa isigkatawo?
3 Gugma sa Isigkatawo: Sa matag higayon nga duna tay sangyawan, gipasundayag nato ang atong gugma kaniya. Niining malisod nga panahon, kinahanglan gayong madunggan sa mga tawo ang maayong balita. Daghan ang sama sa mga taga-Nineve sa adlaw ni Jonas nga “wala mahibalo sa kalainan tali sa ilang tuong kamot ug sa ilang wala.” (Jon. 4:11) Ang atong ministeryo nagtudlo sa mga tawo kon unsaon pagkinabuhi nga malipayon ug malamposon. (Isa. 48:17-19) Kini naghatag kanilag paglaom. (Roma 15:4) Kon sila magpatalinghog ug magpadapat sa ilang natun-an, sila “maluwas.”—Roma 10:13, 14.
4. Unsa ang dili gayod kalimtan ni Jehova?
4 Ang maayong mga anak mahigugma sa ilang ginikanan dili sa pipila lang ka panahon, kondili sa tanang panahon. Sa susama, tungod sa atong dakong gugma sa Diyos ug sa isigkatawo, kita mangitag kahigayonan nga mosangyaw sa tanang panahon, dili lang sa gieskedyul nga panahon sa pagsangyaw. Kita mosangyaw nga walay hunong. (Buh. 5:42) Kini nga gugma dili gayod kalimtan ni Jehova.—Heb. 6:10.