Tibuok-Kalibotang Pagpanagtag sa Imbitasyon sa Memoryal!
1. Unsang tibuok-kalibotang kampanya ang pagahimoon sa dili pa ang Memoryal?
1 “Ipadayon ninyo ang pagbuhat niini sa paghandom kanako.” (Luc. 22:19) Agig pagsunod niini nga sugo ni Jesus, ang mga magsisimba ni Jehova magtigom uban sa mga interesado sa Marso 30, 2010, sa paghandom sa kamatayon ni Jesus. Usa ka imbitasyon para sa Memoryal ang ipanagtag sa tibuok kalibotan nga magsugod sa Marso 13 hangtod sa Marso 30.
2. Unsaon nato pagtanyag ang imbitasyon?
2 Kon Unsaon Kini Pagtanyag: Hatagig imbitasyon ang tagbalay aron iyang makita ang ilustrasyon sa hapin, dayon isulti kini: “Sa gabii sa Marso 30, milyon-milyon sa tibuok kalibotan ang maghandom sa kamatayon ni Jesus. Amo kang gidapit ug ang imong pamilya sa pagtambong niini nga okasyon. Mahimo usab nimong dapiton ang imong mga higala. Ania dinhi sa imbitasyon ang oras ug dapit diin kini pagahimoon.” Depende sa kahimtang, mahimo nimong basahon ang Lucas 22:19 aron makita sa tagbalay ang kahinungdanon sa maong okasyon. Apan hinumdomi nga limitado lang ang atong panahon sa pagkobre sa teritoryo, busa mub-a lang ang imong presentasyon.
3. Kinsay puwede natong dapiton?
3 Kon dako ang inyong teritoryo, tingali instruksiyonan ka sa mga ansiyano sa pagbilin ug imbitasyon sa mga balay nga walay tawo sa una nimong duaw. Mahimo nimong itanyag ang mga magasin uban sa imbitasyon depende sa kahimtang. Paneguroa nga madapit ang imong mga balikduaw, ginatun-an sa Bibliya, kauban sa trabaho, isigkaestudyante, mga paryente, silingan, ug uban pa.
4. Ang pagpabili sa gugma ni Jehova sa pagtagana sa lukat motukmod kanato sa pagbuhat sa unsa?
4 Pangandam Aron Makapakigbahin sa Bug-os: Ang panahon sa Memoryal maoy maayo kaayong panahon sa pagpakigbahin pa gayod diha sa ministeryo. Imo bang mapasibo ang imong eskedyul aron makaoksilyare payunir ka? Duna ka bay mga anak o mga ginatun-an sa Bibliya nga maayog pag-uswag sa espirituwal? Kon duna, duola ug pangutan-a ang mga ansiyano kon kuwalipikado na ba silang makigbahin niining espesyal nga kampanya ingong di-bawtismadong mga magmamantala. Ang pagpabili sa gugma ni Jehova sa pagtagana sa lukat motukmod kanato sa pagtambong sa Memoryal ug sa pagdapit ug daghan kutob sa mahimo sa pagtambong uban kanato.—Juan 3:16.