Gamita ang Atong Web Site sa Pagtudlo sa Imong mga Anak
1. Sa unsa gidisenyo ang seksiyong “Mga Bata” sa atong Web site?
1 Ang atong Web site nga jw.org/ceb gidisenyo aron mainteres ang tanang tawo. Ang seksiyong “Mga Bata” (i-click ang Mga Doktrina sa Bibliya > Mga Bata) motabang sa mga bata ug sa ilang ginikanan nga masuod sa usag usa ug kang Jehova. (Deut. 6:6, 7) Unsaon nimo paggamit kini sa pagtudlo sa imong mga anak?
2. Unsay imong himoon aron makapili kag haom nga materyal para sa imong mga anak?
2 Ipasibo ang Materyal: Lainlain ang panginahanglan sa matag bata. (1 Cor. 13:11) Busa, unsay imong himoon aron makapili kag haom nga materyal para sa imong mga anak? Pangutan-a ang kaugalingon: ‘Unsay makapainteres kanila? Masabtan kaha ni nila? Dali ra ba silang laayan?’ Para sa mga tres anyos paubos, gamita ang mga estorya diha sa “Akong Leksiyon sa Bibliya.” Ang ubang pamilya ganahan sa mga estorya diha sa “Tudloi ang Imong mga Anak.” Dugang pa, susiha ang mosunod nga kapilian.
3. Sa unsang paagi magamit sa mga ginikanan ang mga estorya ug kalingawan diha sa seksiyong “Himoonon Para sa Pamilyahanong Pagsimba”?
3 Himoonon Para sa Pamilyahanong Pagsimba: Kini makatabang sa mga ginikanan sa pagtuon uban sa ilang mga anak. Aron mahibaloan kon unsaon paggamit ang matag estorya ug kalingawan, i-click ang “I-download” ug basaha ang “Giya sa Ginikanan.” Gamita ang mga hulagway, sama sa panid nga koloran, sa pagtudlo sa gagmayng mga anak. Tabangi ang dagko-dagkong mga anak sa pagtubag sa mga leksiyon. Ang matag himoonon nalangkit sa samang estorya sa Bibliya o leksiyon, busa bisag pilay edad sa mga bata, sila makapakigbahin sa pamilyahanong pagsimba.
4. Unsay sulod sa seksiyong “Mahimong Higala ni Jehova”?
4 Mahimong Higala ni Jehova: Ang mga video, awit, ug mga kalingawan niini nga seksiyon makatabang sa pagsilsil sa Pulong sa Diyos ngadto sa mga anak. (Deut. 31:12) Ang matag video nagtudlog hinungdanong leksiyon. Kini gipasiugda diha sa search-and-find nga mga dula. Dugang pa, ang mga awit motabang sa mga bata sa paghinumdom sa ilang nakat-onan. Kay ganahan man silang mokanta, regular nga i-upload ang mga awit sa Gingharian ug ang pangbata nga mga awit.
5. Nganong ang mga ginikanan angayng moampo kang Jehova nga tabangan sila sa pagtudlo sa kamatuoran ngadto sa ilang mga anak?
5 Mga ginikanan, buot ni Jehova nga magmalamposon kamo. Busa pag-ampo kaniya nga tabangan kamo sa pagtudlo sa kamatuoran ngadto sa inyong mga anak. (Maghu. 13:8) Sa tabang ni Jehova, inyong mabansay sila nga mahimong “maalamon alang sa kaluwasan pinaagi sa pagtuo maylabot kang Kristo Jesus.”—2 Tim. 3:15; Prov. 4:1-4.