Panganunsiyo Gamhanang Hinagiban sa Kristiyanidad

SA PAGKAMATAY ni Jesu-Kristo, ang unang mga Kristohanon natibulaag ug gilutos. Nagsaysay si Propesor K. S. Latourette diha sa iyang History of Christianity: “Tungod kay sila dili moapil sa paganong mga seremonya ang mga Kristohanon gitawag mga ateyista. Pinaagi sa ilang paglikay . . . sa paganong mga piyesta, kay alang sa mga Kristohanon ang publikong mga kalingawan natusaktusakan sa paganong mga tinuohan, mga tulomanon, ug mga imoralidad—sila gitamay ingong mga tigdumot sa tawhanong banay.”

Talagsaon gayod nga ang Kristiyanidad nakalahutay ug miuswag sa tibuok nailhang kalibotan niadto atubangan sa dakong pagsupak. Sa unsang paagi nahimo kadto? Bahin sa sekreto nahisandig sa pagwali o pagmantala!

Sa pagbatbat sa buluhaton ni Jesus ingong makapadaning magwawali ug magtutudlo, si Propesor C. J. Cadoux misulat diha sa The Early Church and the World: “Ang buluhaton sa pagdani kinahanglang buhaton pinaagi sa mga pulong ug mga binuhatan. Busa, lagmit may dakong pagmantala diha sa iyang kinabuhi ug pagpanudlo. . . . Daghan sa iyang unang pagpanudlo—ingon man sa iyang mga disipulo—gipahayag sa publiko.” Sa pagkomento sa dugang bahin sa kalihokan sa mga disipulo sa pagkamatay ni Jesus, si Cadoux nagpadayon: “Gipangita ang pagmantala. Gipahayag sa mga saksi ang ilang pamatuod uban ang dayag nga pagkaprangka.”

Unsang matang sa mga tawo ang atong gihisgotan? Nagsaysay si Edmond de Pressensé diha sa The Early Years of Christianity: “Ang pagpanudlo . . . maoy wala-tun-i nga pagpahayag, nga naggikan sa kasingkasing. Ang mga Apostol dili mao lamang ang mga mamumulong; ang ubang Kristohanon namulong nga walay pag-ukon-ukon sama kanila bahin sa kahibulongang mga buhat sa Diyos.” Ang mga Kristohanon mao ang ilang kaugalingong mga ahente sa publisidad, nga silang tanan maikagong ipaambit sa uban ang ilang pagtuo diha sa ilang publikong buluhaton sa pagwali ug pagpanudlo.

Si Edward Gibbon, diha sa iyang Decline and Fall of the Roman Empire, nagpunting nga “ang publikong kadalanan, nga gibuhat para gamiton sa [Romanong] kasundalohan, nagbukas sa sayon nga agianan alang sa Kristohanong mga misyonaryo gikan sa Damasco ngadto sa Corinto, ug gikan sa Italya ngadto sa kinatumyan sa Espanya o Britanya.” Si Gibbon midugang: “Adunay labing dakong katarongan sa pagtuo nga una sa mga paghari ni Diocletian ug Constantino ang pagtuo ni Kristo gikawali sa tanang probinsiya, ug sa tanang dagkong mga siyudad sa imperyo.”

Sa pagpalapnag sa ilang pagtuo, gigamit sa mga Kristohanon ang tanang galamiton nga diha. Sumala sa gibutyag sa maghuhubad sa Bibliya si Edgar Goodspeed diha sa iyang librong Christianity Goes to Press: “Sila sa talagsaong gidak-on maoy katawhang tigpalit ug tigbasag mga basahon. Sila usab maoy katawhang naghubad ug nagmantala. . . . [Sa 140 K.P.] ang Kristohanong mga magmamantala . . . migamit sa dagway sa dinahon nga basahon, ang codex, ug nakadiskobreng kadto praktikal kaayo . . . ug kombenyente nga kadto nahimong ilang kinaiyanhong dagway sa basahon.”

Panganunsiyo sa Ika-20ng Siglo

Karong adlawa, ang mga Saksi ni Jehova samang madasigon ug aktibo sa ilang unang-siglong mga katumbas sa pagmantala sa Kristohanong pagtuo sa tibuok kalibotan—ug sa paggamit sa modernong teknolohiya. Palandonga ang mosunod ika-20ng siglong mga haylait:

● 1914. “Photo-Drama of Creation.” Kining dramaha nalangkoban sa mga slide ug mga pelikula nga gipahaom sa mga rekord sa ponograpo sa mga pakigpulong ug musika. Ang proyekto maoy usa sa mga mag-uuna sa natad sa mga pelikulang may tingog.

● 1920. “Milyonmilyong Buhi Karon Dili na Gayod Mamatay.” Sa kapin sa duha ka tuig, ang mga billboard ug mga peryodiko, uban ang dakong personal nga pangampanya sa tibuok kalibotan, nagpahibalo sa maong popular nga diskurso ug sa miresultang pulyeto.

● 1922. “Imantala ang Hari ug Gingharian.” Kadto ang mahagitong tema sa Cedar Point, Ohio, kombensiyon. Ang awhag nga “imantala, imantala, imantala, ang Hari ug ang iyang Gingharian” mao ang sinugdan alang sa mga Saksi ni Jehova ingong personal nga mga magmamantala sukad niadto.

● 1924. WBBR, estasyon sa radyo sa Watch Tower Society. Gitukod sa pagpahimulos sa unang transmisyon sa radyo. Sa pagka 1933, ang kinalabwang tuig, ang network sa 408 ka estasyon gigamit sa mga Saksi ni Jehova sa pagmantala sa mensahe sa Bibliya sa unom ka kontinente.

● 1934. Mabitbit nga mga ponograpo ug 78-rpm nga mga rekord. Sulod sa pulo ka tuig ang mga Saksi ni Jehova naggamit niining moderno niadtong paagi sa komunikasyon, nga migamag mga 20,000 ka ponograpo aron itagana ang panginahanglan.

Usa ka Gamhanang Kataposang Pamatuod!

Samtang ang Gubat sa Kalibotan II nagsingabot sa kataposan sa 1945, ang mga Saksi ni Jehova nangandam nga mosulod sa nataran sa pagwali sa walay-ingong gilapdon. Si Jesus miingon nga uban ang pagtuo ang iyang mga sumusunod “magbuhat sa mga buhat nga labaw” kay sa iyang gibuhat. Kana maoy sa gilapdon sa ilang pagwali. Pagkamatuod niining tagnaa!—Juan 14:12.

Sa tuig 1987, mga tulo ka milyon upat ka gatos ka libong Saksi diha sa 210 ka nasod migugol sa kapin sa 700 milyong oras sa pagwali ug pagpanudlo. “Bisan diing bahin sa kalibotan ikaw nagapuyo, lisod nga dili makahibalag sa mga Saksi ni Jehova,” matud sa klerigo sa Church of England si Jack Roundhill, nga midugang: “Ilang ginahimo ang ilang pagsangyaw diha sa mga tiyanggihan ug gikan sa publikong mga entablado ug sa bisan diin nga sila makakitag mamiminaw. Apan ang kinaiyanhong paagi sa mga Saksi mao ang pagdala sa ilang mensahe ngadto gayod sa balay ni bisan kinsa nga mopadayon kanila. Kasagarang sila diha ra kutob sa hagdanan, ug kon mao, ilang gamiton ang ang-ang nga ilang pulpito.”

Ang panganunsiyo pinaagig binaba dakog balos, tungod sa kapin sa 230,000 ka bag-ong Saksi nga gibawtismohan sa lakaw sa tuig. Alang sa tinuig Memorial nga pagsaulog sa pagkamatay ni Jesu-Kristo, nadani nila ang halos siyam ka milyong tawo ngadto sa ilang mga Kingdom Hall.

Gikan sa ilang daghang imprentahan sa tibuok kalibotan, milyonmilyong libro, pulyeto, ug tracts nagagawas nga anam-anam nagkadaghan, diha sa kapig 200 ka pinulongan. Ang Bantayanang Torre ug Pagmata! mao ang labing kaylap napanagtag relihiyosong mga magasin sa kalibotan karong adlawa, kay may gitapong sirkulasyon nga 46 milyong kopya sa usa ka bulan. Apan sila wala gayod masudlig komersiyal nga panganunsiyo. Ug ang usa sa gahig-haping mga libro sa mga Saksi, Ang Kamatuoran nga Motultol sa Kinabuhing Dayon, may sirkulasyon nga kapig 106 milyon diha sa 116 ka pinulongan! Ang sirkulasyon sa uban pa nilang gibase-sa-Bibliyang mga libro moabot sa tinagpulo ka milyon ang matag usa.

Oo, ang mga Saksi ni Jehova andam kaayo sa pagmantala sa Hari ug sa iyang Gingharian, ang matarong nga kagamhanan nga duol nang mobanos sa pagdumala sa kahikayan sa tawo. Uban ang maong motibo, ang ilang madasigong panganunsiyo sa pagkamatuod usa ka gamhanang Kristohanong hinagiban!

[Mga Letrato sa panid 9]

Mga ponograpo gigamit sa pagwali

Sa iyang adlaw, ang panganunsiyo sa Photo-Drama nakadanig daghang mga mamiminaw

[Mga Letrato sa panid 10]

Mga Saksi karon nagawali diha sa kapin sa 200 ka kayutaan

Sa mga 54,000 ka kongregasyon, ang mga Saksi nagamantala sa Gingharian sa Diyos

Sa tibuok kalibotan, diha sa mga 200 ka pinulongan, ginatos ka milyong basahon sa Bibliya nagagawas sa mga imprentahan sama niining usa