“Pagtanyag ug Daang Magasin o Bisan Unsang Brosyur nga Makapainteres sa Tawo”

Sa miaging mga bulan nga kita nagtanyag ug librong Gitudlo sa Bibliya ug pagtuon sa unang duaw, kita gidasig sa “pagtanyag ug daang magasin o bisan unsang brosyur nga makapainteres sa tawo” kon may libro na ang tagbalay ug dili siya gustong magtuon. Ngano?

Ang mga brosyur ug daang mga magasin naghisgot ug lainlaing mga ulohan. Tingali may mabasa ang tagbalay sa usa sa maong mga publikasyon nga makatandog sa iyang kasingkasing. Busa sa dihang mosangyaw, pagdalag lainlaing brosyur ug daang mga magasin. Kon wala kay daang mga magasin, tingali may makuha kang pipila niini sa magazine counter. Kon ang tagbalay duna nay librong Gitudlo sa Bibliya ug dili gustong magtuon, pakitai siyag mga magasin o brosyur ug pangutan-a siya kon unsay iyang nagustohan. Dayon, pakigsabot nga moduaw ka pag-usab aron maugmad ang iyang interes. Basig modawat ra siyag pagtuon sa Bibliya.