Ang Pagkahimong Maayong Tawo Makagarantiya bag Maayong Kaugmaon?

Sukad pa kaniadto, daghan ang naghunahuna nga ang pagkahimong maayong tawo seguradong makahatag ug maayong kaugmaon. Pananglitan, ang mga tawo sa sidlakang bahin sa Asia nagtahod sa giingon sa pilosopong magtutudlo nga si Confucius (551-479 B.C.E.): “Ang dili nimo gustong buhaton sa imong kaugalingon, ayaw buhata sa uban.”a

ANG GIHIMO SA DAGHAN

Daghan gihapon ang nagtuo nga ang sekreto sa maayong kaugmaon mao ang maayong panggawi. Naningkamot sila nga magmatinahoron, magpakitag maayong pamatasan, mohimo sa ilang papel diha sa komunidad, ug mamentinar ang maayong konsensiya. “Nagtuo ko nga kon matinud-anon ko ug sinsero,” miingon si Linh nga taga-Vietnam, “panalanginan ko.”

Ang babaye miboluntaryo sa paghatag ug pagkaon sa mga pobre ug way balay.

Ang uban naghimog maayo tungod sa gitudlo sa ilang relihiyon. Si Hsu-Yun, nga nagpuyo sa Taiwan, miingon, “Gitudloan ko nga kon ang usa maayog binuhatan, magmalipayon siya human sa iyang kamatayon. Pero kon daotan ang iyang ginahimo, siya mag-antos.”

UNSAY RESULTA?

Ang babaye human sa tibuok adlaw, naguol ug gikapoy samtang nagkugos sa iyang anak.

Tinuod nga kon mohimo tag maayo sa uban, daghan tag madawat nga kaayohan. Pero daghan ang nakamatikod nga dili kanunayng maayo ang ibalos kanila. “Sa akong eksperyensiya, kadtong naghimog maayo dili kanunayng panalanginan,” miingon si Shiu Ping nga nagpuyo sa Hong Kong. “Naningkamot ko sa pag-atiman sa akong pamilya ug sa paghimog maayo. Pero nabungkag ang akong kaminyoon, ug ako ug ang akong anak gibiyaan sa akong bana.”

Nakita sa daghan nga ang relihiyon dili kanunayng makatabang sa uban nga mahimong maayong tawo. “Miapil ko sa usa ka relihiyon ug nahimong direktor sa mga kalihokan sa mga batan-on,” miingon si Etsuko nga nagpuyo sa Japan. “Nakurat ko kay ang ubang membro sa akong relihiyon imoral, nag-ilogay ug posisyon, ug naggamit sa kuwarta sa simbahan sa dili maayong paagi.”

“Naningkamot ko sa pag-atiman sa akong pamilya ug sa paghimog maayo. Pero nabungkag ang akong kaminyoon, ug ako ug ang akong anak gibiyaan sa akong bana.”—SHIU PING, HONG KONG

Ang ubang relihiyoso nawad-ag kalipay kay wala panalangini ang ilang maayong ginahimo. Kanay gibati ni Van nga gikan sa Vietnam. “Kada adlaw kong magdala ug prutas, bulak, ug pagkaon ug ihalad ni sa altar sa akong namatay nga mga katigulangan, kay naglaom ko nga panalanginan ko sa umaabot,” siya miingon. “Bisan pa sa maayong mga butang ug mga rituwal nga akong gihimo sa daghang tuig, ang akong bana grabeng nasakit. Dayon, namatay ang akong anak nga nag-eskuwela sa laing nasod.”

KON NGANONG DILI IGO ANG PAGKAHIMONG MAAYONG TAWO

Importante ang pagkahimong maayong tawo, pero dili na makagarantiya ug maayong kaugmaon. Ngano? Konsideraha ang giingon sa Balaang Kasulatan.

DILI TANAN ANG MOHIMOG MAAYO

“Ang usa lang ka makasasala makalaglag ug daghang maayo.”—ECCLESIASTES 9:18.

Bisan pag maningkamot ka nga mohimog maayo, posibleng madaot ang imong kaugmaon tungod kay ang uban kaugalingon ray gihunahuna. Pananglitan, panahon sa pandemic, lagmit imong gisunod ang tambag sa mga awtoridad, sama sa physical distancing. Pero komosta kon dili mosunod ang uban? Ang ilang binuhatan makapameligro niadtong nagsunod sa kon unsay husto.

ANG MGA TAWO PUWEDENG MASAYOP SA KON UNSAY MAAYO O DAOTAN

“Naay dalan nga morag husto para sa usa ka tawo, apan kamatayon diay ang dulnganan niana.”—PROVERBIO 14:12.

Gipakita sa kasaysayan nga daghan ang naghimo sa mga butang nga abi nilag husto, pero sa ulahi ilang naamgohan nga sayop diay. Bisan pag maayo ang ilang intensiyon, nag-antos gihapon sila tungod sa ilang sayop nga mga desisyon.

ANG KINABUHI WALAY KASEGUROHAN

“Wala mo masayod kon unsay mahitabo sa inyong kinabuhi ugma.”—SANTIAGO 4:14.

Bisag unsa pa ka maayo ang usa ka tawo, puwede siyang kalit nga mamatay. Pananglitan, panahon sa COVID-19 nga pandemic, daghang volunteer ang namatay. Konsideraha sab ang eksperyensiya ni Liting, nga taga-China ug namatyan ug amahan tungod sa aksidente sa sakyanan. Siya miingon: “Wala ko kasabot kon nganong namatay si Papa. Buotan kaayo siya, kugihan, mapainubsanon, ug sinsero. Siya ray namatay sa sakyanan.”

Kon ang pagkahimong maayong tawo dili garantiya aron makabaton ug maayong kaugmaon, unsay makahatag ug garantiya? Aron matubag kini, nagkinahanglan tag kasaligang giya nga makatubag sa atong mga pangutana ug motultol nato sa maayong kaugmaon. Asa nato makita ang maong giya?

a Para sa dugang impormasyon sa gitudlo ni Confucius, tan-awa ang kapitulo 7, parapo 31-35, sa librong Mankind’s Search for God, nga gipatik sa mga Saksi ni Jehova ug naa online sa www.jw.org.