Sangyawi ang “Tanang Matang sa Katawhan”
1. Sa unsang paagi ang epektibong mga ebanghelisador sama sa batid nga artesano?
1 Ang batid nga artesano daghag himan, ug siya nahibalo kon kanus-a ug sa unsang paagi kini gamiton. Kita usab adunay lainlaing galamiton nga motabang nato sa pagtuman sa atong buluhaton ingong mga ebanghelisador. Pananglitan, gipatik ang mga brosyur nga lainlaig ulohan aron masangyawan nato ang “tanang matang sa katawhan.” (1 Cor. 9:22) Ang insert niini nga Ministeryo naghisgot sa pipila niining mga brosyura, nagpatin-aw kon kang kinsa kini gidisenyo, ug kon unsaon kini pagtanyag.
2. Kanus-a nato itanyag ang mga brosyur diha sa ministeryo?
2 Kon Kanus-a Gamiton ang mga Brosyur: Ang artesano mogamit ug himan sa dihang kini kinahanglanon. Sa susama, motanyag tag brosyur kon nakita natong mapuslanon kini sa usa ka tawo, dili kay sa mga bulan lang nga kini ang tanyag. Pananglitan, kon ang tanyag mao ang librong Gitudlo sa Bibliya, unya ang atong gisangyawan dili Kristohanon nga wala kaayoy interes sa Bibliya, mas maayong itanyag nato ang nahiangayng brosyur ug unya na lang itanyag ang Gitudlo sa Bibliya kon naugmad na nato ang iyang interes.
3. Nganong kinahanglan tang mahanas sa paggamit sa atong mga galamiton sa pagsangyaw?
3 Gidayeg sa Kasulatan kadtong hanas sa ilang buluhaton. (Prov. 22:29) Oo, wala nay laing buluhaton karon nga mas hinungdanon pa kay sa “balaang buluhaton sa maayong balita.” (Roma 15:16) Aron mahimong “usa ka mamumuo nga walay angayng ikaulaw,” maningkamot tang mahanas sa paggamit sa atong mga galamiton.—2 Tim. 2:15.