Pagpakitag Personal nga Interes sa Uban

¹ Dayag kaayo ang interes ni Jehova sa uban. Di ba siya madagayaong nagtagana alang sa iyang linalang? (Gen. 1:29, 30; 2:16, 17; Mat. 5:45; itandi ang Lucas 6:35.) Nga mas importante pa, wala ba siya magpakitag personal nga interes nganhi kanato pinaagig pagtagana alang sa atong kaluwasan gikan sa sala ug kamatayon?​—Juan 3:16.

² Gisundog ni Jesus ang hingpit nga panig-ingnan sa iyang Amahan sa pagpakitag personal nga interes sa uban. (Mat. 11:28-30; 1 Ped. 2:21) Sa miingon ang tawong sanlahon ngadto kang Jesus: “Ginoo, kon buot mo lamang, ikaw makahinlo kanako,” si Jesus mitubag, “Buot ko,” ug siya naayo. (Mat. 8:2, 3) Iyang gipasig-uli usab ngadto sa kinabuhi ang batan-ong lalaki duol sa Nain tungod sa kaluoy sa iyang balong inahan. (Luc. 7:11-15) Bisan ang gagmayng kabataan giisip nga takos sa iyang panahon ug pagtagad, ug siya wala gayod hilabihang pulikia sa paghupay ug pagpalig-on sa uban.​—Mat. 20:31-34; Mar. 10:13-16.

PAMILYA UG MGA HIGALA

³ Kita kinahanglang maninguha nga mahisama kang Jehova ug Jesu-Kristo sa pagpangitag mga paagi aron makapakitag personal nga interes sa uban. Tagdon ta ang pipila ka kahigayonan sa pagbuhat niana.

⁴ Ang usa sa labing dakong mga panginahanglan maoy alang sa mga igsoon sa pagpakitag tinuod nga interes diha sa ilang kaugalingong mga membro sa banay ug dili sa pagpasagad sa ilang espirituwalidad. Kini nagalakip sa pagtuon uban sa pamilya nga makanunayon. Sa inyong pagtuon sa pamilya, ginahimo mo bang mapuslanon ug makapainteres ang materyal? Regular bang gikuyog mo ang kada membro sa banay diha sa pag-alagad sa kanataran? Imo bang gitukod diha sa imong mga anak ang tinguha sa pagbulig sa ubang mga tawo?

⁵ Sa atong puliking mga kinabuhi, atong malimtan ba ang pagpakitag personal nga interes sa mga membro sa kongregasyon kinsa adunay espesyal nga mga panginahanglan? (Prov. 3:27; Gal. 6:10) Diha sa kongregasyon anaa ang mga ilo, mga tigulang, mga balo, ang mga baldado, ug ang mga masub-anon. Dili gayod kita mosalikway sa pagpakitag personal nga interes sa tanan sa atong mga igsoon.​—1 Cor. 10:24; Filip. 2:4; Heb. 13:16.

MGA KARNEROHON SA KANATARAN

⁶ Sa unsang paagi ikapakita ta ang personal nga interes sa mga tawo nga nagatuon sa Bibliya? Bisan tuod kita puliki, kita ba nagapakitag interes kanila ug pabation silang ginaabiabi ingong atong bag-ong mga higala? Kita ba tinubdan sa pagpalig-on alang kanila bisan tuod dili kita ang nagatuon uban kanila?​—Itandi ang Marcos 10:28-30.

⁷ Ikaw ba aduna ing mas dakong bahin sa pagpakitag tim-os nga interes sa mga tawo nga nagapaminaw sa maayong balita? Sa personal nga paagi, unsa may mahimo mo aron makabaton ug mas dakong bahin diha sa ministeryo sa kanataran? Ayaw pag-ukon-ukon kon ikaw anaa sa kahimtang karon sa mas bug-os nga pag-ambit niana.​—Luc. 9:60-62.

⁸ Kita gayod manundog kang Jehova ug kang Jesus sa pagpakitag personal nga interes sa uban. Oo, kita kinahanglang kanunay mangitag mga paagi sa pagpakita sa atong personal nga kabalaka alang kanila.