Mga Brosyur—Bililhong mga Himan sa Ministeryo
1 Ang usa ka hanas nga magbubuhat nagadalag nagkadaiyang mga himan, nga ang matag usa gidesinyo alang sa usa ka tinong buluhaton. Ingong mga magmamantala sa Gingharian, kita may nagkalainlaing mga brosyur sa pagtabang kanato nga magmahanason sa atong buluhaton. (Prov. 22:29) Sa usa ka pultahan basin mahibalag nimo ang usa nga nasubo. Sa laing pultahan ang tagbalay nangandoy ug matinud-anong kagamhanan, samtang ang laing tawo nahibulong kon aduna bay bisan unsang katuyoan ang pagkinabuhi. Unsaon man nato paggamit ang atong mga brosyur sa pagtabang niining mga tawhana?
2 Sa dihang nagatanyag sa brosyur nga “Tinuod Bang may Pagtagad ang Diyos Kanato?,” makasulti ka ug sama niini:
◼ “Ang pipila ka tawo may hilig nga mopasangil sa Diyos tungod sa pag-antos ug inhustisya sa kalibotan. Sila mangatarongan nga tungod kay labing gamhanan ang Diyos, taposon gayod niya ang pag-antos kon siya tinuod nga nagatagad kanato. Unsay imong pagbati bahin niana? [Tugoting motubag.] Ang Salmo 72:12-14 nagapakita nga ang Diyos nagatagad gayod kanato. Ang pag-antos ug inhustisya dili iyang sayop. Siya nagsaad nga ang mga mamumuhat ug daotan pagalaglagon. Kini nga brosyur, Tinuod Bang may Pagtagad ang Diyos Kanato?, nagapakita kon unsay iyang pagabuhaton ug sa unsang paagi kita makabenepisyo.” Mahimong ipadayon nimo ang panaghisgot uban sa mga komento sa panid 27, parapo 22.
3 Kon gigamit nimo ang “Katuyoan sa Kinabuhi” nga brosyur, hayan gusto nimong mosugod niining paagiha:
◼ “Halos ang tanan nahibulong bahin sa katuyoan sa kinabuhi. Kini ba maoy pagkinabuhi lamang ug 70 o 80 ka tuig ug unya moadto sa lubnganan? O aduna pay labaw sa kinabuhi? Unsay imong hunahuna? [Tugoting motubag.] Dinhi sa Salmo 37:29, atong makita ang maanindot nga katuyoan sa Diyos alang sa tawo ug sa yuta.” Basaha ang teksto, ug dayon paklia ngadto sa ilustrasyon sa panid 31, ug ipadayon ang inyong panaghisgot.
4 Ang brosyur nga “Tan-awa!” mahimong ikapaila pinaagig pagpakita sa tibuok ilustrasyon sa hapin ug mangutana:
◼ “Unsay imong hunahuna nga gikinahanglan aron mahimong sama niini tan-awon ang yuta? [Tugoting motubag.] Ang tawhanong mga kagamhanan nakakaplag nga imposible alang kanila ang pagpatungha ug sama niana nga kalibotan. Bisan pa niana, ang Bibliya nagapasalig kanato nga ang Diyos ‘magabag-o sa tanang butang.’ [Paklia ngadto sa panid 30, ug basahang Pinadayag 21:3, 4.] Kining maong brosyur makatabang kanimo sa pagkat-on kon unsay angay nimong buhaton aron mabuhi nianang maong bag-ong kalibotan.” Paklia ngadto sa panid 3, ug ipasundayag kon unsaon nato pagdumala ang pagtuon sa Bibliya.
5 Mahimong gamiton nimo kining paagiha uban sa “Kinabuhi sa Yuta” nga brosyur:
◼ “Daghang tawo ang nagahunahuna nga sila moadto sa langit aron makatagamtam sa kinabuhing walay kataposan, apan unsa may imong hunahuna bahin sa pagkinabuhi sa yuta sa walay kataposan? [Tugoting motubag.] Ang Bibliya nagatug-an kanato kon sa unsang paagi atong mabatonan ang kinabuhing dayon.” Basaha ang Juan 17:3. Unya ipakita sa tagbalay ang ilustrasyon #49, ug pangutana: “Buot ba nimong mabuhi sa usa ka kalibotan nga sama niini?” Itanyag ang brosyur, ug hikaya ang usa ka balikduaw.
6 Ang mga brosyur nagaunod ug tukma-panahong mga ulohan, nagatubag sa mga pangutana sa katawhan, ug nagahatag ug paghupay. Pinaagig paggamit nga mahanason niining mga himana, kita makatabang sa sinserong mga tawo nga “makadangat sa tukmang kahibalo sa kamatuoran.”—1 Tim. 2:4.