Kampanya sa Memoryal Magsugod sa Marso 1
1. Kanus-a magsugod ang kampanya sa Memoryal, ug nganong mas taas kini karong tuiga?
1 Sa Biyernes, Marso 1, kita magsugod sa atong tinuig nga kampanya sa pagdapit sa uban sa pagtambong sa Memoryal. Ang Memoryal saulogon sa Marso 26, nga nagpasabot nga mas taas karon ang kampanya kay sa miaging mga tuig. Tungod niini, mas daghang tawo ang mahatagan ug imbitasyon, ilabina kon dako ang teritoryo sa kongregasyon.
2. Unsay mga kahikayan sa pagkuhag imbitasyon ug pagkobre sa teritoryo?
2 Paghimog Kahikayan: Ang mga ansiyano mohatag ug instruksiyon kon unsaon pagkobre sa teritoryo, apil na kon angay bang ibilin ang mga imbitasyon sa mga balay nga walay mga tawo. Kon duna pay mabiling imbitasyon human makobrehi ang tibuok teritoryo, mahimo kining ipanagtag diha sa publikong mga dapit. Paneguroon sa magtatan-aw sa pag-alagad nga mabutang diha sa magazine counter ang mga imbitasyon aron makuha sa mga magmamantala, apan dili kini ihurot pagbutang. Mokuha lang kitag igong gidaghanon nga magamit nato sa usa ka semana.
3. Unsay angay natong hinumdoman sa dihang manghatag ug imbitasyon?
3 Unsay Atong Isulti? Aron daghan ang atong maestorya, mas maayo nga mubo ang atong presentasyon. Dunay sampol nga presentasyon sa panid 4 nga atong magamit. Siyempre, kita dili kinahanglang magdalidali kon ang tagbalay gustong makig-estorya o dunay mga pangutana. Sa dihang makigbahin sa pagpanagtag sa Sabado ug Dominggo, kita makatanyag usab ug mga magasin kon posible. Sa Marso 2, kita managtag ug imbitasyon imbes magsugod ug Bible study.
4. Nganong magmadasigon kita sa pagpakigbahin sa kampanya?
4 Kita nanghinaot nga daghan ang motambong sa Memoryal. Ang pakigpulong magpatin-aw kon kinsa gayod si Jesus. (1 Cor. 11:26) Hisgotan usab niini kon unsay kaayohan sa iyang kamatayon alang kanato. (Roma 6:23) Ug ipasiugda niini kon nganong angay nato siyang hinumdoman. (Juan 17:3) Hinaot magmadasigon kita sa pagpakigbahin niini nga kampanya!