Ang Pagpanagtag sa Imbitasyon sa Memoryal Sugdan sa Abril 2
1. Kanus-a ipanagtag ang imbitasyon sa Memoryal, ug nganong hinungdanon kining tinuig nga kampanya?
1 Sugod sa Abril 2 hangtod sa Abril 17, kita managtag sa imbitasyon sa labing hinungdanong panagkatigom niining tuiga—ang Memoryal sa kamatayon ni Kristo. Sa miagi, daghang interesado ang misanong niining tinuig nga kampanya. Pananglitan, sa adlaw sa Memoryal, usa ka babaye ang mitawag sa sangang buhatan ug miingon: “Bag-o ra kong nauli, ug dunay imbitasyon diha sa among pultahan. Gusto kong motambong, apan wala ko mahibalo sa oras.” Gisulti sa brader kon asa kini makita diha sa imbitasyon. Ang babaye misaad, “Motambong ko karong gabii!”
2. Unsay atong ikasulti sa dihang magtanyag sa imbitasyon?
2 Kon Unsaon Kini Paghimo: Sanglit limitadong panahon lang ang igahin sa pagkobre sa teritoryo, labing maayo nga mubo lang ang presentasyon. Kita makaingon: “Hello. Aduna kamiy imbitasyon para sa inyong pamilya alang sa usa ka hinungdanong kasaulogan kada tuig nga himoon sa tibuok kalibotan sa Dominggo, Abril 17. [Itunol ang imbitasyon sa tagbalay.] Kanang petsaha mao ang anibersaryo sa kamatayon ni Jesus. Usa ka libreng pakigpulong pinasukad sa Bibliya ang magpatin-aw kon sa unsang paagi kita makabenepisyo sa lukat ni Kristo. Anaa sa imbitasyon ang adres ug oras sa panagkatigom dinhi sa atong dapit.”
3. Sa unsang paagi kita makaimbitar ug mas daghan?
3 Kon dako ang teritoryo, mahimong hikayon sa mga ansiyano nga binlan ug imbitasyon ang mga balay nga walay tawo apan ibutang kini nga dili makita sa lumalabay. Seguroang maimbitar ang imong mga balikduaw, paryente, katrabaho, kaeskuyla, ug ubang kaila. Sa dihang managtag sa hinapos sa semana, itanyag kini uban sa mga magasin kon haom. Makaoksilyare ka ba sa Abril aron mas pang makaduyog niining makapalipay nga kampanya?
4. Nganong gusto natong motambong sa Memoryal ang mga interesado?
4 Pagkadakong pamatuod ang madawat sa mga manambong! Ilang mahibaloan ang dakong gugma ni Jehova sa pagtagana sa lukat. (Juan 3:16) Ilang makat-onan kon unsay himoon sa Gingharian sa Diyos alang sa katawhan. (Isa. 65:21-23) Dapiton usab sila nga makigsulti sa mga atendant ug mohangyog pagtuon sa Bibliya aron mas pang makakat-on. Atong iampo nga daghan pang interesado ang mosanong niini nga kampanya ug motambong sa Memoryal!