Kampanya sa Pagpahibalo sa Memoryal Magsugod sa Marso 17
1. Unsang kampanya ang magsugod sa Marso 17?
1 Ang pagsaulog sa Memoryal kada tuig nagamantala sa kamatayon ni Jesus. (1 Cor. 11:26) Busa, buot natong ang uban moduyog nato sa pagtambong ug pagpamati bahin sa mahigugmaong gasa ni Jehova, ang lukat. (Juan 3:16) Karong tuiga, ang atong kampanya sa pagdapit sa mga tawo alang sa Memoryal magsugod sa Sabado, Marso 17. Gusto ba nimong makigbahin niini sa bug-os?
2. Unsay atong isulti sa pagtanyag sa imbitasyon?
2 Kon Unsay Atong Isulti: Maayong mub-on ra ang presentasyon. Makaingon ta: “Maayong buntag. Nanghatag mig imbitasyon para sa inyong pamilya alang sa importanteng tinuig nga pagsaulog nga himoon sa tibuok yuta sa Abril 5. Adunay libreng pakigpulong sa Bibliya nga magsaysay kon unsay nalampos sa kamatayon ni Jesus ug kon unsay iyang ginabuhat karon. Naa sa imbitasyon ang adres ug oras sa tigom nga himoon dinhi sa atong lugar.” Sa dihang managtag sa imbitasyon sa hinapos sa semana, itanyag usab nato ang mga magasin kon nahiangay.
3. Sa unsang paagi daghan tag maimbitar?
3 Pangimbitar ug Daghan: Ang atong tumong mao ang pagpangimbitar ug daghan. Busa seguroha nga maimbitar ang imong mga gitun-an sa Bibliya, balikduaw, paryente, katrabaho, eskolmet, silingan, ug ubang kaila. Ang mga ansiyano mohatag ug instruksiyon kon unsaon pagkobre ang inyong teritoryo. Ang atong tinuig nga kampanya sa pagpangimbitar alang sa Memoryal may mga resulta. Sa miaging tuig, dihang ang usa ka babaye misulod sa tigomanan, gusto sa atendant nga tabangan siyag pangita sa Saksi nga nagdapit kaniya. Apan ang babaye miingon nga wala siyay kailang Saksi didto ug nadawat niya ang imbitasyon gikan sa usa nga namalaybalay sayosayo nianang adlawa.
4. Unsay mga rason nga angay kang magmasiboton sa pagpakigbahin sa kampanya?
4 Tingali dunay motambong sa inyong Memoryal tungod sa imbitasyon nga imong gihatag. Motambong man sila o dili, ang imong paningkamot usa gihapon ka dakong pamatuod. Ang mga imbitasyon nga imong gipanagtag magamantala nga si Jesus usa na ka gamhanang Hari karon. Ang imong masibotong pagpakigbahin magpakita sa tanan—mga tawo sa teritoryo, isigkamagmamantala, ug labing hinungdanon, kang Jehova—nga dulot nimong gipabilhan ang gasa nga lukat.—Col. 3:15.