Batasana ang Pag-abot sa Hustong Oras
1. Unsang panig-ingnan ang gipakita ni Jehova?
1 Si Jehova kanunayng untop sa panahon. Pananglitan, siya nagtagana sa iyang mga alagad ug “tabang sa hustong panahon.” (Heb. 4:16) Naghatag usab siyag espirituwal nga “pagkaon sa hustong panahon.” (Mat. 24:45) Busa makasalig kita nga ang nagsingabot nga adlaw sa iyang kasuko “dili maulahi.” (Hab. 2:3) Mapasalamaton kaayo kita nga si Jehova untop sa panahon! (Sal. 70:5) Tungod sa atong pagkapuliki ug pagkadili-hingpit, dili gyod sayon nga mahimong untop. Apan nganong angay nato kining batasanon?
2. Nganong ang pag-abot sa hustong oras makapasidungog kang Jehova?
2 Niining kataposang mga adlaw, diin daghan ang mahigugmaon sa kaugalingon ug walay pagpugong sa kaugalingon, ang pagkauntop sa panahon wala na kaayo hatagig pagtagad. (2 Tim. 3:1-3) Busa, kon ang mga Kristohanon moabot sa hustong oras sa trabahoan, appointment, ug mga tigom, mamatikdan kini sa uban ug mapasidunggan si Jehova. (1 Ped. 2:12) Kita ba pirmeng moabot sa trabahoan sa hustong oras, pero sagad maulahi sa teokratikanhong mga kalihokan? Ang pag-abot sa hustong oras sa Kristohanong mga tigom, sa wala pa ang pangbukas nga awit ug pag-ampo, nagpakita nga gusto natong sundogon ang pagkaorganisado sa atong langitnong Amahan.—1 Cor. 14:33, 40.
3. Nganong ang pag-abot sa hustong oras nagpakita nga kita dunay konsiderasyon sa uban?
3 Ang pag-abot sa hustong oras nagpakita usab nga kita dunay konsiderasyon sa uban. (Filip. 2:3, 4) Pananglitan, kon kita moabot ug sayo sa Kristohanong mga tigom, apil na sa mga tigom alang sa pagsangyaw, dili mahasol ang mga igsoon. Sa laing bahin, kon kita pirmeng maulahi, kini makahatag ug impresyon nga wala kitay pagpabili sa ilang panahon. Ang pag-abot sa hustong oras nagpakita nga kita kasaligan ug kugihan—mga hiyas nga pabilhan sa mga tawong atong makauban.
4. Kon kita kanunayng maulahi, unsay atong himoon aron mouswag?
4 Kon kanunay kang maulahi, palandonga kon unsay mga rason. Aron mahimong organisado, paghimog realistikong eskedyul aron matapos ang imong buluhaton sa gitakdang panahon. (Eccl. 3:1; Filip. 1:10) Pangayog tabang kang Jehova. (1 Juan 5:14) Ang pag-abot sa hustong oras maoy usa ka paagi sa pagpakitag apresasyon sa duha ka kinadak-ang sugo sa Balaod—ang paghigugma sa Diyos ug paghigugma sa isigkatawo.—Mat. 22:37-39.