Bag-ong mga Awit sa Pagsimba!
1 Niadtong Oktubre 4, 2014, sa tinuig nga miting sa Watch Tower Bible and Tract Society of Pennsylvania, gipahibalo nga dunay rebisyon sa atong songbok. Makapahinam gayod kadto! Gipahinumdoman ang tanang nanambong kon unsa ka importante ang mga awit sa Gingharian diha sa atong pagsimba.—Sal. 96:2.
2 Basig makaingon ka, ‘Nganong kinahanglang rebisahon ang songbok?’ Dunay pipila ka rason. Una, padayong gidalisay ang atong pagsabot sa Kasulatan, ug nakaapektar kana sa liriko sa atong mga awit. (Prov. 4:18) Laing rason sa rebisyon: Daghang termino ug ekspresyon sa atong songbok ang gikan pa sa daang edisyon sa Bag-ong Kalibotang Hubad. Ang maong mga liriko kinahanglang ipasibo sa mga pulong sa rebisadong edisyon. Dakong trabaho ang pag-update sa mga liriko, busa nadesisyonan nga magdugang na lang pod ug pipila ka bag-ong awit sa songbok.
3 Kinahanglan pa ba tang maghulat nga maimprenta ang bag-ong songbok una nato magamit ang bag-ong mga awit? Dili. Malipay mi sa pagpahibalo nga sa sunod nga mga bulan, may pipila ka awit nga i-release sa jw.org. Dihang ma-release ang usa ka bag-ong awit, gamiton kini sa paniklop nga awit sa Tigom sa Pag-alagad, nga gipaila ingong “bag-ong awit.”
4 Kon Unsaon Pagkat-on sa Bag-ong mga Awit: Dili sayon ang pagkat-on ug bag-ong awit. Pero sama sa salmista, gusto tang moawit sa mga tigom ug “dili magpakahilom.” (Sal. 30:12) Aron makakat-on ug bag-ong awit, sunda kini:
Balikbalika ug paminaw ang rekording sa piano nga i-post sa atong Web site. Sa sige nimong paminaw sa tono, mas dali kining mahinumdoman.
Tun-i ug sag-uloha ang mga liriko.
Kantaha ang liriko duyog sa tono. Himoa kana hangtod nga mamaster nimo ang awit.
Praktisag kadaghan ang bag-ong mga awit panahon sa inyong Pamilyahanong Pagsimba hangtod nga makamao na mo sa tono.
5 Sa umaabot nga mga bulan dihang gamiton ang bag-ong awit sa paniklop sa Tigom sa Pag-alagad, paminawon una sa kongregasyon ang rekording sa piano. Dayon, awiton kini duyog sa rekording sama sa naandan.
6 Sa pagkatinuod, ang pag-awit panahon sa atong mga tigom makahatag natog kalipay kay nagkahiusa tang nag-awit sa pagdayeg kang Jehova. Busa dili nato angayng batasanon nga mobiya sa atong lingkoranan panahon sa pag-awit, gawas kon gikinahanglan.
7 Dunay laing paagi aron pabilhan ang atong sagradong musika. Sa mga asembliya ug kombensiyon, naay pasiunang musika sa di pa magsugod ang sesyon. Kaduha sa usa ka tuig, may mga igsoon nga gikan sa lagyong dapit sa kalibotan ang mobiyahe ngadto sa Patterson, New York, sa kaugalingon nilang gasto, aron maghimog musika alang sa atong pagsimba. Busa dihang dapiton ta sa tsirman nga manglingkod ug maminaw sa orkestra, angay tang mosanong. Kini makatabang nato nga maandam ang atong kasingkasing alang sa impormasyon nga atong madawat.—Esd. 7:10.
8 Taposon nato ang atong tigom karon pinaagi sa pagkanta sa bag-ong awit nga “Gingharian Natukod Na—Paanhia!” Kini nga awit, nga gipaila sa di pa dugayng tinuig nga miting, espesyal nga gikomposo alang sa ika-100 nga anibersaryo sa pagkatukod sa Gingharian.
9 Ang bag-ong mga awit maoy “maayong mga butang” gikan kang Jehova. (Mat. 12:35a) Maningkamot gyod tang makakat-on sa bag-ong mga awit ug kinasingkasing kining kantahon aron kita makahatag ug nahiangayng pagdayeg ug pasidungog sa atong Diyos!—Sal. 147:1.