Atong mga Himan sa Pagpanudlo
1. Nganong gipakasama sa panday ang Kristohanong magsasangyaw?
1 Ang panday dunay lainlaing himan. Ang pipila niini gamiton lang para sa partikular nga trabaho samtang ang ubang pangunang himan kanunay niyang gamiton. Ang eksperyensiyadong panday kanunayng magdala niining pangunang mga himan, ug hanas kaayo siyang mogamit niini. Ang Bibliya nagdasig sa matag Kristohanon nga magkugi sa ministeryo ug mahimong “usa ka mamumuo nga walay angayng ikaulaw.” (2 Tim. 2:15) Unsa ang atong labing hinungdanong himan? Kini mao ang Pulong sa Diyos—ang pangunang himan nga atong gigamit sa “paghimog mga tinun-an.” (Mat. 28:19, 20) Busa kinahanglang maningkamot ta nga mahimong hanas sa ‘paggamit sa pulong sa kamatuoran sa hustong paagi.’ Pero dunay mga himan nga bisag pirme na natong gigamit sa pagpanudlo, kinahanglan pa gihapong tun-an aron epektibo natong magamit sa pagtudlo sa kamatuoran.—Prov. 22:29.
2. Unsa ang atong pangunang mga himan sa pagpanudlo?
2 Pangunang mga Himan sa Pagpanudlo: Gawas sa Bibliya, unsa pay atong magamit? Ang atong pangunang himan sa pagtudlo sa kamatuoran mao ang librong Unsay Tinuod nga Gitudlo sa Bibliya? Inigkahuman niini, atong gamiton ang librong Magpabilin Kamo sa Gugma sa Diyos aron tudloan ang estudyante sa pagpadapat sa mga prinsipyo sa Bibliya adlaw-adlaw. Busa kinahanglang mahimo tang hanas sa paggamit niining duha ka publikasyon. Duna poy mga brosyur nga atong magamit. Ang Maayong Balita Gikan sa Diyos! maoy usa sa pangunang mga himan sa pagsugod ug Bible study. Kon dunay mga tawo diha sa atong teritoryo nga dili kaayo kamao mobasa o nagsulti ug laing pinulongan diin diyutay ra o wala pay publikasyon para niana nga pinulongan, mahimo natong magamit ang Listen to God o Pamati sa Diyos ug Mabuhi Ka sa Walay Kataposan. Magamit sab nato ang brosyur nga Kinsay Nagabuhat sa Kabubut-on ni Jehova Karon? aron matabangan ang estudyante nga masinati sa organisasyon. Dunay mga video nga gamit kaayo sa paghimog tinun-an sama sa Nganong Tun-an ang Bibliya?, Unsay Ginahimo Diha sa Kingdom Hall?, ug Duna bay Ngalan ang Diyos? Kinahanglan sab natong tun-an kon unsaon kini paggamit sa epektibong paagi.
3. Sa unsang paagi kita matabangan sa umaabot nga mga isyu sa Atong Ministeryo sa Gingharian?
3 Ang umaabot nga mga isyu sa Atong Ministeryo sa Gingharian magtabang nato nga mahimong hanas sa paggamit sa pangunang mga publikasyon diha sa atong pagpanudlo. Kon maningkamot ta nga mahimong hanas sa paggamit niini nga mga himan, atong gipadapat ang inspiradong tambag: “Tagda kanunay ang imong kaugalingon ug ang imong pagpanudlo. Magpabilin niining mga butanga, kay sa pagbuhat niini pagaluwason mo ang imong kaugalingon ug kadtong mamati kanimo.”—1 Tim. 4:16.