Sa Kaisog Ipaabot ang Pagdapit nga “Umari!”
1 Ang tulin nga mga hitabo sa tibuok kalibotan nagapaila niining mga panahona ingon “ang kataposang mga adlaw.” (2 Tim. 3:1-5) Ang pagdagsang sa krimen, ekonomikanhong pagkadipundo, ug nagahulga-kinabuhing mga sakit nagpasamot sa kapit-osan niini. Apan bisan pa sa maong mga kasakitan, ang mga tawo ginapaabotan sa imbitasyon nga sa walay kataposan mag-apektar kanila. Ang espiritu ug ang pangasaw-onon padayong nagaingon: “Umari!” Ug karon ang “dakong panon” miduyog kanila sa pagdapit sa katawhan bisan diin aron sa pagduol ug pagkuha sa tubig sa kinabuhi nga walay bayad.—Pin. 7:9; 22:17.
2 Karong mga adlawa, silang giuhaw sa pagkamatarong nagasanong niini nga imbitasyon sa dakong gidaghanon. Sa miaging tuig mga minilyon ang mitambong sa distritong mga kombensiyon nga gihimo sa tibuok kalibotan, ug hapit napulo ka milyon ang presente sa Memoryal. Ang uban pang mga minilyon ang nagapakitag apresasyon sa tagana ni Jehova pinaagig pagpatalinghog sa mensahe sa Gingharian. Nan, pagkaimportante nga gamiton ta ang atong panahon nga maalamon sa pagpaabot niining pagdapita sa katilingban ug sa pamalaybalay!—Buh. 5:42; Efe. 5:15, 16.
SA KAISOG MAKIG-AMBIT
3 Ang unang mga Kristohanon gilutos tungod sa ilang masibotong pagsangyaw. (Buh. 16:19-21; 17:2-8) Bisan pa niana, sila wala mohunong sa ilang maisogong mga panlimbasog sa pagmantala sa maayong balita. Kita usab kinahanglang magmaisogon ug determinado sa atong mga panikaysikay nga masangyaw ang maayong balita.
4 Bisan sa mga nasod nga ang buluhaton gibando, ang mga igsoon sa kinasingkasing nagapakig-ambit sa buluhatong pagsangyaw bisan pa sa grabeng paglutos, apil na ang posibleng pagkatangtang sa mga trabaho, mga puy-anan, ug bisan sa ilang kagawasan. Ang ilang maayo kaayong ehemplo nagapalig-on kanato sa pagpadayon sa pagdapit sa uban nga “Umari!”—2 Tes. 3:9.
5 Kapin na sa 35 anyos, gihuptan sa usa ka sister ang tinguha sa iyang kasingkasing nga magpayunir. Ang iyang mga kahimtang nausab sa dihang siya 70 anyos na ang edad, ug siya nahimong usa ka regular payunir. Bisan tuod pipila ra ka tawo sa maong edad ang mokab-ot sa bag-ong karera, siya mibuhat niana. Tungod kay nalipay sa payunir nga pag-alagad sa pipila ka katuigan na karon, siya nagaingon, “Kini mas pang nagakamaayo sa matag adlaw.”
6 Sama sa unang siglo, ang mga tawo karon nagasanong niini nga pagdapit, nga nagbag-o sa ilang mga hunahuna ug miundang sa nagapasipala-Diyos nga mga buhat. Sila nahimong bahin sa dedikado internasyonal nga panag-igsoonay sa mga Saksi ug nagaduyog sa espiritu ug sa pangasaw-onon sa pag-ingong “Umari!” ngadto sa uban pang mabuot-kasingkasing nga mga tawo.
7 Ang dakong pag-uswag sa buluhaton sa Gingharian ug ang pagpalapad sa mga sangang opisina sa lainlaing kayutaan nagahatag pamatuod sa panalangin ni Jehova. Apan talitapos na ang panahon alang niining daang sistema. Karon mao na ang tukmang panahon sa pagpakitag kaisog ug kasibot sa pag-ingong “Umari!” aron ang uban mahimong mosanong dayon ug molihok sa ilang mapatalinghogan. Atong buhaton kini sa Hulyo ug Agosto uban sa kampanya sa brosyur.—Buh. 20:26, 27; Roma 12:11.