Maayong Kaugmaon—Gitinguha sa Tanan
Unsa nga kaugmaon ang imong gusto? Sama sa kadaghanan, seguradong gusto nimo nga ikaw ug ang imong pamilya dunay maayong kaugmaon—kinabuhi nga malipayon, maayo ang panglawas, malinawon, ug malamposon.
Pero daghan ang nagduhaduha kon mabatonan ba nila ang kaugmaon nga ilang gitinguha. Nakita nila ang kalit ug wala damhang mga hitabo—sama sa COVID-19 nga pandemic—nga nakapausab sa kinabuhi sa mga tawo, nakahugno sa ekonomiya, ug nakapameligro sa ilang kinabuhi. Maong nabalaka sila sa ilang kaugmaon.
Tungod niana, ang mga tawo nangita gyod ug paagi nga makabaton ug mas maayong kaugmaon. Ang uban misalig sa dili makitang mga puwersa sama sa kapalaran o suwerte. Daghan sab ang naningkamot nga makabaton ug edukasyon ug kuwarta, kay nagtuo sila nga kini ang makahatag sa tanan nilang gitinguha. Para sa uban, ang pagkahimong maayong tawo mao ang sekreto sa pagbaton ug maayong kinabuhi.
Ang mga gihisgotan ba makahatag nimog maayong kaugmaon? Aron mahibalo, kinahanglan nimong konsiderahon kini nga mga pangutana:
Asa nagdepende ang imong kaugmaon?
Ang edukasyon ug kuwarta makagarantiya bag mas maayong kinabuhi?
Ang pagkahimong maayong tawo garantiya ba nga maayo ang imong kaugmaon?
Asa nimo makita ang kasaligang giya para sa maayong kaugmaon?
Kini nga isyu sa Bantayanang Torre motubag niini nga mga pangutana.