Himoa Ninyong Sumbanan ang mga Manalagna—Si Nahum
1. Unsay atong makat-onan sa basahon ni Nahum?
1 Ang pagkalaglag sa karaang Nineve nagpamatuod nga natuman ang tagna ni Nahum, nga si Jehova manimalos sa Iyang mga kaaway ug bisag unsa sila ka bangis, dili sila makabarog batok Kaniya. (Nah. 1:2, 6) Kon atong susihon ang tagna ni Nahum, duna tay makat-onang mga leksiyon nga atong magamit sa ministeryo.
2. Unsay atong himoon aron kanunayng positibo ang atong mensahe?
2 Hupaya ug Hatagig Paglaom ang mga Tawo: Ang basahon sa Nahum morag pulos lang mensahe sa kalaglagan batok sa Nineve, ang kaulohan sa karaang Asirya. (Nah. 1:1; 3:7) Pero ang maong mensahe nakahatag ug paglaom sa katawhan ni Jehova. Si Nahum (nagkahulogang “Maghuhupay”) nagpasalig sa iyang mga isigka-Hudiyo nga hapit nang laglagon ang ilang kaaway! Siya miingon usab nga si Jehova “usa ka salipdanan sa adlaw sa kasakit.” (Nah. 1:7) Dihang mosangyaw, kita usab nagpaambit ug maayong balita ug nagdasig sa uban nga modangop kang Jehova.—Nah. 1:15.
3. Unsaon nato pagsundog si Nahum sa paggamit ug mga pananglitan o ilustrasyon?
3 Paggamit ug mga Pananglitan ug Ilustrasyon: Gigiyahan ni Jehova si Nahum nga ikomparar ang kalaglagan sa Nineve sa kalaglagan sa Thebes (No-amon), usa ka siyudad sa Ehipto nga gilaglag kaniadto sa Asirya. (Nah. 3:8-10) Dihang mosangyaw ta bahin sa kalaglagan niining daotang sistema, puwede natong hisgotan ang mga tagna nga nagpamatuod nga matuman gyod bisan ang kinagamyang detalye sa saad ni Jehova. Pananglitan, dihang gisulong sa mga Babilonyanhon ug Medianhon ang Nineve sa 632 B.C.E., ang Suba sa Tigris miawas tungod sa bunok nga ulan. Tungod niini, nalumpag ang usa ka bahin sa lig-ong paril sa siyudad. Nabihag dayon ang Nineve, sama sa gitagna ni Jehova.—Nah. 1:8; 2:6.
4. Unsay atong himoon aron klaro ug daling masabtan ang atong mensahe?
4 Kinahanglang Klaro ug Daling Masabtan: Ang paagi sa pag-asoy ni Nahum detalyado ug kulbahinam. Klaro ang iyang mensahe. (Nah. 1:14; 3:1) Kita usab angayng mogamit ug mga pulong nga daling masabtan. (1 Cor. 14:9) Sa unang pagduaw, klarong ipatin-aw ang rason sa imong pagbisita. Dihang magdumalag pagtuon sa Bibliya, tabangi ang estudyante nga makabaton ug pagtuo kang Jehova ug sa iyang Pulong ug makasabot kon unsaon kana pagpadapat.—Roma 10:14.
5. Unsang pasalig ang anaa sa tagna ni Nahum?
5 Makita nato sa basahon ni Nahum ang iyang lig-ong pagsalig nga matuman gyod ang saad ni Jehova. Samtang nagkaduol ang kataposan sa sistema ni Satanas, kita mahupay sa giingon sa Diyos: “Ang kasakit dili motungha sa ikaduhang higayon.”—Nah. 1:9.