100 ka Tuig nga Pagmantala sa Gingharian!
1. Mga 100 ka tuig kanhi, unsay giawhag nga himoon sa katawhan ni Jehova?
1 ‘Tan-awa, ang Hari nagmando! Kamo ang iyang mga magwawali. Busa imantala, imantala, imantala, ang Hari ug ang iyang gingharian.’ Kining puwersadong mga pulong ni Brader Rutherford mga 100 ka tuig kanhi nag-awhag sa katawhan ni Jehova sa pagpakaylap sa mensahe sa Gingharian. Ug nahimo gayod nato kana! Sama sa unang mga Kristohanon, atong nasangyaw ang maayong balita sa Gingharian “sa tibuok kalalangan ilalom sa langit.” (Col. 1:23) Unsay atong nalampos sa miaging 100 ka tuig sa pagmantala sa Gingharian sa Diyos? Unsa pay atong mahimo sa pagmantala niini samtang nagkaduol ang ika-100 nga anibersaryo sa pagkatukod sa Gingharian?
2. Giunsa pagmantala sa atong mga basahon ang Gingharian sa Diyos?
2 Ang Nahimo Na: Sa daghang katuigan, ang atong mga basahon nagmantala sa Gingharian sa Diyos. Sukad sa 1939, ang atong pangunang magasin nag-ulohang Ang Bantayanang Torre Nagapahayag sa Gingharian ni Jehova. Kining magasina kanunayng naghisgot sa Gingharian ug kon unsay himoon niini. Ang magasing Pagmata! usab nagpaila sa Gingharian sa Diyos ingong bugtong paglaom sa katawhan. Busa haom nga kining mga magasina ang kinadaghanag hubad ug kinadaghanang napanagtag sa kalibotan!—Pin. 14:6.
3. Unsang mga paagi ang atong gigamit sa pagmantala sa Gingharian?
3 Ang katawhan ni Jehova naggamit ug daghang paagi sa pagmantala sa Gingharian. Sa una, naggamit tag ponograpo ug sakyanan nga may trompa, ug nagsibya ta sa radyo. Nakatabang kini nga masangyaw ang maayong balita sa daghang tawo bisag diyutay pa lang niadto ang mga magmamantala sa Gingharian. (Sal. 19:4) Di pa dugay, atong gigamit ang jw.org mao nga minilyon ang nasangyawan—bisan sa mga nasod nga gidili ang pagsangyaw.
4. Unsay atong espesyal nga mga kahikayan sa pagsangyaw?
4 Ang katawhan ni Jehova naghimo usab ug espesyal nga mga kahikayan sa pagpakaylap sa mensahe sa Gingharian. Pananglitan, sugod sa tungatunga sa dekada 1990, mihimo tag dugang pamaagi sa pagsangyaw. Gawas sa pagpamalaybalay, nagsangyaw ta sa mga parke, parkinganan, tindahan, ug opisina. Di pa dugay, atong gisugdan ang publikong pagsangyaw sa dagkong mga siyudad (metropolitan public witnessing) sa tibuok kalibotan. Daghang kongregasyon sab ang nakigbahin sa publikong pagsangyaw sa ilang teritoryo (local public witnessing) gamit ang lamesa ug cart nga giplastar sa mga lugar nga daghag tawo. Siyempre, ang pagpamalaybalay gihapon ang atong pangunang paagi sa pagsangyaw sa Gingharian.—Buh. 20:20.
5. Sa bag-ong tuig sa pag-alagad, unsang mga pribilehiyo ang bukas kanato?
5 Ang Himoon Pa: Inigsugod sa bag-ong tuig sa pag-alagad sa Septiyembre, daghan ang mag-regular payunir. Moaplay ba pod ka? Kon dili, maka-oksilyare payunir ka ba? Makapayunir ka man o dili, panalanginan gyod ni Jehova ang paghimo nimo sa imong maarangan sa pagmantala sa Gingharian.—Mal. 3:10.
6. Nganong espesyal ang Oktubre 2014?
6 Ang bulan sa Oktubre 2014 mao ang ika-100 nga anibersaryo sa pagkatukod sa Gingharian. Busa, ang publikong edisyon sa Bantayanang Torre nianang bulana maghisgot bahin sa Gingharian sa Diyos. Gidasig ang tanan nga himoon ang maarangan sa pagpahimutang ug daghang magasin. Hinaot ang matag usa magpadayon sa ‘pagpahayag sa maayong balita sa gingharian sa Diyos.’—Buh. 8:12.