Personal nga Imbitasyon
1. Kanus-a magsugod ang pagpanagtag ug imbitasyon para sa kombensiyon?
1 Kon mag-andam kag espesyal nga salosalo para sa imong mga higala o pamilya, eksayted kang mangimbitar ilabina kon gihagoan ug gigastohan nimo kini pag-ayo. Gihagoan sab pag-ayo ang pag-andam sa espirituwal nga pagkaon nga idalit sa atong umaabot nga kombensiyon. Si Jehova naghatag natog pribilehiyo nga imbitahon ang uban sa pagtambong, nga magsugod tulo ka semana una ang atong kombensiyon. Unsay makatabang nato aron magmadasigon sa pagpangimbitar?
2. Unsay makadasig nato nga bug-os makigbahin sa pagpanagtag?
2 Madasig ta sa pagpangimbitar kon atong pamalandongon ang mga kaayohan nga atong madawat gikan sa makaparepreskong mga instruksiyon nga gitagana ni Jehova sa mga kombensiyon. (Isa. 65:13, 14) Hinumdoman sab nato nga maayog resulta ang atong tinuig nga pagpangimbitar. (Tan-awa ang “Dunay Maayong Resulta.”) Ang uban sa atong giimbitar motambong. Pero daghan man o gamay ra ang mosanong, ang atong kakugi magdayeg kang Jehova ug magpakita sa iyang pagkamahinatagon.—Sal. 145:3, 7; Pin. 22:17.
3. Unsaon pagpanagtag ang mga imbitasyon?
3 Desisyonan sa lawas sa mga ansiyano kon unsay himoon aron daghang imbitasyon ang mapanagtag ug kon binlan ba ang mga balay nga walay tawo o ipanagtag kini sa publikong pagsangyaw. Sa Sabado ug Dominggo, iapil pagtanyag ang mga magasin kon haom. Dihang mahuman na ang pagpanagtag, malipay gyod ta kay daghan tag naimbitar ilabina kon motambong sila sa espirituwal nga bangkete ni Jehova!