Interes nga Gipakita sa Laing Tawo

SA DIHANG makig-ambit sa mga kamatuoran sa Bibliya ngadto sa uban, kinahanglang himoon nato ang labaw pa kay sa paghatag ug kahibalo sa kaisipan. Kinahanglang makadani kita sa kasingkasing. Ang usa ka paagi sa paghimo niini maoy pinaagi sa pagpakita ug sinserong personal nga interes sa atong mga tigpatalinghog. Ang maong interes ikapasundayag sa nagkadaiyang mga paagi.

Tagda ang Punto de Bista sa Imong mga Tigpatalinghog. Si apostol Pablo nagtagad sa kagikan ug panghunahuna sa iyang mga tigpatalinghog. Siya mipatin-aw: “Ngadto sa mga Hudiyo ako nahimong ingon sa usa ka Hudiyo, aron makabig ko ang mga Hudiyo; ngadto nilang nailalom sa balaod ako nahimong ingon sa nailalom sa balaod, bisan tuod ako dili ilalom sa balaod, aron makabig ko silang nailalom sa balaod. Ngadto nilang walay balaod ako nahimong ingon sa walay balaod, bisan tuod ako dili kay walay balaod sa Diyos hinunoa nailalom sa balaod ni Kristo, aron makabig ko silang walay balaod. Ngadto sa mga maluya ako nahimong maluya, aron makabig ko ang mga maluya. Ako nahimong tanang butang ngadto sa tanang matang sa katawhan, aron maluwas ko sa bisan unsa mang paagi ang pipila. Apan gihimo ko ang tanang butang tungod sa maayong balita, aron ako mahimong mag-aambit niini sa uban.” (1 Cor. 9:20-23) Sa unsang paagi kita ‘mahimong tanang butang ngadto sa tanang matang sa katawhan’ karong adlawa?

Kon nakahigayon ka sa pagpaniid sa uban, bisag daklit lang, sa dili pa makigsulti kanila, basin mamatikdan mo ang mga timailhan sa ilang mga intereses ug mga kahimtang. Makaila ka ba kon unsay ilang trabaho? Makakita ka bag ebidensiya sa ilang relihiyosong mga tinuohan? Aduna bay timailhan sa kahimtang sa ilang pamilya? Nga gipasukad sa imong mapanid-an, ikapasibo mo ba ang imong presentasyon aron kana mas makapadani sa imong mga tigpatalinghog?

Aron mahimong mas makapadani ang imong presentasyon kinahanglang abante nimong hunahunaon kon unsaon nimo pagduol ang mga tawo diha sa inyong teritoryo. Sa pipila ka dapit, kini naglakip niadtong nanglalin gikan sa langyawng mga nasod. Kon ang maong mga tawo nagpuyo diha sa inyong teritoryo, nakakaplag ka bag epektibong paagi sa pagsangyaw kanila? Sanglit kabubut-on sa Diyos nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran,” himoang imong tumong ang pagpresentar sa mensahe sa Gingharian sa makapadaning paagi ngadto sa tanan nga imong mahibalag.​—1 Tim. 2:4.

Pamati Pag-ayo. Bisan pag nahibalo sa tanan si Jehova, siya magpatalinghog sa uban. Ang manalagnang si Micaias nakadawat ug panan-awon diin si Jehova nakita nga nagdasig sa mga manulonda nga magpahayag sa ilang mga ideya kon unsaon pagdumala ang usa ka butang. Unya gitugotan sa Diyos ang usa sa mga manulonda nga ipadapat ang sugyot nga gihimo sa manulonda. (1 Hari 22:19-22) Sa dihang si Abraham nagpahayag ug kabalaka bahin sa paghukom nga ipatuman sa Sodoma, si Jehova sa pagkamaluluy-on nagpatalinghog kaniya. (Gen. 18:23-33) Sa atong ministeryo, sa unsang paagi makasundog kita sa panig-ingnan ni Jehova sa pagpatalinghog?

Dasiga ang uban nga magpahayag sa ilang kaugalingon. Suknag nahiangay nga pangutana, ug hunong nga igo aron sila makatubag. Patalinghog gayod. Ang imong mahunahunaong atensiyon modasig kanila sa pagsulti nga walay pagpanuko. Kon ang ilang tubag may ipadayag mahitungod sa ilang intereses, sa mataktikanhong paagi magpakisusi ug dugang pa. Nga dili himoon ang panagkabildo nga usa ka pagsukitsukit, tinguhaa nga sila mailhag maayo. Dayega sila tungod sa ilang mga ideya kon makahimo ka niana sa sinserong paagi. Bisan pag dili ka uyon sa ilang punto de bista, pasalamati ang ilang mga opinyon.​—Col. 4:6.

Hinunoa, kinahanglang atong bantayan nga ang atong interes diha sa mga tawo dili molapas sa kon unsay angay. Ang pagkamabalak-on bahin sa uban wala maghatag kanatog pagtugot nga manghilabot sa ilang pribadong mga kahikayan. (1 Ped. 4:15) Kinahanglang bantayan nato nga ang usa ka tawo sa kaatbang nga sekso dili masayop pagsabot sa malulotong interes nga atong ipakita. Sanglit ang butang nga isipong angayang interes diha sa uban magkalain sa nagkalainlaing mga nasod, bisan sa nagkalainlaing mga tawo, ang maayong panghukom gikinahanglan.​—Luc. 6:31.

Ang pagpangandam maoy usa ka tabang aron mahimong maayong tigpatalinghog. Sa dihang ang atong mensahe tin-aw diha sa atong hunahuna, kini makatabang kanato sa pagrelaks ug pagpatalinghog sa uban sa kinaiyanhong paagi. Kini makaparelaks kanila ug basin mas makiling pa silang makigsulti kanato.

Kita magpakitag pasidungog sa uban pinaagi sa pagpatalinghog kanila. (Roma 12:10) Kini magpasundayag nga gipabilhan nato ang ilang mga opinyon ug mga pagbati. Basin sila labawng magpatalinghog sa atong igasulti tungod niana. Nan, may maayong katarongan nga ang Pulong sa Diyos nagtambag kanato nga “magmaabtik sa pagpaminaw, magmahinay sa pagsulti.”​—Sant. 1:19.

Tabangi ang Uban nga Mouswag. Ang pagkabalaka sa uban magpahinabo nga kita maghunahuna kanunay niadtong nagpakitag interes ug sa pagduaw pag-usab kanila aron ipaambit ang mga kamatuoran sa Bibliya nga magtagana sa labing direktang paagi sa ilang mga panginahanglan. Sa pagplano sa sunod nga pagduaw, hunahunaa kon unsay imong nasayran bahin kanila sa nangaging mga pagduaw. Pag-andam ug impormasyon bahin sa ulohan nga ilang gikaikagan. Ipasiugda ang praktikal nga bili sa materyal, nga tabangan sila sa pagsabot kon sa unsang paagi sila makabatog kaayohan gikan sa ilang nasayran.​—Isa. 48:17.

Kon ang imong tigpatalinghog mobutyag sa usa ka kahimtang o problema nga nakapabug-at sa iyang hunahuna, isipa kini nga linaing kahigayonan aron ipaambit ang maayong balita kaniya. Sunda ang panig-ingnan ni Jesus, kinsa andam kanunay sa paghupay niadtong anaa sa kasakitan. (Mar. 6:31-34) Sukli ang tentasyon nga motanyag ug daling solusyon o mohatag ug hapawhapaw nga tambag. Basin makapabati kini sa tawo nga ikaw walay sinserong interes. Sa kapulihay, ipakita ang empatiya. (1 Ped. 3:8) Unya himoa ang panukiduki diha sa binase-sa-Bibliyang mga publikasyon, ug ipaambit ang makapalig-ong impormasyon aron matabangan ang maong tawo sa pagsagubang sa iyang kahimtang. Siyempre, ang mahigugmaong kabalaka alang sa imong tigpatalinghog mopugong kanimo sa pagbutyag ug tinagoang mga butang nga iyang isulti kanimo gawas kon adunay maayong katarongan sa pagbutyag niana.​—Prov. 25:9.

Ipakita nato ang personal nga interes ilabina niadtong atong gidumalahag mga pagtuon sa Bibliya. Hunahunaa nga mainampoon ang mga panginahanglan sa matag estudyante, ug pangandam alang sa pagtuon nga anaa sa hunahuna ang maong mga panginahanglan. Suknaa ang imong kaugalingon, ‘Unsay kinahanglang sunod niyang buhaton aron magpadayon sa pag-uswag sa espirituwal?’ Sa mahigugmaon tabangi ang estudyante sa pagpabili sa gisulti sa Bibliya ug mga publikasyon sa “matinumanon ug maalamong ulipon” bahin sa maong butang. (Mat. 24:45) Sa pipila ka kahimtang, basin dili igo ang paghatag lamang ug katin-awan. Basin kinahanglang ipakita nimo sa estudyante kon unsaon pagpadapat ang usa ka prinsipyo sa Bibliya, nga magkausa sa pagbuhat sa usa ka butang nga magpasundayag sa kapadapatan niini.​—Juan 13:1-15.

Ang katimbang ug maayong panghukom gikinahanglan sa dihang tabangan ang uban nga magpahiuyon sa ilang mga kinabuhi sa mga sukdanan ni Jehova. Ang mga tawo adunay nagkalainlaing mga kahimtang sa kinabuhi ug mga katakos, ug magkalain ang gikusgon sa ilang pag-uswag. Magmakataronganon sa imong panahom sa uban. (Filip. 4:5) Ayaw sila pugsa sa paghimog mga kausaban sa ilang mga kinabuhi. Tugoti ang Pulong sa Diyos ug iyang espiritu nga magpalihok kanila. Buot ni Jehova nga ang mga tawo mag-alagad kaniya gikan sa masinugtanong kasingkasing, nga dili pinugos. (Sal. 110:3) Likayi ang pagpahayag sa imong kaugalingong mga opinyon mahitungod sa personal nga mga desisyon nga ilang giatubang, ug bisan pag hangyoon ka sa uban nga himoon kana, magbantay nga dili mohimog mga desisyon alang kanila.​—Gal. 6:5.

Ihatag ang Praktikal nga Tabang. Bisan pag si Jesus pangunang nabalaka sa espirituwal nga kaayohan sa iyang mga tigpatalinghog, siya mabination usab sa ilang ubang mga panginahanglan. (Mat. 15:32) Bisag kita kabos, adunay daghang praktikal nga mga paagi nga kita makatabang.

Ang interes diha sa uban motukmod kanato nga magmahunahunaon. Pananglitan, kon malisdan ang imong tigpatalinghog tungod sa mga kondisyon sa panahon, balhin ngadto sa mas maayong dapit, o hikaya nga ipadayon ang panaghisgot sa laing higayon. Kon nakaduaw ka sa dili-kombenyenteng panahon, isugyot nga mobalik ka sa laing panahon. Kon ang usa ka silingan o usang nagpakitag interes may sakit o atua sa ospital, ipakita ang imong kabalaka pinaagi sa pagpadala kaniyag kard o mubong sulat o pinaagi sa pagduaw kaniya. Kon angay, basin makatagana ka usab ug simpleng pagkaon o makahimo ug laing malulotong buhat.

Samtang mouswag ang mga estudyante sa Bibliya, basin mobati silag kahaw-ang sa emosyon tungod kay dili na makagugol ug daghang panahon kauban sa kanhing mga sagabay. Makighigala kanila. Gugol ug panahon sa pagpakigsulti kanila human sa ilang pagtuon sa Bibliya ug sa ubang mga higayon. Dasiga sila nga maugmad ang maayong mga pakig-uban. (Prov. 13:20) Tabangi sila aron makatambong sa Kristohanong mga tigom. Tupari sila sa paglingkod sa maong mga panagkatigom, ug tabangi sila sa ilang mga anak aron ang tanan makapahimulos nga mas bug-os sa programa.

Ipakita ang Kinasingkasing nga Interes. Ang pagpakitag interes sa mga tawo maoy dili usa ka teknik nga hanason kondili usa ka hiyas sa kasingkasing. Ang gidak-on sa atong interes diha sa uban madayag sa daghang paagi. Kini madayag sa atong paagi sa pagpatalinghog ug kon unsay atong isulti. Kini maila pinaagi sa kalulot ug konsiderasyon nga atong ipakita ngadto sa uban. Bisan pag dili kita mosulti o walay himoon, kini madayag diha sa atong tinamdan ug sa mga ekspresyon sa nawong. Kon kita tinuod nga matinagdanon sa uban, sa walay sipyat sila makaila niana.

Ang labing hinungdanong katarongan sa pagpakitag sinserong interes diha sa uban mao nga pinaagi sa paghimo niana, atong ginasundog ang gugma ug kaluoy sa atong langitnong Amahan. Makatabang kini nga madani ang atong mga tigpatalinghog kang Jehova ug sa mensahe nga iyang gihatag kanato aron isabwag. Busa, samtang ipakig-ambit nimo ang maayong balita, paningkamot nga padayong magatan-aw “dili lamang sa personal nga interes sa mga butang labot sa inyong kaugalingon, kondili sa personal nga interes usab sa uban.”​—Filip. 2:4.