Espesyal nga Kampanya sa Pag-anunsiyo sa Memoryal!
1. Unsa nga kalihokan ang pagahimoon sa tibuok kalibotan sa mga magmamantala sa Gingharian sugod sa Marso 21, 2009, ug ngano?
1 Sa adlawng Huwebes, Abril 9, 2009, ang mga magsisimba ni Jehova nga Diyos sa tibuok kalibotan magtigom aron sa paghandom sa iyang kinadak-ang buhat sa gugma nga gipakita alang sa katawhan. (Roma 5:6-8) Malaomon kita nga milyonmilyong interesado ang moduyog kanato sa paghandom sa kamatayon ni Jesus. Ang usa ka espesyal nga imbitasyon sa Memoryal ipanagtag sa tibuok kalibotan sugod sa Marso 21.
2. Unsa nga mga punto ang angay nimong hinumdoman sa dihang magtanyag sa imbitasyon?
2 Mga Punto nga Angayng Hinumdoman: Gamita nga epektibo ang mga hulagway, pangutana, ug ang gisitar nga mga teksto diha sa imbitasyon. Pananglitan, mahimo nimong gamiton ang hulagway diha sa hapin ug moingon: “Gusto nakong dapiton ka sa paghandom sa kamatayon ni Jesus uban kanamo. Kini pagahimoon sa Huwebes, Abril 9, 2009.” Dayon hisgoti ang ulohan sa imbitasyon ug ang mga pangutana sa ubos niana. Ipasiugda gayod ngadto sa tagbalay nga mahimo niyang dapiton ang iyang pamilya ug ang uban pa nga gusto niyang ikuyog.
3. Sa unsang paagi imong mapaloap ang imbitasyon nga imong gihatag sa sayong bahin sa kampanya?
3 Kon halapad ang teritoryo sa inyong kongregasyon, ang mga ansiyano tingali mag-awhag kaninyo sa pagbilin sa mga imbitasyon diha sa mga balay nga walay tawo. Sa mga hinapos sa semana, itanyag ang mga magasin uban sa imbitasyon. Himoang tumong nga imong madapit ang imong mga balikduaw, ginatun-an sa Bibliya, paryente, eskolmet, kauban sa trabaho, silingan, ug mga kaila. Sa miaging tuig, usa ka sister ang midapit sa 30 niya ka paryente, ug sa matag karon ug unya iya silang pahinumdoman nga hinungdanon gayod ang pagtambong sa maong okasyon. Siya nalipay gayod sa dihang mitambong ang 25 kanila, ug 4 ang midawat ug pagtuon sa Bibliya sa ulahi!
4. Unsa nga mga plano ang angay natong himoon karon, ug ngano?
4 Pagplano Karon: Tingali daghang magmamantala ang makahimo sa pagpauswag sa ilang kalihokan sa Marso ug Abril. Kon aduna kay mga anak o mga ginatun-an sa Bibliya nga nagmauswagon sa pag-alagad, basin mao na kini ang maayong higayon aron sila mahimong dili-bawtismadong mga magmamantala. Karon na ang panahon sa paghimog mga kahikayan aron bug-os ka nga makaambit niini nga kampanya sa pag-anunsiyo sa paghandom sa duha ka kinadak-ang buhat sa gugma.—Juan 3:16; 15:13.