Espesyal nga Imbitasyon
1. Kanus-a magsugod ang pagpangimbitar para sa 2014 nga regional convention?
1 Kon mag-andam kag espesyal nga salosalo para sa imong mga higala o pamilya, eksayted kang mangimbitar ilabina kon gihagoan ug gigastohan nimo kinig maayo. Gihagoan sab pag-ayo ang pag-andam sa espirituwal nga pagkaon nga idalit sa atong 2014 nga regional convention. Magsugod tag pangimbitar tulo ka semana una ang atong kombensiyon. Nganong angay tang magmadasigon sa pagpangimbitar?
2. Unsay makadasig nato sa pagpangimbitar?
2 Madasig ta sa pagpangimbitar kon atong pamalandongon ang mga kaayohan nga atong madawat sa espirituwal nga bangkete nga gitagana ni Jehova sa mga kombensiyon. (Isa. 65:13, 14) Hinumdoman sab nato nga maayog resulta ang atong tinuig nga pagpangimbitar. Ang uban sa atong giimbitar motambong. Pero daghan man o gamay ra ang mosanong, ang atong kakugi magdayeg kang Jehova ug magpakita sa iyang kaayo.—Sal. 145:3, 7; Pin. 22:17.
3. Unsaon pagpanagtag ang imbitasyon?
3 Desisyonan sa lawas sa mga ansiyano kon unsay himoon aron daghang imbitasyon ang mapanagtag sa kongregasyon, ug kon binlan ba ang mga balay nga walay tawo o ipanagtag kini sa publikong pagsangyaw. Sa Sabado ug Dominggo, iapil pagtanyag ang mga magasin kon haom. Kon ang pagpanagtag matunong sa unang Sabado sa bulan, prayoridad nato ang pagpanagtag imbes ang pagtanyag ug Bible study. Sa dihang mahuman na ang pagpanagtag, malipay gyod ta kay daghan tag naimbitar sa espirituwal nga bangkete ni Jehova!