Kon Unsaon Pagtukbil sa Kasingkasing sa Atong Ginatudloan
1. Unsay epekto sa gitudlo ni Jesus diha sa kasingkasing sa iyang mamiminaw?
1 Natukbil ni Jesu-Kristo ang kasingkasing sa iyang mamiminaw. Pananglitan, human niya mapatin-aw sa iyang mga tinun-an ang Kasulatan, “nagdilaab” ang ilang kasingkasing. (Luc. 24:32) Kay kinahanglang kinasingkasing ang pagkamatinumanon sa Diyos, unsaon nato pagtabang sa atong ginatudloan aron kinabubut-on silang maghimog kausaban sa ilang kinabuhi?—Roma 6:17.
2. Nganong makatabang ang pagkamaampingon ug pagkamasinabtanon aron matukbil ang kasingkasing sa atong ginasangyawan?
2 Magmaampingon ug Magmasinabtanon: Para sa daghan, dili matukbil ang ilang kasingkasing kon igo lang sila sultihan kon unsay maayo ug daotan. Gani, kon basahan dayon silag teksto aron sawayon ang ilang pagtulon-an, dili na hinuon sila mamati. Aron maabot ang ilang kasingkasing, sabton una nato kon nganong ingon ana ang ilang pagtuo. Kon maampingon ta sa pagpangutana sa ilang opinyon, sayon para nila nga isulti kon unsa gyod ang ilang hunahuna. (Prov. 20:5) Human niana, may ideya na ta kon unsang impormasyon gikan sa Bibliya ang makatukbil sa ilang kasingkasing. Busa, gikinahanglan ang pagpakitag personal nga interes ug pagpailob. (Prov. 25:15) Hinumdomi nga ang matag indibiduwal dili parehas ug espirituwal nga pag-uswag. Hatagig panahon ang balaang espiritu ni Jehova nga maoy mogiya sa ilang hunahuna ug panggawi.—Mar. 4:26-29.
3. Unsaon nato pagtabang sa atong ginatudloan nga maugmad ang maayong mga hiyas?
3 Tabangi Sila nga Maugmad ang Maayong mga Hiyas: Ang mga asoy sa Bibliya bahin sa kaayo ug gugma ni Jehova makatabang sa atong ginatudloan nga maugmad ang maayong mga hiyas. Pananglitan, kon atong basahon nila ang Salmo 139:1-4 o Lucas 12:6, 7, ilang masabtan nga si Jehova duna gyoy personal nga interes sa matag usa nato. Kon maugmad na nila ang apresasyon sa dili takos nga kalulot ni Jehova, molalom ang ilang gugma ug diyosnong debosyon. (Roma 5:6-8; 1 Juan 4:19) Dugang pa, kon ilang masabtan nga ang ilang binuhatan makaapektar kang Jehova, kini makapalihok nila nga mogawi sa paagi nga makapalipay ug makapasidungog kaniya.—Sal. 78:40, 41; Prov. 23:15.
4. Dihang magtudlo sa mga tawo, unsaon nato pagpakita nga atong gitahod ang ilang kagawasan sa paghimog desisyon?
4 Bisag wala ta pugsa ni Jehova nga sundon ang iyang mga sugo, iyang gipakita ang kaayohan kon sundon nato ang iyang mga tambag. (Isa. 48:17, 18) Masundog nato si Jehova kon ang atong paagi sa pagtudlo motabang sa mga tawo sa paghimog hustong desisyon. Kon sila mismo kombinsido nga kinahanglan silang magbag-o, maayo gyod ang resulta. (Roma 12:2) Kini makapasuod nila kang Jehova, ang “tig-usisa sa mga kasingkasing.”—Prov. 17:3.